1 Pedro 2 - Biblia Yanowamö

Cama dodijidawä bäma ecö nia lä yaio wei tä a̦

¹ Ö̦jö wama tä a̦ dodijidawä ji̦lia waiquilema cudeenö, wa̦lidiwä tä bluca da blajamalöje. Wamacö nö lä nabämou wei tä ca̦i bluca. Wama täbä lä mölamaö wei tä bluca ca̦i. Wamacö lä jolemou wei tä ca̦i. Täbä dodijaö ayao ja wama täbä nofi lä wa̦libou wei tä ca̦i. Ai wama täbä a̦fa dobloimi lä wäyäö wei tä ca̦i bluca. ¿Ö̦jö tawä? Ö̦jö tä bluca da blajamalöje.

² Inaja wamacö cuaaö mlai ja, Yai Bada etä a̦ shino yai da bufiboje, wamacö bufi lojodoobä. Ijilu oshe bä wai lä cuinö, suju lobe ubä bufiblaö mö yabaö lä cuo wejeinaja, inaja Yai Bada wama etä a̦ bufiablalaö cuaabä, wamacö bufi yai badafälöbä.

³ Ö̦jö tä a̦ shino yai da bufiboje, ö̦jö lä. Bada wama tä dodijidawä daö malä waiquii. ¿Ö̦jö tawä? Wa̦lidiwä wama tä bufijabä wamacömi.

⁴ Jesucristo nija bä da ajedeiquiyo. Ö̦jö nija wamacö ajedou däjä, maa ma lä ba̦limi wei ma wa̦fa lä jilabou wejei a nija wamacö yai ajedeblaliyo. Ö̦jö ma lä cui, ma yai demi. Täbä ca̦i demiblamaö. ¿Ö̦jö tawä? Yai Bada tänö ma yailema. Ma wa̦fa nowa bluca taö. Ö̦jö ma cui, yanowamö täbänö ma li wailemaje.

⁵ Cafä jai maa wamacö ma demi cuwä mö feduwä, ö̦jö nija wamacö bluca fa co̦cablalunö, cama wama ecö yafi yai cublobä. Yai Bada etä yafi jamö nofi bäyäalewä bä lä yailenaja, cafä inaja showawä wamacö ca̦i yaia mö fedua. Yai Bada tä lä cule ja ö̦jö bä lä ojodamou weinaja, inaja showawä wamacö ojodamou ajedeo cuo mö feduobä, Yai Bada wama a bufi doblamabobä. Jesucristo wama ecö yalo, wamacö lä ojodamou wei tä ja Yai Bada a bufi nia doblalou.

⁶ Yai Bada etä a̦ oni jamö, ö̦jö maa ma wa̦fa ca̦i wäyämamou showadao balöoma. Abinaja Yai Bada a cuma. ¡Tä da möje! Sionoteli bä shabonobö jamö, maa ya ma blaaö lä cule, a yafi nia colo lä lojodobou wei ma lä cui. Camiyänö ya ma yailema. Ma nowa bluca. Ö̦jö jai maa ma lä cule, a bejedi lä bufibou wejei bä lä cui bä nia mölaö buomi. Einaja Yai Bada a cuma.

⁷ Tä ca̦i bejedi cublaliyoma. Jesucristo wama a bejedi lä bufibou wei wamacö lä cuinö, ma nowa lä bluca wei wama ma nofi yai bejedi tabou. Ö̦jo ma cui, a bejedi bufibou lä mlajei bä lä cuinö, ma nofi taboimije. Ma yai waiije. Yai Bada tä a̦ lä cuu weinaja showawä. Abinaja tä a̦ cuu. Maa mabä ja a yafi nia lä i̦tamaö wejei bä lä cuinö, ma wailemaje. Ö̦jö ma cui, ma lä waileno wejei a yafi colo yai lojodoobä ma li cublaliyoma. Einaja tä a̦ cuu.

⁸ Abinaja ca̦i. Bä lä juu wei, maa ma jamö bä mamicö fa difequionö, bä yudubä ma nia blaaö läo. ¿Ö̦jö tawä? Täbä fa yudulunö täbä quebä, ma nia blao. Einaja tä a̦ ca̦i cuu balöo showaoma. Yai Bada tä a̦ juaimije ja, täbä yudulayou. Inaja bä taamamobä bä li cuo waiquioma cudeenö, bä li taamamou.

