1 Corintios 9 - Biblia Yanowamö

Pablo a nofi lä bäyäono wei tä a̦

¹ Shomi täbä lija ya nosiemamobä yami. Jesucristonö wale lä shimöleno wei, ö̦jö ya. Camiyä bei ya mamocunö Bada tä Jesús ya malä möno wei. Camiyä bei ya wa̦nö, ö̦jö Bada wama tä malä bufiblaleno wei.

² “Jesucristonö wa shimano mlaicätä”, ai täbänö wale nofi ma tabou wejei ma cui, cafä wamacö lä cuinö, inaja wamale nofi tabobä wamacömi. Jesucristo lija wamacö bufi cuquema yalo, ö̦jönö wale lä shimöleno wei wamale daö waiquiwä.

³ Ya lä cuaaö wei tä ja wale wa̦liije däjä, abenaja ya shi̦lo cuu talei.

⁴ “Yama täbä lä yömölaö wei täbä lija, ¿yamacö nö liyobä yamacömi daanö?

⁵ Camiyä yamacönö ¿suwä yama bä lulubobä tä cuaami daanö?”, ya cuu. Jesucristonö bä lä shimöleno wei ai bä mö feduwä lä cuinö, bä suwäbö bä ca̦i malä fuu wejei. Inaja showawä, Bada tä Jesucristo bä fääshä ebä ma cuinö, Pedro a ma cuinö, bä suwäbö bä ca̦i fuu mö malä feduo wejei.

⁶ Ai täbä no mlai ja ma iyamaö wejei ma cui, ¿wedi tabä Benabei sho yafäcö fa ojodamonö yafä täbä nii nowa co̦wa ayamaquei?

⁷ Täbä lä bulaö wejei, ¡täbä nofi lä iyamaö wejei! ¿Ö̦jö tawä? Täbä ficalimobä ja täbä lä yädäo wei täbä nö ca̦i malä liyamaö wejei. ¿Ö̦jö tawä? Oweja bä lä nowamaö wejei, ö̦jö täbä yalo showawä ja täbä ca̦i malä dodijou wei.

⁸ Yanowamö täbä a̦ bädawänö ya wa̦ faimi. Yedu ja Yai Bada etä a̦ oni cuo malä balöono wei.

⁹ Yalo bä lä ojodamomano wejei jamö, täbä nö yalo ofili bleaaö mlaobä, Moisesi lija tä a̦ oniblamalema. Abenaja tä a̦ oni cuu. Nii wa si̦cosi lo̦shiblamabä, yalo bä lija wa si̦cosi cablushamabä jamö bä iyaö mlaobä, wa bä fi̦yoca nia o̦caimi. Einaja tä a̦ cuu. Yalo bä lä ojodamomano wejei jamö bä nö yalo ofili bleaamaö mlaobeje, tä a̦ oniblamalema. Ö̦jö ma cui, ¿wedinaja wamacö bufi li cuu? ¿Yalo a nofi ofili jalubou fa ayaonö tä a̦ li cuoma daanö?

¹⁰ Mlaicätä. Camiyä bämacö befi tä a̦ malä cui. Ö̦jö tä a̦ ja bämacö bufi li yai jaducäblobä tä a̦ li. Ficali täca ja täbä jaba lä queo wei täbä ma cui, bä nii ya̦cumö lä taö wejei täbä ma cui, nii bä bufibolajenö täbä bluca ojodamobä lä tä a̦.

¹¹ Inaja lä showawä, cafä wamacö lijamö yamacö ojodamoma yalo, cafä wamacö lija yamacö bayeliblamobä yamacö waiquiwä. Yai Bada etä a̦ ja bämacö bufi lä jaducäblamaleno wei tä nowa ja, yamalecö bayeliblaö mö feduobä.

¹² Yai Bada etä a̦ ja, ai täbänö wamacö yömölaö mö walooje däjä, wama täbä bayeliblaö malä cui. ¿Ö̦jö tawä? Ö̦jö wama bä bayeliblaö lä cuaaö weinaja, camiyä yamacö lä cui yamacö bayeliblamobä bei yamacö yaiwä. ¿Ö̦jö tawä? Yamalecö bayeliblabä tä ma cule ma cui yamacö a̦ fanomi, wamacö fa jushudalunö wamalecö a̦ ji̦liaö mladou dicolo. Cristo yama tä a̦ wäyäö bufi fa doblaonö, dodijidawä wama etä a̦ ji̦liabä, wamicai yamacö nö bleaaö bädao.

¹³ ¿Wama tä daimi tawä? Judio bada täbä lä cui, Yai Bada etä yafi jamö täbä lä ojodamou wei, ö̦jamö lä showawä täbä nö malä liyo wei. Yalo bä lä dodobou wejei bä lä cui, ö̦jö bä yalo showawä ja täbä nö ca̦i malä liyo wei.

¹⁴ Bada tä Jesucristonö, inaja showawä täbä taamaö bufima. Cama dodijidawä etä a̦ lä wäyäö wejei täbä bayeliblamaö bufima.

¹⁵ Ö̦jö ma cui, yamale dobäbä tä cua ma cule, yamacö a̦ faimi. Ei ya wa̦ ma cui ya nacoimi. No mlai ja ya tä a̦ shi̦lo wäyäö bufi doblao. “Yai Bada etä a̦ lä wäyäno wei tä nowa nacaö dicooma”, bä cuu mlaobä ya nacoimi. Ya ofili ma nomaö wei ma cui ya nacou mlaicätä.

