1 Corintios 7 - Biblia Yanowamö

Täbä lä doayou wei tä a̦

¹ Oni si ja yamale lä wa̦lino wei tä ja, bämacö yömölaö majöa lä cule. Awei, suwä bä däaimije ja, tä dodijidawä waiquiwä.

² Tä dodijidawä ma cui abenaja ya bufi cuu. Täbä nofi jushublalou mlaobä, wa̦lo bänö cama ebä nia suwä tabou cadidioje. Suwä bänö cama bä fe̦yalobö bä nia ca̦i cadidiwä tabou mö feduoje, ¿ö̦jö tawä?

³ Bä fe̦yalobö lija suwä a noshi ö̦jödaobä a. Bä suwäbö ma cui lija a noshi ca̦i wa̦lo ö̦jödao mö feduobä.

⁴ Cäcöbä malä doayolayono wei. Bä fe̦yalobö e li waiquiwä cudeenö, a noshi suwä umlaobä a malä mlai. Bä suwäbö e li waiquiwä cudeenö, a noshi wa̦lo umlaobä a ca̦i malä mlai.

⁵ Wamacö noshi umlao mlai. Cuwi, abenaja wamacö shi̦lo cuaaö dao. Yai Bada lija cäcöbä nö bayeli nacaodibä, cäcöbä yanöcöo bufi doblao ja, cäcöbä noshi moli umladobä. Ö̦jö ma cui cäcöbä nö dedeaö mlai ja cäcöbä yacao co̦obä, ai a lä beshi wei däjä fecula badanö a yaclämaö mlaobä.

⁶ ¿Ö̦jö tawä? Bämacö nosiemaö cadidiwä ma mlai ma cui, inaja wamacö cuaaö bufi doblao ja, “Inaja waiquiwä”, ya cudaliyo.

⁷ Camiyä ya shi̦loco lä culenaja täbä bluca cuo mö feduo fa cunoja, ya bufi nö yai doblaobö wei ma cui, Yai Bada tänö inaja bämalecö bluca taamaimi. Ö̦jö ma cui bämalecö bufi bluca bayeliblaö. Bä lä shi̦loco wei bä lä cui, dodijidawä bä cuobä bä bayeliblaö. Bä shi̦loco lä mlai, dodijidawä bä cuo mö feduobä bä ca̦i bayeliblaö mö feduo.

⁸ Täbä lä shi̦loco wei täbä lija, täbä lä yamiblaliyono wei täbä ca̦i lija, abenaja ya cuu talei. “Camiyä ya shi̦loco lä culenaja wamacö shi̦loco cuo mö feduo ja, tä yai dodijidawä”, ya cuu talei.

⁹ Ö̦jö ma cui täbä bufi wasöo daomi ja, bä suwäbö e däabeje, bä fe̦yalobö e däabeje. Shomi täbä lija täbä yabäcäo mlaobä bei ya wa̦.

Bä bou lä waiquilajei bä joyaö lä wasöö wei tä a̦

¹⁰ Täbä suwäbö ca̦i lä cule, täbä fe̦yalobö ca̦i lä cule, ya täbä yömölaö nomöjöo. Bada tä Jesucristo ya tä a̦ fe dolemaö lä cule. Suwä anö bä fe̦yalobö e nia joyaimi.

¹¹ Culenaja a joyaö fe yadio ja, shi̦loco a nia cuo. A shi̦loco cuo bufiomi ja, bä fe̦yalobö lija a nia cuo co̦o. Bä fe̦yalobö a ma cuinö, bä suwäbö a ca̦i nia joyaimi.

¹² Ai wamacö lija ya wa̦ faö nomöjöa lä cule. Bada tä Jesucristo ya wa̦no wäyäö mlai, camiyä ya wa̦ li. Ai wa suwäbö lä cuinö, Jesucristo etä a̦ bejedi bufibou ma mlai ma cui, cafä lija a cuo bufi doblao ja wa joyaö mlai.

¹³ Ai wa fe̦yalobö lä cuinö, inaja showawä. Jesucristo bufilewä a ma mlai ma cui, cafä lija a cuo bufi doblao ja wa joyaö mlai.

¹⁴ Abenaja tä malä cule. Wa̦lo ai a lä cui, Jesucristo bufilewä a ma mlai ma cui, bä suwäbönö tä a̦ nofi shi̦lo bejedi tabou ayawä. Ö̦jö a suwä lä cui, Yai Bada e li yalo, bä fe̦yalobö a ca̦i yaibou mö fedua. Inaja showawä suwä a lä cuinö, Yai Bada etä a̦ bejedi bufibou ma mlai ma cui, bä fe̦yalobönö tä a̦ nofi shi̦lo bejedi tabou ayawä. Ö̦jö a wa̦lo lä cui, Yai Bada e li yalo, bä suwäbö a ca̦i yaibou mö fedua. Inaja tä cuo mlao fa cunoja, Yai Bada tänö ijilufä bä nö blajamabobö wei ma cui, täbä li yaibou mö fedua malä cui.

