1 Corintios 5 - Biblia Yanowamö

A lä yawelemou wei a waimaö lä bufino wei tä a̦

¹ Wamacö a̦fa wayoaöje. Cafä wamacö lija ai a nofi jo̦wa jushublalou fe balojoa. Bä fö̦ö e suwäbö ma cui lija a jo̦wa yabäcäo dicoo. Yai Bada tä daö lä mlajei täbä ma cui, ¡inaja täbä nofi cuaaö lä mlai!

² ¿Wedi tabä aifä a nö ma quiliaö däjä ma cui, wamacö a̦fa dodijaö tamou fe yadio dicoo? Wamacö yai ö̦cöö fa cunoja tä nö shi̦lo doblaobö wei. Inaja a lä cuaale, wama a coyocomabou fe yadio mlai, a waia da showadaalöje.

³ Cafä wamacö lijamö bei ya cua ajedeami ma cui, jai wamale möö wawädowä wamale nofi tabobä. Miji a lä yawelemou wei a lä cui, jai bei ya wa̦ yai faö, wawädowä ya jimaö waiquia lä cule.

⁴ Bada tä Jesús a wa̦nö, ya jimaö. Wamacö lä yododaö wei däjä, jai camiyä ya coyocoa, wamale nofi nia tabou. A lä yawelemou wei, Jesucristo a wa̦ lofotenö abenaja wama a nia taamaö.

⁵ Fecula bada a lija wama a nia jibäö, a wa̦liabä, Jesucristo a fuu lä co̦o wei däjä a bufi fucäamou fe yadiobä.

Nii bä lä julumaö wei tä a̦ lä wäyäno wei tä a̦

⁶ Cafä wamacö a̦fa dodijaö lä tao wei, tä dodijidawämi. ¿Wama tä daimi tawä? Nii täbä julumabeje, wiisibö tä wai ma coyocaö wejei ma cui, täbä malä juluoblou wei.

⁷ Täbä nofi lä jushuaö wei tä lä cui, jai nii julumamodima tä lä culenaja tä cuwä. Ö̦jö tä möcashi jotenö, tä mö comi fudäblaliyo. Cafä wamacö lijamö tä jode lä cule tä da joyalöje, bei wamacö bufi dude jamö tä jode coyocoo mladobä. Jode wama tä coyocobobä wamacö malä mlai. Yai Bada a waiteli lä jayuano wei a nofi co̦camoabeje, yalo oweja bä shäö lä cuaaö wejeinaja, Cristo a shämou malä waiquilayono wei.

⁸ Ö̦jö cudeenö, täbä bufi doblalou ca̦i lä iyaö weinaja bämacö bufi ca̦i doblalou da cuo. Nii ajamö, julumamodima tä coyocaö mlajei ja, täbä iyaö lä cuaaö weinaja showawä. Wa̦lidiwä tä lä cui, nofi wa̦liayou tä lä cui, bäma tä coyocobou mlai ja. Bämacö bufi lä cadidou wei tänö, bämacö ca̦i lä bejedimou wei tänö, bämacö bufi doblalou ca̦i cuo showaobä.

Bä nofi lä jushuaö wei bä lomabou lä wasöno wei tä a̦

⁹ Cafä wamacö lijamö ya si jaba lä oniblaleno wei däjä, täbä nofi lä jushublalou wei, ya täbä lomabou wasöma. ¿Ö̦jö tawä?

¹⁰ Ya täbä lomabou lä wasöno wei däjä, Yai Bada tä daö lä mlajei ya täbä a̦fa tanomi. Mojodi täbä nofi lä jushublalou wei, madofi bä ja täbä bufi shi lä jalimou wei, täbä lä mölamaö wejei, nö ijidubö täbä lä bufiblaö wejei, ei tä ulufi jamö wamacö cua lä showale däjä, showadi täbä mojodi cuaadii cuquei malä cui.

¹¹ Ö̦jö ya si lä oniblaleno wei däjä, Yai Bada ebä a̦fa lä jilou wei ya ebä a̦fa li tama. Yai Bada e a̦fa ma jilou wei ma cui, showadi a nofi jushublalou dicoo ja, madofi bä ja a bufi shi shi̦lo jalimou dicoo ja, ö̦jö wama a shi̦lo lomabou dodijio mlai. Nö ijidubö täbä shi̦lo bufiblaö dicoo ja, täbä a̦fa shi̦lo lafumaö dicoo ja, inaja showawä. Showadi cama a shi wa̦limamou dicoo ja, täbä shi̦lo mölamaö dicoo ja, inaja showawä a lomabo dijejä. Wamacö iyabä jamö ma cui, wama a nacaö mlai.

¹² ¿Ö̦jö tawä? Yai Bada tä daö lä mlajei ya bä dobloimi jimabä ya malä mlai. Yai Bada ebä mö feduwä lä cui, bäma bä cadidamabä bämacö.

¹³ Mojodi täbä doblou lä mlai, Yai Bada camanö täbä dobloimi jimabä cätä. Abenaja tä a̦ oni malä cuu wei. Cafä wamacö lija tä coyocoo mlaobä, a doblou lä mlai a da blajamalöje. Einaja tä a̦ cuu.