⁹ Ö̦jö ma cui, cafä wamacö nofi taboyobä wamacö yaia. Bada tä nija bä ojodamobä bä nofi bäyäalewä yaia lä culenaja wamacö cuwä mö feduwä. Cafä wamacö bluca lä cui, wamacö yaibou. Shomi mlai ja, cama Yai Bada wama ecö waiquiwä, a showadi lä dodijaö wei wama tä dablamabä. Tä mö didiobä jamö wamacö jaba ma cuono wei ma cui, cama etä shi̦i yai lä wacacai jamö wamacö tabou majöobä wamacö nacaa taa nomöjölema.

¹⁰ Jaba däjä wamacö nofi tabono ma mlai ma cui, fei däjä Yai Bada tänö wamacö nofi yai tabou majöa lä cule. Wamacö nofi jaba ojodabono ma mlai ma cui, fei däjä wamacö nofi yai ojodabou majöa.

Cama dodijidawä bäma ecö nia cuo fe lä yadio wei tä a̦

¹¹ Iba bämacö lä nofimaö wei wamacö. Ei cafä wamacö ulifibö mlai. Shomi täbä bälöblao cuo lä bädao weinaja wamacö cublao buobä wamacö. Ö̦jö cudeenö, cafä wamacö nija ya wa̦ fe blacäjou. Yanowamö showadi täbä cuaaö bufi lä doblao wei tä ma cule ma cui, ö̦jö tä ja bä noshi ö̦jödao dijä. Wamacö bufi wa̦lidiblou dicoo mlaobä. ¿Ö̦jö tawä? Shomi wamacö malä cui.

¹² Yai Bada tä daö lä mlajei jamö wamacö cuo ja, showadi bä da dodija. Wamacö a̦fa dobloimi ma wäyäö wejei ma cui, wamacö lä dodijaö wei tä nö ö̦jöböaö fe yadiobeje. ¿Ö̦jö tawä? Ya̦cumö Yai Bada tänö täbä bluca jömaö däjä, bä bufi nia möblou. Yai Bada nija wamacö showadi lä bayeliblamono wei tä nia dablaöje. Ö̦jö däjä Yai Bada a wa̦fa nia doblao taöje.

¹³ ¿Ö̦jö tawä? Dodijidawä wamacö cuobä wamacö. Bada tä Jesucristo wama ecö malä cui. Ö̦jö wama ecö yalo, yanowamö jödödöwä bä bada lä läblai bä a̦ dodijidawä da ji̦liaje. ¿Ö̦jö tawä? Bada a bälöo lä dodijio wei wama a wa̦ nia yai juaö.

¹⁴ Bada anö bä lä yädämabou wei bä ma cui, ö̦jö wama bä a̦ nia juaö mö feduo. Bä doblou lä mlai bä nö bleaamabeje, cama a showawänö bä malä shömaö wei, bä lä dodijaö wei bä a̦fa ca̦i dodijaö wäyäbeje. ¿Ö̦jö tawä? Wama bä a̦ ji̦liabä, ö̦jö lä.

¹⁵ Inaja wamacö dodijidawä yai lä bälöo wei tänö, bä bufi dao lä mlai bä a̦ mojodi li ma faö däjä ma cui, wama bä a̦ nia famaimi majöo. Inaja Yai Bada tänö wamacö taamaö bufi doblao malä waiquio wei.

¹⁶ Ö̦jö bä bada lä cui bä nosie bada juamobä wamacö taboimije. Bejedi lä. Wamacö nosiemamou mlai ja, wamacö cuaaö bufi lä doblao weinaja wamacö cuaaö dao lä ma cui, bä da moyaweicu. Abinaja wamacö bufi cuu mlai. “Ja̦o. Ya cuaaö bufi lä doblao weinaja ya cuaabä lä ya waiquiwä cudeenö, ¿wedi tabä ya bä nosie li julei?”, bä bufi cu dijä. Yai Bada wama a nosie juabä wama ecö malä cui. ¿Ö̦jö tawä? Dodijidawä wamacö shino yai cuobä, ö̦jö lä. Yai Bada tänö bä a̦ bada juamaö bufii waiquiwä ja lä, wama bä a̦ nia juaö.