¹⁵ Ö̦jö ma cui Yai Bada etä a̦ bejedi bufibou lä mlai a cuo bufiomi ja, a lä bole a joyaö bufi doblao waiquiwä ja, a fubä. Inaja a cuaaö dicoo ja, a lä damole a wa̦ fe blacäjou mlai. Wamicai bämacö bälöobä Yai Bada tänö bämalecö malä nacano wei.

¹⁶ Ö̦jö ma cui, a ca̦i cuo fe yadio showao ja, suwä anö Jesucristo a nofi mölabou ma ayale ma cui, bä fe̦yalobö enö tä a̦ nofi obi bejedi tabou ja̦toquei. A fucäamou ja̦too fa cui. Wa̦lo anö Jesucristo a nofi ca̦i mölabou ma ayale ma cui, bä suwäbö enö tä a̦ nofi obi bejedi tabou ja̦toquei. Ö̦jö a ca̦i fucäamou ja̦too fa cui.

Täbä bufi nofi jushublao lä wasöö wei tä a̦

¹⁷ Ö̦jö ma cui, Jesucristo ebä lä yododoblai jamö, abenaja ya bä nowa bluca taö talei. Bada tänö bämalecö jaba tabou lä cuono weinaja bämacö yanöcöwä cudiobä. Bämalecö bufi lä jaducäblamaleno wei däjä, bämacö cuo lä waiquiono weinaja bämacö cudio showaobä. Inaja bämacö culanö, cama tä lija bämacö fa bayeliblamonö bämacö dodijabä.

¹⁸ Yai Bada tänö wa bufi lä jaducäblamaleno wei däjä, judio bä mosi sicö joyamou lä cuaaö weinaja wa taamamou waiquioma tä nowa ja, a bufi jalujo dijä. Inaja showawä, wa mosi sicö joyamonomi waiquiwä ja, sicö joyamou bufio dijä.

¹⁹ Täbä mosi sicö lä joyamou wei tänö täbä bayelibloimi. Sicö joyamou lä mlai tä ma cuinö, ö̦jö tänö täbä ca̦i bayelibloimi mö feduwä. Yai Bada a nosie lä fuaö wejei tänö täbä shi̦lo bayeliblou.

²⁰ Yai Bada tänö täbä lä nacano wei däjä, täbä cuo lä waiquiono weinaja täbä cadidiwä cuo showaobä.

²¹ ¿Ö̦jö tawä? Wa lä nacano wei däjä wa bä nosie fuabä wa tabou waiquiomaje ja, a nofi fujeblamou fo̦lijio dijä. Ö̦jö ma cui, wa lä tabou wejei bä lä cuinö wa fujeblaö ojodaoje ja, a yai da fujeblamolu.

²² Bä nosie fuamobä wa lä tabou wejei wa lä cui, Bada tä lija wa bufi cuo ja, jai wa fujemoa waiquilayoma Bada tänö wa nofi tabou. Jesucristo lija wa bufi cuobä wa bufi malä fujeblamono wei. Inaja showawä, bä nosie fuamobä wa tabou lä mlajei wa lä cui, shomi täbä lija wa ojodamou ma mlai ma cui, Jesucristo lija wa bufi cuo ja, cama Jesucristo lija wa yai ojodamobä wa tabou malä cui.

²³ Jesucristonö wamacö nowa co̦maquema. Ö̦jö cudeenö, yanowamö täbä a̦ fuamobä wamacö tabobeje wamacömi. Jesucristo wama a nosie shi̦lo yai fuabä wamacö waiquiwä.

²⁴ ¿Ö̦jö tawä, iba wamacö? Wamacö lä nacano wei däjä wamacö cuo lä waiquiono weinaja, wamacö cuo showaobä. Yai Bada tänö wamacö ca̦i malä cule.

Täbä yabäcäblou nofi lä jalujubou wei tä a̦

²⁵ Bei. Täbä lä shi̦loco wei täbä ja, wamale lä wa̦lino wei tä ja, ya wa̦ faö nomöjöa lä cule. Bada tä Jesucristonö ei tä a̦fa cadidiwä tano ma mlai ma cui, wamale a̦ nofi mölabobä ya. Yai Bada tänö wale nofi ojodabou yalo, yale a̦ malä bayeliblaö wei.

²⁶ Täbä lä shi̦loco wei, inaja täbä shi̦loco cuobä, ya bufi cuu. Bämalecö lä tamalajei tä cua yaia cudeenö, fei tä lä cui däjä, suwä bä doamobä tä malä mlai.

