1 Corintios 3 - Biblia Yanowamö

Bä doblono lä mlai tä a̦

¹ Iba wamacö. Yai Bada wama a Bufi tabou mö ma fedule ma cui, bämacö yömölaö da balöoblei däjä ya wa̦ doblonomi. Yanowamö täbä bufi showadi lä cuaablalou wei tä ja, wamacö cuaaö bufi fa doblaonö, wamale doblamanomi. Jai Jesucristo lija wamacö jabamou, wamacö cuaaö dicooma yalo, colo wiisibö tä a̦ lä cui ja bämacö shi̦lo yömölaö bädaoma.

² Oshe dude täbä lija yalo bä jibäaimije. Bä shi̦lo shadimabouje. Yai Bada etä a̦ ja bämacö jaba lä yömöladaleno wei däjä, inaja showawä wamacö cuoma. Oshe täbä wainö bä nii waa doblaimi lä culajeinaja, inaja showawä Yai Bada etä a̦ ja wamacö dobloimi cuoma. Fei däjä ma cui wamacö dobloimi showawä.

³ Cafä wamacö bufi cuu lä bädao wei tä ja, wamacö cuaaö bufi doblao showao dicoo. Ai täbä dodijaö ayao ja, wamacö jushuo si malä ijejei. Ai wama täbä nofi malä wa̦libou wei. Inaja wamacö cuaaö dicoo ja, mojodi bä lä culenaja wamacö cuaaö mö feduwä malä showai.

⁴ “Pablo ya wa̦ yai ji̦lii dodijio”, ai wamacö cuu dicoo ja, “Abolo ya wa̦ yai ji̦liabä”, ai wamacö cuu mö feduo dicoo ja, showadi täbä yanowamö lä cuaaö weinaja wamacö cuaaö malä showai.

Yai Bada ebä yaiablaö lä wasöno wei tä a̦

⁵ ¿Wedi bei a li Abolo, wama a wa̦fa jayumadii yaiobä? ¿Wedi bei ya li Pablo, wamale a̦fa jayumadii yaio mö feduobä? Yai Bada wama a bufiblabä yafälecö lä shimöleno wei yafäcö li bädawä malä cui. Yai Bada tänö tä lä jimöbeno wei tä ja yafäcö lä icuqueno wei yafäcö li, yafäcö ojodamobä.

⁶ Yai Bada ya wa̦ jaba lä wäyäno wei däjä, cafä wamacö bufi jamö jai ya mobä döaö ya cuaama. Abolonö tä a̦ wäyäö lä nomöjöono wei, jai mau ubänö mobä fe liyäyaö a li cuaaö nomöjöoma. Yai Bada tänö wamacö bufi lä jaducäblamaleno wei däjä, jai mobä caumalema tä li cuaaö nomöjöoma.

⁷ ¿Ö̦jö tawä? Mobä lä döaö wei a lä cuinö, mobä caumaö daomi. Mobä fe lä liyäyaö wei a ma cuinö, inaja showawä. Yai Bada tänö mobä shi̦lo badamaö daö ayawä.

⁸ Mobä lä döaö wei a ojodamou lä cuaaö weinaja, mobä fe lä liyäyaö wei a ma cui, inaja showawä a ojodamou cuaaö mö feduo. Ai a lä cui, dodijidawä a ojodamou ja, Yai Bada tänö a no ojode comaquei. Ai a dodijaö mö lä feduo wei lija, a no ca̦i ojode co̦a mö fedumaquei.

⁹ Yai Bada a lä cui jai a ficalimou a cuaaö. Cafä wamacö lä cui, jai Yai Bada ficali wama etäca cuwä. Cafä bei wamacö bufi jamö Yai Bada tä lä ojodamole jamö, ei camiyä yafäcö co̦caa. Jai Yai Bada tä yafi wama ecö ca̦i cuwä.

Bufi moyawälanö bämalecö ojodamomaö lä bufino wei tä a̦

¹⁰ Yai Bada tänö wale fa bayeliblalönö, ya tä a̦ lä wäyäno wei däjä, jai ya e yafi i̦tamama ya cuaama. Bä yafimou lä daö wei bä lä cuinö, dodafi bä i̦tamaö lä balöo wejeinaja, colo ya tä a̦ jaba wäyäö cuaaö balöoma. Ai a ojodamou nomöjöa lä cule. Bä ojodamou lä nomöjöo wei, bä bufi moyawälanö bä ojodamobä, ö̦jö lä.