¹⁷ Yanowamö jödödöwä täbä lä cui, wama täbä nofi nia bluca tabou. Jesucristo ebä lä cui, ö̦jö wama ebä nia yai nofimaö. Yai Bada a lä cui, ö̦jö wama a nö nia yai quili taö. Bada a yai bälöo lä dodijio wei a lä cui, wawädowä wama a nofi nia tabou. Inaja wamacö nia shino yai cuaaö.

Cristo bäma a owämabä tä a̦

¹⁸ Bada bä nosie juamobä wama ecö lä cuinö, afä dodijidawä wama bä nofi tabolanö bä a̦ da juaje. Dodijidawä wamacö ca̦i lä cuo wejei bä shino bädawä mlai. Bufi oquewä bä ca̦i lä cuo wejei bä ca̦i bädawä mlai. Wamacö nö lä bleaamaö wejei bä ma cui, dodijidawä wama bä a̦ nia juaö fe yadio.

¹⁹ Dodijidawä wamacö ma cuo däjä ma cui, tä nowa cua mlai ja wamacö nö bleaamaö dicooje ja, bä bufi nö wa̦lojaö fe da yadio. Yai Bada wama a nofi jaducäbolanö wamacö inaja taamamou dicoo ja, bejedi lä wama a bufi nia yai doblamabou.

²⁰ Ö̦jö ma cui, cafä wamacö mayo ja wamacö si yafelimamou dicoo däjä, wamacö wa̦fa nia dodijaö tamoimi. Wamacö jushudou ma mlai ma cui wamacö wa̦fa nia dodijidawä taimi showawä, cafä wamacö mayo malä cui. Ö̦jö ma cui, wamacö lä dodijaö wei tä nowa ja wamacö nö bleaamaöje däjä, wamacö jushudou mlai ja, wamacö bufi yanöcöwä cudio showao fe yadio ja, ö̦jö däjä Yai Bada wama a bufi nia shino yai doblamabou.

²¹ Inaja wamacö cuaabä wamacö. ¿Ö̦jö tawä? Inaja Yai Bada tänö wamacö taamaö bufi fa doblaonö, wamacö malä nacaleno wei. Cristo a ma cui, inaja cama a ca̦i cuaaö malä balöono wei. Cama a doblou lä mlaono wei tä nowa ja mlai, camiyä bämacö doblou lä mlaono wei tä nowa ja a nö yai bleaamamaje. ¿Ö̦jö tawä? Ö̦jö bäma a owämabä lä a waiquiwä, cama a bufi yanöcöwä ca̦i cuo fe lä yadiono weinaja bämacö cuaaö nodiablalobä.

²² Cristo a lä cuaano wei tä nofi mojodubo dijejä. Wa̦lidiwä tä tanomi dodijiwä. A wa̦ ca̦i wa̦lidiwä faö buonomi.

²³ A wa̦fa lä tano wejei däjä, a wa̦ ca̦i lafuo mö feduonomi. A nö ma bleaamano wejei ma cui a wa̦ ca̦i waitelimonomi. Yai Bada a nofi mölabou showao fe yadioma, täbä jömaö lä cadidou wei a lä cui. Ö̦jö a nofi mölabou fe yadioma cudeenö, a nö yuonomi.

²⁴ Cama mayo mlai ja, camiyä bämacö mayo ja a yai shämolayoma. Wa̦lidiwä bäma tä lä tano wei, cama nija tä bluca fa yädäblalunö, fii balitama defi jamö ö̦jö tä ca̦i bluca wa̦lidiwä yauoma. Wa̦lidiwä tä ja bämacö cuo co̦o mlaobä a li inaja cuaama. Nomawä bä yabäcäomi lä culenaja bämacö fa cuonö, tä lä dodijidai tä jamö bämacö shino yai cuo nomöjöobä. Cama a lä dusimalaleno wejei tänö, bämacö bufi malä jalolayono wei.

²⁵ Oweja bä mojodi li mojoluu lä cuaaö weinaja, inaja showawä wamacö mojoluu cuaaö ma balöono wei ma cui, fei däjä wamacö malä co̦alaleno wei. Wamacö lä nowamaö wei a lä cui nija wamacö yai luluamobä, wamacö co̦molayoma.