1 Juan 5 - Biblia Yanowamö

Jesucristo ebä nö wa̦lojaö fe yadiobä tä a̦

¹ “Yai Bada tänö a shömabä a lä yaileno wei, ö̦jö Jesús a waiquiwä”, bä bufi lä cuu wei, Yai Bada bei ijilubö ebä waiquiwä. ¿Ö̦jö tawä? Bä fö̦ö ebä lä nofimaö wejei bä lä cuinö, bä ijilubö ebä ca̦i nofimaö mö feduo malä cujei.

² Yai Bada bäma a nofimaö däjä, tä tamaö lä bufii wei bäma tä a̦ nofi ca̦i cadidibou däjä, ö̦jö däjä cama bäma ebä yai nofimaö cuquei.

³ Yai Bada bäma a nofimaö ja, tä tamaö lä bufii wei bäma tä a̦ nofi nia cadidibou. Bämacö bufi nö modawä bleaaö mlai ja, bämacö nia cadidou.

⁴ Bita jamö bämacö ma yabäcamou wei ma cui, Yai Bada bäma ecö ijilubö nö bluca wa̦lojaö fe yadiobä bämacö malä cui. Jesucristo bäma a nofi lä mölabou wei tänö bämacö nö wa̦lojaö fe yadio.

⁵ ¿Ö̦jö tawä? Bita jamö showadi bämacö ma yabäcamou wei ma cui, Yai Bada bei Ijilubö Jesús bäma e bejedi lä bufii wei, bämacö nö shino yai wa̦lojaö ayaobä bämacö.

⁶ Yai Bada bei Ijilubö a Jesucristo lä cui, yanowamö täbä nijamö a waloqueyoluma. Mau u jamö a fe ojoblamolayoma. A befi ca̦i lä i̦taono wei jamö a i̦yä nö ca̦i beblaloma. ¿Ö̦jö tawä? Mau unö a fe lä ojoblamono wei tä bädawänö mlai, bei i̦yäbö lä falayono wei tä ma cuinö a nö ca̦i ö̦jöböamou waiquiwä.

⁷ Yai Bada tä Bufinö, ö̦jö tä a̦ ca̦i bejedi wäyäö. Tä a̦ lä bejedi wei tä a̦ wäyäbä, ö̦jö Yai Bada tä Bufi malä waiquii.

⁸ Tä a̦ nö bejedi lä ö̦jöböamaö wejei, 3 bä cua. Yai Bada tä Bufinö tä a̦ nö bejedi ö̦jöböamaö. Jesucristo a fe lä ojoblamolayono wei tänö tä a̦ nö bejedi ca̦i dablamaö. A befi ca̦i i̦taobä jamö, i̦yäbö lä falayono wei tänö ca̦i. Ö̦jö lä bä 3 lä cuinö tä a̦fa bejedi taö fe usucuweje.

⁹ Tä a̦fa wäyäbeje jamö, yanowamö täbä nija bämacö ma mölaö wei ma cui, Yai Bada nija lobe bämacö mölabä ö̦jö bei a wa̦ shino yai. Yai Bada a wa̦ nö wäo ja, bä Ijilubö e a̦fa wäyäö cadidou.

¹⁰ ¿Ö̦jö tawä? Yai Bada bei Ijilubö a bejedi lä bufii wejei bä lä cuinö, Yai Bada tänö bä Ijilubö e a̦fa lä wäyäno wei tä a̦ nofi jaducubouje. Yai Bada tä a̦ bejedi bufibou lä mlajei bä lä cuinö, tä a̦no lä waii wejei tänö, Yai Bada bei a jolemou jömaöje. Bä Ijilubö e a̦fa yai ma wäyäö wei ma cui, Yai Bada tä a̦ bejedi bufii malä mlajei.

¹¹ Ba̦limi bämacö cuobä Yai Bada tänö bämalecö lä dobäleno wei tä a̦fa yai wäyämou. Bä Ijilubö bäma a bejedi lä bufii wei tänö bämacö yai ba̦limi cuobä.

¹² Bä Ijilubö e lä tabou wejei bä lä cui, ba̦limi bä li cua waiquia. Yai Bada bei Ijilubö e tabou lä mlajei bä lä cui, bä nia lä ba̦limio wei etä cuami.

¹³ Yai Bada bei Ijilubö wama a bejedi lä bufii wei wamacö bufi jaducublobä, ei ya tä a̦ oni shömaö. Ba̦limi wamacö cua lä waiquile wama tä dabä.

¹⁴ ¿Ö̦jö tawä? Yai Bada nija bämacö nö bayeli nacao däjä, bämacö bufi mölaö ca̦i icuo dao. Yai Bada tänö tä tamaö lä bufii wei tä ja bämacö yädäo bufi doblao yalo, bämacö nö bayeli nacao lä bädao wei tä ma cui ja, bämalecö a̦ nia ji̦liaö.

¹⁵ Bämacö nacou däjä showadi bämalecö a̦ ji̦liaö yalo, bämacö mölaö showalanö bämacö nacou. Bämacö nö bayeli nacao däjä, bämalecö nia lä dobäö wei bäma tä daö showadao.

¹⁶ Aifä a lä cuinö, wa̦lidiwä wama tä taö dablaö ja, Yai Bada nija wamacö nia nacou. Tä wa̦lidiwä wayu lä mlai tä shino taö ja, Yai Bada tänö wamacö a̦ nia juaö, a demi cudiobä. Tä yai lä wayu wei tä taö dicoo ja, a nomabä, ö̦jö a waiquiwä. “Ö̦jö tä lä taö wejei bä lä cui, wama bä nö bayeli nacabä”, bämacö nowa taimi.

¹⁷ Wa̦lidiwä tä bluca lä tamou wei tä wa̦lidiwä waiquiwä ma cui, tä wayu lä mlai tänö täbä nomaimi.

¹⁸ Yai Bada bei ijilubö ebänö wa̦lidiwä tä taö fe yadibloimije. Ö̦jö bäma tä daö. Yai Bada bei Ijilubö Jesucristo e lä cuinö bä nowamaö. Fecula bada a yai wa̦lidiwä lä cuinö, ö̦jö lä bä juliimi.

¹⁹ Camiyä Yai Bada bei ijilubö bäma ecö waiquiwä ma cui, a yai lä wa̦lidii a lä cuinö, yanowamö täbä bluca tabou dicoa. Ö̦jö bäma tä ca̦i daö.

²⁰ Yai Bada a lä cui, ö̦jö a shino yai bejedimou. Ö̦jö bäma a dabä, bei Ijilubö e fa itoliyonö bämalecö bufi jaducumabou lä cule. Bä Ijilubö Jesucristo nija bämacö cua lä cule, a yai lä bejedi wei a lä cui nija. A bufiblamobä ö̦jö a shino yai bejedi cua ayaa. Ba̦limi bämacö cuobä, ö̦jö a waiquiwä.

²¹ Ijilu bä. Täbä nö idubö lä bufiblaö wejei täbä ja, bä bufi yabäcamo dijä.