¹¹ Yano je̦fa a nofi lofote mölabou lä cuaaö wejeinaja, Jesucristo a nofi mölabobeje a lofote tablamaö malä waiquilayono wei. Täbä mölabä, ai tä nia cuo majöomi.

¹² Jesucristo jai colo etä yano cuwä waiquiwä. Yai Bada lija bä lä ojodamou wei, jai etä yano ola tafälööje bä cuaaö. Dodijidawä Yai Bada tä nosie lä fuaö wejei däjä, jai e yano ola lofotoamaöje tä cuwä. Ai bä lä cuinö, jai maa mabä nofi lä yaibou wejei mabä yädämaöje bä cuaaö. Ai bä lä cuinö, jai mabä nowa lä bluca wei mabä yädämaöje bä cuaaö mö feduo. Ai bä lä cuinö, jai fii fibä yädämaö mö feduoje bä li cuaaö. Ai bä showawä lä cuinö, jai yaa jenabä yädämaöje bä cuaaö mö feduo. Ai bä mö feduwä showawä lä cuinö, jai bölösö bä yädämaöje bä cuaaö mö feduo.

¹³ Tä lä taö wejei tä nia dodijidawä wabamou. Yai Bada tänö täbä jimabä etä cublou däjä, cowa wacänö tä nia bluca lä wabamou wei däjä, tä nowa nia wawäblou.

¹⁴ Jai tä yafi ola taöje däjä täbä yädäo lä majöo wei, Yai Bada tänö bä no nia ojode co̦amaö. Cowa wacänö tä wa̦liaö lä mlai, tä no ojode co̦maquei.

¹⁵ Tä lä tano wei etä ö̦shölayou ja, tä nowa nia ojode co̦amaimi. A ojodamou nö nia bleaaö ma cui, cama a nia shi̦lo fucäamou. Cowa wacä jamö täbä fucäaö lä cuaaö wejeinaja, cama a nia shi̦lo fucäamou bädao.

¹⁶ “Yai Bada yama ecö yafibö”, ¿wamacö bufi cuimi tawä? ¿Yai Bada wama a Bufi tabou nofi mojodubou dicoo tawä?

¹⁷ Ai a lä cuinö, Yai Bada etä yafi wa̦liaö ja, a nofi nacao. Yai Bada tänö ö̦jö a wa̦lialei. Cama e yafi malä yaibole, cafä wama ecö lä cui.

Bämacö jimöo lä wasöö wei tä a̦

¹⁸ Jole jole wamacö mölaö bädao mlai. Yanowamö täbä lija a bufi a̦fa jaducäwä tamou shi jalimo dijä. “Wa bufi nofi jaducäbloimi yai”, wa nowa taö fa cunoje ja, tä nö shi̦lo doblaobö wei. Ö̦jö däjä wa bufi shi̦lo yai moyawäblou dodijiobä.

¹⁹ Yanowamö täbänö a bufi a̦fa moyawe lä taö wejei, cama etä lä cui Yai Bada tänö etä nia wailei. Abenaja tä a̦ oni cuu. Yanowamö bänö etä a̦fa moyawe lä taö wejei, Yai Bada tänö etä mojodi fa jimanö, bä doblamaimi. Einaja tä a̦ cuu.

²⁰ Abenaja tä a̦ oni ca̦i cuu. Bä bufi a̦fa moyawe lä wäyäö wejei, Yai Bada tänö bä bufi nö a̦fa bleaaö taö. Einaja tä a̦ cuu.

²¹ Cama yanowamö täbä nofi moyawe mölamobobä tä cuami waiquiwä yalo, bä bufi da jaduqueicu. Yai Bada lija yamacö lä ojodamou wei, yamalecö nofi dodijidawä yaibou mlai. Cafä wamacö bayeliblamobä yamacö li bluca.

²² Camiyä Pablo ya ma cui, Abolo a ma cui, Pedro a ma cui, wamacö bayeliblamobä yamacö bluca. Jödödöwä täbä lä cublai, cafä wamacö befi bluca. Wamacö lä demöo wei tä ma cui ja, wamacö lä mladou wei tä ma cui ja, Yai Bada tänö wamacö nia bayeliblaö shi wa̦lii. Fei däjä tä lä cule tä ma cui, tä nia obi lä cublou wei tä ma cui, cafä wamacö befi tä bluca showawä.

²³ Cafä wamacö lä cui, Cristo wama ecö. Cristo a lä cui, Yai Bada e.