1 Juan 4 - Biblia Yanowamö

Täbä bejedimou lä wabaö wejei tä a̦

¹ Iba wamacö. Yai Bada tä Bufi jo̦wa lä tabou wejei bä lä cui, bä a̦ bejedi bufii showadao dijejä. Wama bä bejedi möö ja, bä a̦ ji̦liaö da balöoje, Yai Bada wama ebä nö ö̦jöböabä. Yanowamö täbä lä bälöblai bä yömölabeje, Yai Bada a wa̦no jole jole wäyälewä bluca bä a̦ ca̦i juaö malä cudujei.

² Wama bä a̦ fa ji̦lilänö, Yai Bada wama a Bufi nö nia ö̦jöböaö. ¿Ö̦jö tawä? “Yai Bada tänö a shömabä, Jesucristo a yailema. A yanowamöblaleyoluma.” Einaja bä cuu lä wawädoo wei, ö̦jö lä Yai Bada ebä waiquiwä.

³ Ö̦jö ma cui, “Ma, Yai Bada tänö a shömabä a lä yaileno wei a lä cui, Jesús ö̦jö lä ami”, bä lä cuu wei, Yai Bada ebämi. Yai Bada tä Bufi tabou mlajei, Jesucristo a nofi yai lä wa̦libou wei etä a̦ shino tabouje. Ö̦jö lä a nia jo̦wa lä waloono wei etä a̦ cublawä waiquiwä.

⁴ Ijilu bä. Yai Bada wama ecö waiquiwä. Yai Bada a wa̦no jole jole wäyälewä bä lä cui bä nija wamacö nö wa̦lojoblou waiquilayoma. Bita jamö bä lä cublai bä nija, fecula bada a nö wa̦lojaö ma cule, Yai Bada wama a Bufi lä bälömabole a nö shino yai wa̦lojaö ayawä malä cui.

⁵ Yai Bada a wa̦no jole jole wäyälewä bä lä cui, yanowamö showadi täbä lä cuaaö weinaja bä cuaaö mö feduo yalo, cama yanowamö tä a̦ li tabouje. Ö̦jö tä a̦ tabouje yalo, yanowamö täbänö bä a̦ shino ji̦liaö bufi doblaoje.

⁶ Camiyä bämacö mö feduwä lä cui, Yai Bada bei bäma ecö li. Yai Bada tä lä daö wejei bänö bämalecö a̦ ji̦liaö bufi doblaoje. Yai Bada ebä lä mlai bänö bämalecö a̦ ji̦lii bufiomije. Ö̦jö lä tänö Yai Bada tä Bufi lä tabou wejei bäma bä nö ö̦jöböaö. Bä lä jolemou wei bä ca̦i.

Yai Bada tänö täbä bluca lä nofimaö wei tä a̦

⁷ Iba wamacö. Bämacö yai da nofimayo, ö̦jö lä. Nofimou tä lä cui, ö̦jö Yai Bada etä waiquiwä malä cui. Täbä yai lä nofimaö wejei bä lä cui, ö̦jö Yai Bada bei ijilubö ebä waiquiwä. Ö̦jö bänö a ca̦i daöje.

⁸ Bä nofimaö lä mlajei bänö Yai Bada bei a daimije. Nofimou tä lä cui, ö̦jö Yai Bada bei etä waiquiwä malä cui.

⁹ Yai Bada tänö bä Ijilubö moli e lä cui, bita jamö a shömöledayoma, cama nija bämacö ba̦limi cuobä. Ö̦jö tänö, bämalecö yai lä nofimaö wei tä damalalema.

¹⁰ ¿Ö̦jö tawä? Camiyä Yai Bada nija bämacö nofimou dobloimi dicowä. Camanö bämalecö lä nofimaö wei bäma tä dablaö däjä, nofimou tä lä cui bei bäma tä shino yai dalalei. Bä Ijilubö e shämou läobä a malä shömöleno wei, wa̦lidiwä bäma tä lä taö wei tä nowa bluca mladamabä.

¹¹ Iba wamacö. Inaja Yai Bada tänö bämalecö nofimaö waiquia yalo, bämacö nofimayou mö da feduo.

¹² Yanowamö bämacö lä cuinö, Yai Bada bäma a dablaö daomi. Ö̦jö ma cui bämacö nofimayou ja, camiyä bämacö nija tä nia yanöcöwä cudio. Tä yanöcöwä fa cudionö, camanö täbä yai nofimaö lä culenaja, inaja showawä bäma täbä nia nofimaö cuo mö feduo.

¹³ Camiyä bämacö nija Yai Bada tä Bufi jöbömobema yalo, a yanöcöwä lä cudio wei bäma tä daö. Cama nija bämacö yanöcöwä cudia mö lä fedule tä ca̦i.

¹⁴ Yanowamö täbä jucäabä, bämacö lä Fö̦ömou wei a lä cuinö, bä Ijilubö e shömölema. Yama a möma. Yama a wa̦fa bejedi ca̦i wäyäö.

¹⁵ Yai Bada bei Ijilubö Jesús e a̦fa lä wäyäö wejei bä lä cui bä nija, Yai Bada tä yanöcöwä cudia. Yai Bada nija ö̦jö lä bä yanöcöwä cua mö fedua.

¹⁶ ¿Ö̦jö tawä? Yai Bada tänö bämalecö lä nofimaö wei bäma tä daö. Ö̦jö tä ja bämacö mölaö. Bufi nofio tä lä cui, ö̦jö lä Yai Bada etä waiquiwä. Täbä showadi lä nofimaö wejei bä lä cui, Yai Bada nija bä yanöcöwä cua. Inaja showawä, cama bä nija Yai Bada tä yanöcöwä cuo mö feduo.

¹⁷ Yai Bada tänö täbä nofimaö lä culenaja bäma bä nofimaö cuo mö feduobä bämalecö shino bayelibou, täbä bluca jömabä jamö, bämacö bufi mölaö ca̦i icuobä. Bita jamö Jesús a lä cuono wei däjä, bä Fö̦ö e nija a lä cuono weinaja camiyä bämacö cua mö fedua cudeenö, quilii mlai ja bämacö icuo.

¹⁸ “Bejedi lä, Yai Bada tänö wale nofimaö”, bä nofi lä tamamou wei bä lä cui bä quiliimi. Bä nofimamou lä dodijio wei tänö quilii tä mladamalei. Bä bufi lä quilii wei bä lä cui, “Ya doblou lä mlai tä nowa ja wale nö nia bleaamaö”, bä nofi li tamamou cudeenö bä li quilii. Yai Bada tänö bä lä nofimaö wei tä ja, bä yai mölaimi. ¿Ö̦jö tawä?

¹⁹ Yai Bada tänö bämalecö nofimaö balöoma yalo, cama bäma a nofimaö nomöjöa, cama ebä ma cui, ö̦jö lä bäma bä ca̦i bluca nofimaö.

²⁰ “Yai Bada ya nofimaö”, bä cuu ma cui, cama ai ebä nofi wa̦libou dicooje ja, bä jolemou waiquiwä. Cama ai ebä ma dablou wei ma cui, ö̦jö lä ebä nofimaimi waiquiweje ja, Yai Bada tä dablamou lä mlai bei tä nofimaimi yaiweje.

²¹ Camiyä bämacö nija, Yai Bada tänö ei tä lä cui tä nabä yai shömaö, Yai Bada bäma a lä nofimaö wei bämacönö, aiyä bäma bä ca̦i nofimaö mö feduobä.