1 Pedro 3 - Biblia Yanowamö

Bä fe̦yalobö bä sho bä suwäbö bä sho bä bluca dodijidawä cuobä tä a̦

¹ Bei. Inaja showawä, fei däjä wamacö fe̦yalobö ca̦i lä cuo wei bämacö nowa taö nomöjöa. Afä fe̦yalofä dodijidawä wama bä a̦ nia ji̦liaö. Ai bä lä cuinö, Jesucristo a wa̦ bejedi bufii ma mlajei ma cui, wama bä a̦ lä juaö wei tänö bä bufi tamamou fe yadiobä. Wama bä yömölaö ma mlai ma cui,

² Yai Bada nija wamacö lä quilii wei wamacö fa möjenö, wamacö joleblalou lä mlai wamacö ca̦i fa möjenö, bä bufi jaducublobä.

³ ¿Ö̦jö tawä, suwä wamacö? Wamacö feta u̦cu lä liyäjäblamou wei tänö wamacö a̦fa liyäjäwä tamobä wamacömi. Wamacö lä baushimou wei tänö ca̦i mlai. Wamacö camishibö ca̦inö mlai. ¿Ö̦jö tawä? Olo bänö wamacö ma baushimou wei ma cui, camishi cäcö nowa lä bluca wei cäcö ja wamacö ma didio wei ma cui, ö̦jö tänö wamacö a̦fa dodijidawä nia tamoimi.

⁴ Ma, bei wamacö sibo mlai, bei wamacö bufi yai lä liyäjäo wei tänö, Yai Badanö wamacö a̦fa nia shino suwä liyäjäwä taö. Wamacö bufi ca̦i oquewä cuo ja, bufi yanöcöwä wamacö ca̦i cuo ja, inaja lä yai. Ö̦jö däjä Yai Bada wama a bufi nia yai doblamabou. Ö̦jö tä nowa a̦fa shino yai bluca taö.

⁵ Yai Bada ebä jaba lä cuono wei bä suwä lä cui, inaja bä jaba cuaaö malä balöono wei, Yai Bada tä nofi lä mölabono wejei bä suwä lä cui. Bä fe̦yalobö dodijidawä ebä a̦ juaö lä cadidiono wejei tänö, bei bä bufi yai baushiblamoma.

⁶ ¿Ö̦jö tawä? Sara a lä cuinö, inaja showawä bä fe̦yalobö Ablaamö a wa̦ juaö cuo balöoma. A nofi yai badaboma. Cama a lä cuaano weinaja wamacö suwä cuaaö nodio ja, quilii mlai ja fe̦yalofä wama bä a̦ dodijidawä juaö fe yadio ja, ö̦jö nija wamacö nia nöömou.

⁷ Bä fe̦yalobö wama ecö ma cui, cafä bämacö yömölaö majöa lä cule, wa̦lo wamacö dodijidawä ca̦i cuo mö feduobä. ¿Ö̦jö tawä? Dodijidawä suwäböfä bä ca̦i da cuoje. Bä da bayeliblaje. Cafä wamacö nö wa̦lojaö lä culenaja bä suwä cuwä malä mlai. Bä nofi ca̦i da taboje. Ba̦limi wamacö cuobä, Yai Bada tänö cafä no mlai ja wamacö dobäö lä cuo weinaja, inaja showawä, suwäböfä bä ma cui bä nia ca̦i dobäö cuo mö feduo malä cui. ¿Ö̦jö tawä? Dodijidawä bä ca̦i da cuoje, ö̦jö lä, wamacö bluca bayeliblamobä. Yai Bada nija wamacö nö bayeli nacao däjä, afä tä wa̦lidiwä läo dicoo mlaobä.

Bämacö dodijaö tä nowa ja bämacö nö lä bleaaö wei tä a̦

⁸ Bei. Fei däjä bluca wamacö nija ya wa̦ faö majöa lä cule. Wamacö bufi shedecou dicoo mlai, moli tä ja bä bufi bluca shino da shalilo, ö̦jö lä. Täbä nofi ca̦i da ojodaboje. Jesucristo ebä ca̦i bluca da nofimaje. Bä nofi ca̦i bluca da jo̦lijiboje. “Camiyä ya shino yai”, bä bufi ca̦i cuu dicoo dijä.

⁹ Wamacö nö bleaamaöje ja, bä taamaö mö feduo dijejä. Wamacö a̦fa taöje däjä, bä a̦ ca̦i juo dijä. Wama bä taamaö mö feduo mlai ja, Yai Bada nija wama bä shino yai bayelimabä, bä dodijidawä cuobä. ¿Ö̦jö tawä? Inaja wamacö cuaaö ja, cafä wamacö ma cui wamacö nia ca̦i bayeliblamou mö malä feduo wei. ¿Ya jolemou daanö? Wamacö bayeliblamobä Yai Bada tänö wamacö malä nacaleno wei.

