1 Juan 1 - Biblia Yanowamö

Ba̦limiblamamodima tä a̦fa lä wäyäno wei tä a̦

¹ Jaba tä a̦ cuo showao lä balöono wei a lä cui, ö̦jö ya wa̦fa wäyäbä ya tä a̦ oniblaö lä cule, täbä lä ba̦limiblamaö wei a lä cui. ¿Ö̦jö tawä? Yama a wa̦ ji̦lii cublelei. Bei yamacö mamocunö yama a ca̦i möö cublelei. Bei yamacö imicönö yama a ca̦i jubaö cublelei.

² Ba̦limi täbä lä tablamaö wei a lä cui, Yai Bada tänö a fa yanowamöblamalönö, yama a möma. Ö̦jö lä bei yama a wa̦fa wäyäö. Ba̦limi täbä lä tablamaö wei a lä cui, bä Fö̦ö e nija a ba̦limi cuo showao balöoma. Cafä wamacö nija, ö̦jö yama a wa̦fa wäyäö, camiyä yamacö nija a lä damalaleno wei a showawä lä cui.

³ Yama a lä möno wei, yama a wa̦ ca̦i lä ji̦lino wei, cafä wamacö nija yama a wa̦fa wäyäö, cafä sho bämacö nofi bluca tamayobä. Bämacö lä Fö̦ömou wei a sho, bä Ijilubö Jesucristo e ca̦i sho, bämacö nofi bluca tamayobä.

⁴ ¿Ö̦jö tawä? Cafä wamacö nija yama tä a̦ wäyäö lä cule, bämacö bufi bluca yai doblalou fe balojoobä.

Yai Bada tä shi̦i a̦fa wacacawä lä wäyäno wei tä a̦

⁵ Jesús nija yama tä a̦ lä ji̦lileno wei tä a̦ lä cui, cafä wamacö nija ei yama tä a̦ wäyäö nomöjöa lä cule. Tä shi̦i lä wacacai, ö̦jö lä Yai Bada bei tä waiquiwä. Cama nija wiisibö ma cui tä mö ca̦i wai didi cuami.

⁶ Mö didi tä jamö bämacö cua showalanö, ö̦jö sho bämacö nofi a̦fa tamayou ma wäyämou wei ma cui, bämacö jolemou waiquiwä. Bejedi tä lä cule jamö bämacö cuami.

⁷ Ö̦jö ma cui, tä shi̦i lä wacacai jamö cama Yai Bada tä lä culenaja, ö̦jamö bämacö cudia mö fedua ja, dodijidawä bämacö nofi nia yai shino tamayou. Ö̦jö däjä Yai Bada bei Ijilubö Jesús i̦yäbönö, wa̦lidiwä bäma tä lä taö wei tä bluca ja, bämacö aublou co̦layou.

⁸ “Iba tä cuami”, bämacö cuu ja, camiyä bämacö mölamamou bädaquei. Bejedi tä a̦ lä cui bäma tä a̦ taboimi.

⁹ Wa̦lidiwä bäma tä lä taö wei, Yai Bada nija bäma tä a̦fa wäaö ja, tä nowa nia mladamaö. Bämalecö nia aublaö co̦o. A wa̦ malä cadidou wei. Ö̦jö lä showadi a shino dodijaö.

¹⁰ “Ma, wa̦lidiwä ya tä tanomi”, bämacö cuu dicoo ja, Yai Bada bei bäma a wa̦fa jole taö dicoo. Cama bäma etä a̦ taboimi waiquiwä.