¹⁶ Jesucristo dodijidawä ya tä a̦ wäyäö tä nowa ja, ya dodijaö jimöobä tä cuami. Ya tä a̦ wäyäbä ya waiquiwä malä cui. Ya tä a̦ wäyäimi dicoo ja ya nö bleaaö cuquei.

¹⁷ Camiyänö ya täbä yömölaö bufi doblao fa buonö ya ojodamou fa cunoja, ya dobämou lä mlai tä ja, ya bufi nö ma jalujobö wei ma cui, inaja tä cuonomi. Jesucristo ya tä a̦ wäyäbä, Yai Bada lija ya yaimoa cadidilayoma. Wale yaia cadidilema cudeenö, ya dobämou ma mlai ma cui, ya noshi umlaobä tä cuami. Wale malä yaileno wei.

¹⁸ ¿Ö̦jö tawä? ¿Wedi tä ja ya tä a̦ li wäyäö bufi doblao? Wedi tä ja mlai. Ya bä lä yömölaö wei bä lija ya nacobä tä cua ma cule, no mlai ja Jesucristo ya tä a̦ dodijidawä lä däamaö wei tänö, ya bufi doblalou waiquiwä.

Bä bufi jaducäblamaö fe lä yadiono wei tä a̦

¹⁹ Yanowamö täbä lija ya nosiemamobä ya ma mlai lä ma cui, Yai Bada lija ya bä fucäamabä, wale taamaö bufi lä doblao wejei tä ja, bluca täbä lija ya ojodao talei. Inaja ya cuaaö talei.

²⁰ Judio täbä lä cui ya täbä bufi jaducäblamabä, dodijidawä ya bä ca̦i cuoma. Ya bä jushuamaö mlaobä, cama judio showadi bä lä cuaaö weinaja ya cuaaö naleoma. Inaja showawä, Moisesi tä a̦ nofi lä yaibou wejei ya täbä bufi jaducäblamabä, dodijidawä ö̦jö ya bä ca̦i cuo mö feduoma. Moisesi tä a̦ ja ya nosiemamobä ya mlai ma cui, jai ya nosiemamobä ya ojodao cuoma. Dodijidawä wale a̦ ji̦liabeje, ya täbä jushuamaö bufionomi.

²¹ Judio bä lä mlai ya täbä bufi jaducäblamabä, dodijidawä ö̦jö ya bä ca̦i cuo mö feduoma. Judio showadi bä lä cuaaö weinaja ya cuaaö mlalaliyoma. Ö̦jö ma cui, Yai Bada ya wa̦ cadidibou showao fe yadioma. Cristo ya nosie fuaö dodijidaoma, Yai Bada etä a̦ ji̦liabeje.

²² Bä bufi lä quilijou wei ya bä bufi jaducäblamabä, dodijidawä ö̦jö ya bä ca̦i cuo mö feduoma. Cama bä bufi lä quilino wei tä ja, bei ya bufi ca̦i wasömou showaoma, ö̦jö ya bä bufi ca̦i jaducäblamabä. Yanowamö ya bä yömölaö bufi lä doblao wei däjä, cama bä lä cuaaö weinaja ya ca̦i cuaaö mö fa feduonö, dodijidawä tä a̦ ji̦liaöje. Inaja ya cuaaö lä majöablalou wei tänö, Jesucristo a nofi lä mölabou wejei däjä ai ya bä fucäamaö fe yadio wä.

²³ Jesucristo dodijidawä tä a̦ ji̦limamou blaucofälöbä inaja ya cuaaö talei. Bä bufi fa jaducäblalunö, Yai Bada lija bä lä bayeliblamou wei tä ja, ya bufi ca̦i doblalou mö feduobä.

Pablo a noshi lä umlaono wei tä a̦

²⁴ Täbä lobe lä wabayou wei wama tä daö. Täbä wabayou däjä, täbä bluca nö wa̦lojodou ma cui, ai moli a nö yai wa̦lojaö lä dodijio wei a nia dobämou ayao. A nö wa̦lojaö lä ayao wei a lija, a dodijaö jimabeje etä nia shi̦lo yojoqueije. Inaja showawä, Yai Bada tänö cama ebä lä dodijaö wei bä nia ca̦i dobäö. ¿Ö̦jö tawä? Ö̦jö lija wamacö dobämou mö feduobä, bä bufi nö ca̦i da wa̦lojolö.

²⁵ Bä wabayou bufi lä doblao wei bä nö nia wa̦lojaö fa ayaonö, täbä lä ujudamaö wei tä ja, täbä noshi umlao si ijejewä. Yanowamö täbä lija bä nia fa dobämonö, bä noshi umlao. Tä nowa cudio ma mlai lä tä ma cui ja, bä fe nia fa yojoonö bä wasömou. Camiyä bämacö lä cui, Yai Bada lija ba̦limi tä ja bämacö dobämobä, bei bämacö yai wasömou yaiobä.

²⁶ Ö̦jö lija ya wa̦fa nö wa̦lojaö tamobä, ya dodijaö macocafälöö. Yai Bada lija bejedi ya ojodamou. Jole jole täbä imicö bushi yalejedou bädao malä mlai.

²⁷ Camiyä ya cuaaö bufi doblao lä bädao wei tä ja, ya cuaaö mlai ja, Yai Bada lija ya bufi taamamou cadidiobä. Ya noshi umlao, ai ya bä cadidamaö ma balöono wei ma cui, ya dobloimi majöa fa dicoicunö, Yai Bada tänö wale casöblamaö majöo mlaobä.