¹⁰ ¿Ö̦jö tawä? Bämacö nia lä bayeliblamou wei, yedu ja ma cui Yai Bada tänö tä a̦fa wäyäö balöo showaoma. Abinaja a cuma. Dodijidawä wamacö nia cudio ja lä, wamacö bufi nia doblalou ja lä, wa̦lidiwä tä a̦ ja bä a̦ fa dijä. Bä caficö a̦ jolemo dijä.

¹¹ Wa̦lidiwä tä ja bä mö da juluo. Dodijidawä tä shino yai da taje. Bufi yanöcöwä wamacö nia lä cuo wei tä shino yai da dayäaje. Ö̦jö tä nabä shino yai da cadidoje.

¹² Bä lä cadidou wei bä nija, Bada tä mamo showaa, bä nowamabä. A yömöca ca̦i dao, bä nö bayeli nacao däjä bä a̦ ji̦liodayobä. Ö̦jö ma cui, wa̦lidiwä talewä bä nija, Bada tä mabucabö läo. Einaja Yai Bada a cuma.

¹³ Bä bufi da dayäo. Showadi wamacö dodijaö bufi doblao ja, ¿ö̦jö tä nowa ja wamacö nö nia bleaamaöje daanö?

¹⁴ Ja̦o. Ö̦jö ma cui, wamacö dodijaö tä nowa ja wamacö nö bleaamaö bädaoje ja, wamacö bufi nia doblao fe yadio. Wamacö nö lä bleaamaö wejei bä lä cui, bä nö quili ta dijejä. Bä bufi nofi ca̦i jushublao dijä.

¹⁵ Bei wamacö bufi jamö Cristo a nofi shino yai da taboje, afä wama a nofi lä Badabou wei wama a wa̦ yai juabä. Jesucristo wama a nofi lä mölabou wei tä wa̦liije ja, wawädowä bä a̦ nö wäo da showadao. Ö̦jö ma cui, Yai Bada wama a nofi tabolanö, oquewä wamacö a̦ nia faö.

¹⁶ Jesucristo wama ecö yalo, showadi wamacö a̦fa nia taöje. Ö̦jö ma cui, wamacö a̦fa ma taöje däjä ma cui, bä dodijaö fe da yadio. Bei wamacö bufi jamö, wa̦lidiwä tä lämabo dijejä, wamacö bufi yanöcöo fe yadiobä. Wamacö a̦fa lä taö wejei bä lä cui, ya̦cumö bä nö jolemou fa ö̦jöbömolunö, bä bufi nia quilijou majöo.

¹⁷ Wamacö dodijaö tä nowa ja wamacö nö bleaamaöje ja, tä dodijidawä waiquiwä. Inaja Yai Bada tänö wamacö taamaö ja, tä wa̦lidiwämi. Ö̦jö ma cui, wamacö doblou lä mlai tä nowa ja wamacö nö bleaamaöje ja, wamacö nö bleaamabeje lä wamacö waiquiwä. Cafä wamacö mayo.

¹⁸ Cristo a ma cui, nowa mlai ja a nö malä bleaamano wejei. Camiyä bämacö doblou lä mlai tä nowa ja, ö̦jö cä lä a moli shämoa malä showadalayono wei. A yai lä cadidou wei a lä cui, a shämoa lälayoma, bämacö cadidou lä mlai, Yai Bada nija bämalecö lulubobä. Bei a yai nomaa cadidilayoma ma cui, Yai Bada bei a Bufinö a demi jocädamaö co̦layoma.

¹⁹ Ö̦jö tä Bufi lojodenö, täbä lä nomaö wei täbä cuobä jamö Jesús a fa alufälönö, Yai Bada tänö täbä bufi shi lä wa̦limabole täbä ca̦i yömölacölöma.

²⁰ Noewä däjä bä lä bälöono wei, ö̦jö bä bufi li cuoma. Canawä a lä tano wei däjä, ö̦jö lä bänö Yai Bada tä a̦ juanomije. Ö̦jö ma cui, canawä a tamaö showao däjä, Yai Bada tä yanöcöblao balöoma. A ishou jaöonomi. Ö̦jö däjä, canawä a jamö bolacadabö bä nofi shino yashulayoma, 8 bä lä cui. Modu u jamö bä befi ca̦i ca̦o däjä bä bayeliblamou fe yadioma.

²¹ Inaja showawä, fei däjä bämacö lä bayeliblamou wei, mau u jamö culanö bäma tä jömaö, bämacö fe lä ojomamou wei däjä. Bei bämacö sibo ya̦lömobä tämi. Bämacö fe ojomamou däjä, wa̦lidiwä bäma tä lämabou mlai ja, Yai Bada nijamö bämacö bufi mö lä yaiblou wei bäma tä shino yai jömaö. Jesucristo a demi jocädou co̦layoma yalo, bämacö bayeliblamou.

²² A demi jocädou fa co̦lonö, fedu jamö a co̦molayofälöma. Yai Bada jayu boco mashi jamö a cua lä culadi. A̦jele täbä ma cui, täbä bada lä läladi täbä ma cui, täbä ca̦i lojode lä culadi täbä ma cui, ö̦jö lä täbä bluca nija Jesucristo a Bada läadayoa.