1 Corintios 6 - Biblia Yanowamö

Jesucristo ebä cadidamabeje shomi täbä yädäblamaö lä wasöno wei tä a̦

¹ Jesucristo bufilewä bä mö feduwä lä cuinö, ai wamacö yabäcaöje däjä, ¿wedi tabä shomi wama täbä li nacaablaö dicoo? Yai Bada ebä lija ¿wamacö a̦ nö shi̦lo yai wäo mlai? Ö̦jö bänö tä bluca cadejabeje bä waiquiwä malä cui.

² Jesucristo a itou co̦oyoluu däjä, Yai Bada bäma ecö lä cuinö, jödödöwä täbä lä cublai bäma täbä nia malä jimaö wei. Aifä cäcöbä a̦fa tayou bädao ja, tä cadejaö da showadaoje.

³ A̦jele bäma täbä nia lä jimaö wei, ¿bei wama tä daimi? Inaja bämacö nia jo̦wa cuaaö waiquiwä ja lä, yanowamö bä bädawä lä cui, ö̦jö bei bäma bä jimaö yaiquei.

⁴ Aifä cäcöbä a̦fa tayou ja, ¿Yai Bada tä daö lä mlajei täbä lija wama tä cadejamaö dicoo tawä?

⁵ Wamacö doblou lä mlai wamacö nö ö̦jöböamobä ya wa̦. Aifä cäcöbä a̦fa tayou dicoo ja, cafä Yai Bada wama ecö lijamö tä nia lä cadejaö wei, ¿a cuami tawä? A bufi lä moyawe wei, moli ma cui, ¿a cua bädaami daanö?

⁶ Ö̦jö ma cui Jesucristo wama ecö bluca ma cui, bä a̦fa lä tayou wei ja shomi wama täbä yädämaö dicoo. Jesucristo bufilewä bä ma mlai bä ma cui lija wama tä cadejamaö dicoo.

⁷ Wamacö a̦fa lä tayou wei däjä, shomi täbä lija wama tä cadidamaö dicoo ja, wamacö dobloimi waiquiwä. ¿Wedi tabä wamicai wamacö nö shi̦lo bleaaö bädaomi, ö̦jö lä? ¿Wedi tabä “Wale mölamaö bädao”, wamacö li cuimi, ö̦jö lä?

⁸ Öjö ma cui, cafä wamacö showawä ma cui, wamacö nofi jushuaö. Jesucristo moli wama ecö mashi ma cui, wamacö nö bleaamayou, wamacö ca̦i mölamayou.

⁹ ¿Wama tä daimi tawä? Yai Bada tänö cama ebä ca̦i cuobä jamö, bä doblou lä mlai bä ajedemabou mlaicätä. Bä möla dijä. Bä nofi beshili lä jushublalou wei bä ma cui, nö ijidubö täbä lä bufiblaö wejei bä ma cui, bä lä joleblalou wei bä ma cui, ai a wa̦lo mö feduwä sho cäcöbä nofi lä jushublalou wei bä ma cui, ai a suwä mö feduwä sho cäcöbä lä cuaaö wei bä ma cui, bä nia ajedemaboimi.

¹⁰ Bä lä tomömou wei bä ma cui, madofi täbä ja bä bufi lä waiyou wei bä ma cui, cama bä shi lä wa̦limamou wei bä ma cui, bä a̦fa lä lafumaö wejei bä ma cui, Yai Bada tänö dodijidawä cama ebä ca̦i cuobä jamö, ö̦jö bä ajedemabou mlaicätä.

¹¹ Inaja ai wamacö ca̦i jaba cuaaö ma balöono wei ma cui, wamacö aublaliyoma. Yai Bada wama ecö cublaliyoma. Bada tä Jesucristo lä cuaano wei tänö, jai wamacö dodijaö waiquiwä wamacö nofi tabou majöa. Yai Bada tä Bufinö inaja wamacö taamama, bäma a lä bufiblaö wei a Yai Bada lä cuinö.

Bei bämacö lä cui Yai Bada bäma ecö

¹² Abenaja ai bä cuu. “Ya cuaaö bufi lä doblao weinaja ya cuaabä lä. Tä a̦ läa malä mlai”, bä ma cuu wei ma cui, inaja bä lä cuaaö wei tänö bä nia bayeliblamoimi. “Ya cuaabä lä”, cama bä ma cuu wei ma cui, inaja camiyä ya bufi cuimi. Ya bufi luluamou mlaobä ya bufi yai wasöo.

¹³ Abenaja täbä ca̦i cuu. “Bei bämacö busi lä cui, nii bä befi”, täbä ca̦i ma cuu wei ma cui, Yai Bada tänö bei bämacö busi nia lä mladamaö weinaja, nii bä nia ca̦i mladamaö mö feduo. Bämacö iyabä bei bämalecö busi tablalema ma cui, bei bämacö yai lä cui, bämacö nofi jushublalobä bämalecö tablanomi. Bada tä lä culadi tä lija bei bämacö noshi yai ö̦jödaobä, bämalecö tablalema. Ö̦jönö bei bämalecö shi̦lo bayeliblaö talei.

¹⁴ Bei bämacö lä cui, Yai Bada tänö bämalecö nia demi ca̦i jocädamaö, cama a nö lä wa̦lojaö wei tänö. Bada tä demi lä jocädamaleno weinaja showawä.

¹⁵ ¿Bei wamacö bufi jaducäbloimi showawä? Jesucristo lija wamacö bufi fa yädäicunö, jai moli wamacö bayucuwä cuwä. ¿Ö̦jö tawä? Ai a lä cui, Jesucristo lija a ma yädäle, showadi a suwä lä dodoo wei a lija, ¿a nia joleblalou majöo daanö? ¿Ö̦jö sho cäcöbä moli cublobä a daanö? Mlaicätä.

¹⁶ Ö̦jö lija a wa̦lo joleblalou ja, moli cäcöbä mashi jo̦wa cublou malä cui. Abenaja tä a̦ oni cuu. Bolacabö cäcöbä ma cui, moli bä cublou majöo. Einaja tä a̦ cuu.

¹⁷ Ö̦jö ma cui, Bada tä lä culadi a lija a bufi lä yädäo wei a lä cui, Jesucristo sho cäcöbä bufi moliblaliyo.

¹⁸ Wamacö nofi beshili jushublalou dodijio mlai. Ai tä wa̦lidiwä bluca ma taö wejei, bei bä wa̦lidiamabä tämi. Ö̦jö ma cui bä nofi beshili lä jushuaö wei, bei bä nia li fa wa̦lidiblamonö bä li cuaaö.

¹⁹ ¿Wama tä daimi tawä? Cafä wamacö lija Yai Bada tä Bufi fa jibämoicunö wama a Bufi tabou. Ö̦jö wama ecö yafi. Ö̦jö wama ecö waiquiwä yalo, camanö tä tamaö lä bufio wei tä ja wamacö cadidobä wamacö.

²⁰ Jesucristo cama a fa jibämoicunö, wamacö no comaquema. Cama wama ecö yalo, wamacö dodijidawä lä cuo wei tänö, ai täbä lija Yai Bada a doblao da dablamaje.