²⁷ Suwä wa bou waiquiwä ja, a shi̦loco cuo co̦o bufio dijä. Wa shi̦loco waiquiwä ja, suwä a ajedamaö bufio dijä.

²⁸ Ö̦jö ma cui, suwä wa däaö ja, tä wa̦lidiwämi. Inaja showawä, suwänö bä fe̦yalobö a däaö ja, tä ca̦i wa̦lidiwämi. Tä wa̦lidiwä ma mlai ma cui, täbä lä doayou wei showadi täbä shi̦lo yabäcäblou majöo dicoo. Bämacö yabäcäblou nofi jalujubou yalo ya wa̦.

²⁹ ¿Ö̦jö tawä, iba wamacö? Abenaja ya cuu. Yai Bada lija bämacö ojodamobä tä nö nia dedejebloimi waiquiwä. Shi̦loco täbä yabäcou mlai ja, täbä ojodamou cadidiwä lä culenaja, täbä suwäbö lä cule täbä ca̦i cuaaö mö feduobä.

³⁰ Inaja showawä, täbä bufi lä lofote wei täbä dodijidawä ojodamou lä cuaaö weinaja, ai täbä bufi ma ujudi wei ma cui täbä ca̦i ojodamou cuo mö feduobä. Täbä bufi shi jalijiwä lä mlai täbä dodijidawä ojodamou lä cuaaö weinaja, täbä shi ma jalimou wei ma cui täbä ca̦i ojodamou cuo mö feduobä. Madofi bä ja täbä yabäcou lä mlai täbä ojodamou dodijidawä lä culenaja, madofi täbä ma doaö wejei ma cui täbä ca̦i cuo mö feduobä.

³¹ Täbä ma cuaablalou wei ma cui, Yai Bada lija täbä bufi yai macocoo shalilio showaobä. Bluca tä lä cule tä malä mlaaimadi.

Bä bufi majöablalou lä wasöno wei tä a̦

³² Wamacö yabäcou mlai ja, bämacö taamaö bufi doblaa lä cule. A wa̦lo lä shi̦loco wei, Bada a lija dodijidawä a ojodamou. Bada a bufi nia fa doblalamanö a cadidou ma cui,

³³ bä suwäbö a ca̦i lä culenö, bä suwäbö a bufi doblalamabä a shi̦lo yabäcou, showadi bämacö lä yabäcäablalou weinaja showawä.

³⁴ A bufi majöablalou. Suwä bä ma cui, inaja bä ca̦i cuaaö mö feduo. Suwä moco a ma cui, bada waiquiwä a ma cui, a shi̦loco cuo däjä, Bada tä bufi doblalamabä a noshi umlao. Bei bufi ma cui, bei a ma cui, a wasöo. Bä fe̦yalobö e ca̦i lä cui, inaja a cuaaimi. Bä fe̦yalobö e ca̦i lä cui, showadi täbä yanowamö lä yabäcäablalou wei tä ja, a yabäcou dicoo, bä fe̦yalobö e bufi nia fa doblalamanö.

³⁵ Bämacö dodijamaö bufi doblao yalo ya wa̦. Bämacö yabäcamaö bufiomi. Wamacö bufi shedecou mlai ja, Bada tä lija doblao wamacö ojodamobä, bämacö yömölaö lä cule.

³⁶ ¿Ö̦jö tawä? “Ya ma suwäbömou wei ma cui, ¿wedi tabä ya li shi̦loco taamabou dicoo?”, ai a bufi cuu ja, a däabä, ö̦jö lä. A bufi nö wasöobimi ja, bä suwäbö a däaö bufi doblao ja, a däabä. Cäcöbä doayou ja tä wa̦lidiwämi.

³⁷ Ö̦jö ma cui, bufi cadidilanö a shi̦loco cuo bufi doblao waiquiwä ja, a bufi wasömou dao waiquiwä ja, a däa dijä. A casimabobä. Tä dodijidawä waiquiwä.

³⁸ Ö̦jö tawä? Ai anö, bä suwäbö a ma däaö wei a dodijaö. Ai a mö feduwä lä cuinö, bä suwäbö a däaö ma mlai ma cui, a ca̦i dodijaö. Ö̦jö bei a yai dodijaö yaio.

³⁹ Bä fe̦yalobö e demi showao däjä, ö̦ja bä suwäbö e shi̦lo cudiobä. Bä fe̦yalobö e mladou ja, ai a wa̦lo däaö bufi doblao ja, a däaö majöobä. Culenaja Bada tä lä daö wei a lija a shi̦lo ajedobä.

⁴⁰ Ö̦jö ma cui, a yamiblou däjä a yami cudio ja, a bufi nia shi̦lo doblao, ya bufi cuu. Camiyänö Yai Bada ya Bufi ca̦i malä tabole.