1 Corintios 16 - Biblia Yanowamö

Blada bä ja cama ai ebä bayeliblaö lä bufino wei tä a̦

¹ Judea jamö Yai Bada wama ebä nia lä bayeliblaö wei ya tä a̦fa nia wäyäö majöo. Wama bä bayeliblabä, blada wama bä nia shimomaö, Calasia jamö Jesucristo ebä lä yododaö wei ya bä taamaö lä bufino weinaja showawä.

² Wama bä blada lä doaö wei bä ja, domingo däjä showadi ai wama bä mashi fa sheleleblalönö, wama bä shimomabä. Bluca wama bä doaö ja, bluca wama bä nia sheleleblaö. Wiisibö wama bä blada däaö ja, wiisibö wama bä nia sheleleblaö. Yanöcö wama bä fa shimomalönö, wama bä blada ajedebou waiquio däjä ya waloobä.

³ Jelusale jamö blada wama bä ca̦i nia lä shimaö wei wama bä fa yaialalönö, ya bä shimajalobä. Ya fa co̦bonö, ya tä fa oniblalöjolonö, ya si jibäa fa showadacönö, Jelusaleteli bä lija si oni jibäadayobeje. Si oni lä doadayou wejei ja, cafä wamacönö wama bä lä dobäö wei tä ja, täbä moyawädayobä.

⁴ Camiyänö ya bä ca̦i fubä tä cua ja, ya bä ca̦i fulayou.

Colidoteli bä fe nia walou lä majöono wei tä a̦

⁵ Masedonia tä ulufi jamö ya jayua fa balöicunö, cafä bämacö fe walolei. Ö̦jamö ya nia jayuo balöofälöö.

⁶ Ö̦jö däjä, cafä wamacö lija ya bälödia ja̦toquei fa cui. Tä maaböo däjä, ö̦jamö ya cudio fa balöonö, wamale fa bayeliblanö, ya fuu lä bufio wei jamö, dodijidawä wamale shimaö co̦o majöobä.

⁷ Bämacö möö jayuaö bufio bädaomi. Obi, Yai Bada tänö wale fumaö lä dodijio wei ja, dodijidawä bämacö shi̦lo bälödiobä.

⁸ Eja, Efesoteli bä lija ya yanöcöa lä cule. Showadi nii bä jaba lalou däjä bä lä iyaö wei ya tä nö dabou balöo.

⁹ Eja walalawä ya etä a̦ wäyädibä, Yai Bada tänö tä tabou waiquia lä cule. Bluca täbänö wale a̦ ji̦liaö bufi doblaa lä culajei. Täbä a̦ lä lämou wei täbä ca̦i bluca mö feduwä.

¹⁰ Cafä wamacö lijamö Timoteo a waloo ja, dodijidawä a ca̦i da bälöicöje. Yai Bada lija camiyä ya ojodamou lä culenaja, a ojodamou cuwä mö malä fedui.

¹¹ Ai täbä lija wama a nö waiblamaö mlai. Wama a fa bayeliblanö, camiyä lija a waloo co̦obä, a bufi yanöcöwä ca̦i shimöa da co̦luje. Timoteonö Jesucristo ai ebä ca̦i lä fuu wei, ya bä nö bluca dabou lä cule.

¹² Ö̦jö ma cui, camiyä ai bämacö mashi Abolo a lä cui, fei däjä wamacö fe nia waloomi. Cafä wamacö lija Jesucristo ai ebä ca̦i fubä ya wa̦ fadaama ma cui, a fuu mojio fa waiquionö a funomi. Obi a fubä etä cuo co̦o däjä, a fuu cuquei.

¹³ Bä nö da daicu. Jesucristo a nofi mölabou da shalilioje. Wamacö bufi quilii mlai, bä bufi da lofotoicu. Bä bufi nö da wa̦lojoicu.

¹⁴ Wama tä bluca lä taö wei, wamacö bufi nofiolanö wama tä tabä.

Jödödö tä a̦

¹⁵ Bei, iba wamacö. Edefana wama a daö, cama ebä ca̦i. Acaya jamö Jesucristo a nofi mölabou showao mlaoje däjä, ö̦jö bänö tä a̦ jaba däa balölemaje. Yai Bada ebä bayeliblabeje, täbä noshi shi̦lo ö̦jödao dodijio talei.

¹⁶ Einaja täbä dodijaö lä cuaaö wei, wama täbä a̦ yai fuabä. Ö̦jö bä lä bayeliblaö wejei bä ma cui, wama bä a̦ ca̦i bluca fuaö mö feduobä.

¹⁷ Eja Edefana a waloquema, Fodunado a ca̦i, Acaico a ca̦i. Ö̦jö bä waloquema yalo ya bufi doblalou. Cafä wamacönö wamale nö bayeliblaö lä cuobö weinaja wale bayeliblaö cuaaöje yalo, ya bufi doblalou.

¹⁸ Wale bufi lofotodamaö co̦layomaje, cafä wamacö bufi lofotodamaö lä culayojolono wejeinaja showawä. Einaja täbä dodijaö lä cuaaö wei, wama täbä a̦ yai ji̦liaö dodijiobä.

¹⁹ Asia jamö Jesucristo ebä lä yododoblai bä lä cui, cafä wamacö lija bä a̦fa wäamou bufi doblao. Aquila a ma cui, bä suwäbö Blisila e ma cui, cama e yafi jamö Jesucristo ebä lä yododaö wei bä ca̦i bluca ma cui, ö̦jö bä a̦fa ca̦i wäamou bufi doblao. Bada tä lija wamacö cua yalo, bä a̦fa wäamou bufi doblaa fe balojoa lä cule.

²⁰ Jesucristo ebä bluca ma cui, cafä wamacö lija bä a̦fa wäamou bufi doblaa lä cule. Jesucristo wama ecö mö fedudayou ja, bä yai da nofimayo.

²¹ Camiyä Pablonö bämacö bluca nofimaö yalo, ei bei ya imicö cadidiwänö ya si oniblaö lä cule.

²² Bada a bufibou lä mlajei bä lä cui, Yai Bada lija bä waimobä. ¿Ö̦jö tawä? Inaja lä tä cuobä. ¡Bada tä Jesucristo a itou lobaaö co̦imabä!

²³ Bei. Bada tä Jesucristonö, showadi wamacö bayeliblabä. Wamacö nofi shi̦lo ojodabobä.

²⁴ Jesucristo wama ecö yalo, bämacö bluca nofimaö.