1 Corintios 2 - Biblia Yanowamö

Pablonö tä a̦ nofi lä cadidibono wei tä a̦

¹ Iba wamacö. Cafä wamacö lija Yai Bada ya tä a̦ wäyäö ja ya lä waloqueyoluno wei däjä, ya wa̦ fe difelimonomi. “Pablo a bufi nofi moyawe yai”, bämacö bufi tamaö bufionomi.

² Cafä wamacö lija ya da bälöoblei däjä, ai ya tä a̦fa wäyäö coyocanomi. Jesucristo tä a̦ lä cui, fii balitama tefi ja a lä shäleno wejei tä a̦ dodijiwä lä cui, ö̦jö ya tä a̦ mada cadidablei.

³ Bämacö ca̦i da cuoblei däjä ya wa̦ faö fa quilinö, jai ya ujudi li blösö blösömoma ya cuaama.

⁴ Ya tä a̦ lä wäyäno wei däjä, camiyä bei ya wa̦ moyawe dablamou mlai ja, Yai Bada ya Bufi shi̦lo lofote dablamaö dodijioma.

⁵ Yanowamö täbä a̦ faö lä moyawe wei tä ja, wamacö mölaö mlaobä. Yai Bada tä nö lä wa̦lojaö wei wama tä nofi shi̦lo yai mölabobä.

Yai Bada tä Bufinö täbä bufi lä bayeliblaö wei tä a̦

⁶ Ö̦jö ma cui yama tä a̦ lä wäyäö wei, moyawe cä tä a̦. Yai Bada lija bä bufi lä jaducäafälöö wei bä lä cuinö tä a̦ nö moyawe ö̦jöböaöje. Culenaja yanowamö bämacö lä cule jamö bä lä nosiemou wei bä lä cuinö, bä mladou si lä ijejei bänö, yama tä a̦ lä wäyäö wei tä a̦ taboimije.

⁷ Moyawe yama tä a̦ lä wäyäö wei tä a̦ lä cui, Yai Bada tänö tä a̦ lä jo̦yabono wei tä a̦ li. Yanowamö täbä lija tä a̦ dablamono ma mlai ma cui, yedu jamö tä ulufi tablano mlai ja, tä a̦ tabou showaoma. Cama bäma ecö lä cui, bämalecö nia lä doblamabou wei tä a̦ yaibou ja̦too showaoma.

⁸ Ö̦jö tä a̦ ja, ei tä ulufi jamö bä bluca lä nosiemou wei bä bufi jaducäblonomi. Bä bufi jaducäblou fa cunoja, fii balitama tefi ja Bada tä nofi lä doablamou wei tä nö shäbö mlajei.

⁹ Abenaja Yai Bada etä a̦ oni cuu malä balöono wei. Yanowamö bei bä mamocunö tä dablaö balöono ma mlajei ma cui, bei bä yömöcacönö tä a̦ ji̦liaö balöono ma mlajei ma cui, bä befi cuo showaodayoma. “Inaja tä cuobä daanö”, bä bufi jaba cuno ma mlai ma cui, Yai Bada tä lä nofimaö wejei bä befi tabou showaoma. Ö̦jö bä befi lä tabou wei tä lä cui,

¹⁰ camiyä bämacö lija Yai Bada tä Bufinö tä wawäblamalema. Tä daö nö malä mlale. Yai Bada a bufi cuablalou lä ja̦too wei tä ma cui, tä ca̦i daö. ¿Ö̦jö tawä? Einaja tä a̦ cuu.

Yai Bada tä Bufinö tä a̦ lä wäyäö wei tä a̦

¹¹ Shomi täbä lija täbä bufi dablamou ma mlai ma cui, cama täbä bufi li yai dablamou. Inaja lä showawä, Yai Bada tä Bufinö cama a bufi shi̦lo dablamou.

¹² Ö̦jö bäma a Bufi li tabou. Yai Bada tänö bämalecö befi lä tabou wei tä ja bämalecö bufi moyawäblamabä, a Bufi jibämobema. Ö̦jö bäma a Bufi tabou yalo, yanowamö täbä bufi lä cuaablalou weinaja bämacö bufi cuaaimi.

¹³ Yama tä a̦ lä wäyäö wei, Yai Bada tä Bufi lija yama tä a̦ fa ji̦lilänö yama tä a̦ li wäyäö. Yanowamö täbä bufi a̦fa moyawe lä jilabou wejei täbä lija yama tä a̦ däano malä mlai. Yai Bada tä Bufi tabou mö lä fedule täbä lija yama tä a̦ bejedi wäyäö mö feduo.

Yai Bada tä Bufinö täbä bufi lä moyawäblamaö wei tä a̦

¹⁴ Yai Bada tä Bufi tabou lä mlajei bä lä cuinö tä a̦ ji̦liaö möblaimije. Yai Bada lija bä bufi jaducäo fa mlacunö, tä a̦ ca̦i ji̦liaö bufiomije. Tä Bufi taboimije yalo, tä a̦ nö bejedi ö̦jöböblaimije.

¹⁵ Ö̦jö ma cui, Yai Bada tä Bufi lä tabou wejei bä mö feduwä lä cuinö, tä bluca lä cublou wei tä nö ö̦jöböaöje. Tä nö dodijidawä ö̦jöböaöje, tä nö ca̦i wa̦lidiwä ö̦jöböaöje. Cama bänö tä nö bluca ma ö̦jöböaö wejei ma cui, mojodi täbä lija cama bä bufi nö ö̦jöböamoimi. Yai Bada ebä lija bä lä mojodi wei bä bufi shi̦lo wedinajamou.

¹⁶ Abenaja Yai Bada etä a̦ oni cuu malä balöono wei. Bada tä bufi lä cuaablalou wei, ¿wedinö tä bufi yai daö? Ö̦jö a lä cui, ¿wedinö a li yömölabou? Einaja tä a̦ cuu. Ö̦jö ma cui, Yai Bada bäma a Bufi lä tabou wei bämacönö, Cristo a bufi lä cuaablalou wei bäma a bufi daö.