1 Corintios 15 - Biblia Yanowamö

Cristo a demi jocädou lä co̦ono wei tä a̦

¹ Bei. Iba wamacö. Cafä wamacö lija Jesucristo dodijidawä ya etä a̦ lä wäyäno wei tä a̦ ja, bämacö bufi nia fa jaducäblamanö, ei cä ya wa̦. Ö̦jö wama tä a̦ bejedi fa dälänö, wamacö bufi lofotolanö, Jesucristo wama a nofi mölabou malä showai.

² Ö̦jö wama tä a̦ nofi cadidibolanö wamacö fucäamou, wamacö mölaö buomi ja.

³ Tä a̦ yai lä lofote wei ya tä a̦ fa dälänö, cafä wamacö lija ya tä a̦ wäyäö fe dolemoma. Camiyä bämacö dobloimi tä nowa ja, Cristo a nomaa lä lälayono wei tä a̦. Yai Bada etä a̦ oni ja, yedu ja a wa̦fa nomaö lä wäyäno wejeinaja, inaja showawä a cublaliyoma.

⁴ Maa maca jamö a nomawä fe fa lacöjenö, bolacabö tä mö fa dödölönö, Yai Bada tänö a demi jocädamaö co̦layoma, tä a̦ oni lä cuno weinaja showawä.

⁵ Pedro lija a jaba fa damolalunö, cama ebä lä nocamabono wei bä bluca lija a damoa nomöjölaliyoma.

⁶ Tä fe fa weyadalunö, Yai Bada ai ebä lija a damoa majölaliyoma. Ö̦jö bä blucao dodijioma. 500 tä jamö bä jayuquema. Ö̦jö ai bä cuami ma cui, ai bä mö feduwä lä cui, bä demi bluca cua showawä.

⁷ Ö̦jö däjä, Santiago lija a damoa fa nomöjölalunö, bä lä shimöleno wei bä bluca lija a damoa majölaliyoma.

⁸ Ya̦cumö camiyä ya ma cui lija a damoa majölaliyoma. Ya doblobä ya cuono ma mlai ma cui, a damolaliyoma.

⁹ Jesucristonö bä lä shimöleno wei bä lija ya yädäobä, ya cuonomi. Ya etä a̦ wäyäbä ya ca̦i cuonomi. Yai Bada ebä lä yaiblai, ya bä nö malä bleaamano wei.

¹⁰ Yale bayeliblabä ya cuono ma mlai ma cui, yale nofi ojodadaö fe yadioma. Ö̦jö cudeenö ya nö wa̦lojoablalou. Jesucristonö bä lä shimöleno wei bä ma dodijaö wei ma cui, camiyä ya yai ojodamou fe balojoo. Ö̦jö ma cui, camiyä ya dodijaö tänö mlai, Yai Bada tänö yale bayeliblaö fa cuaanö, bei ya doblou fe yadio.

¹¹ ¿Ö̦jö tawä? Camiyä ya ma cuinö, cama bä ma cuinö, ö̦jö lä yama tä a̦ bluca malä wäyäö wei. Ö̦jö wama tä a̦ bejedi lä bufileno wei lä tä a̦ showawä.

Täbä nia demi lä jocädamaö wei tä a̦

¹² ¿Ö̦jö tawä? Cristo a demi lä jocädaliyono wei tä a̦ ma wäyämou wei ma cui, ¿wedi tabä ai wamacö jolemou dicoo? Täbä lä mladou wei täbä nia jo̦wa dablou co̦daaimi.

¹³ Inaja mlai. Täbä demi jocädou mlao fa cunoja, Cristo a ma cui a nö ca̦i demi jocädou co̦obö mlai.

¹⁴ Cristo a demi jocädamaö co̦o mlao fa cunoja, yama tä a̦ nö wäyäö nö bleaabö wei. Wama tä a̦ nofi nö ca̦i mölabou nö bleaaö buobö wei.

¹⁵ Cristo a demi jocädou mlao fa cunoja, Yai Bada yama tä a̦fa lä wayoaö wei ja, yamacö nö jolemobö wei. A demi lä jocädamaleno wei yama tä a̦fa ma wäyäö wei ma cui, täbä lä mladou wei täbä dablou co̦o mlao fa cunoja, Cristo a ma cui a nö jocädobö mlai. Yamacö nö jolemou bädaobö wei.

¹⁶ Täbä lä mladou wei täbä demi jocädamaö mlao fa cunoja, Cristo a ma cui a demi nö jocädou co̦obö mlai.

¹⁷ Cristo a demi jocädamaö mlao fa cunoja wamacö nö mölaö buobö wei. Wamacö doblou lä mlaono wei tä nowa lä cui, tä nowa nö cuo showaobö wei.

¹⁸ Tä nowa cuo showao fa cunoja, Jesucristo ebä nomaa lä waiquilayono wei bä ma cui, bä nö dablou co̦obö mlai, bä nö bleaaö shi wa̦libö wei.

¹⁹ ¿Ö̦jö tawä? Bämacö nia lä doblaodayou wei tä ja bämacö mölaö mlai ja, äyämö bämacö lä bälöale bämacö nia fa dobladionö Jesucristo bäma a nofi shi̦lo mölabou bädao fa cunoja, bämalecö nofi jalujubobeje bämacö nö cuo fe balojoobö wei.

²⁰ Ö̦jö ma cui, Cristo bejedi lä a demi jocädou co̦layoma. Döano si ja nii cäcö jaba lalou lä culenaja, Jesucristo bei a demi jaba jocädaliyoma.

²¹ Yanowamö a jaba cuo lä balöono wei a lä cuinö, bämacö bluca lä nomaö wei tä bädamalema. ¿Ö̦jö tawä? Ö̦jö ma cui, ai a lä nodiblaliyono wei a lä cuinö, demi bämacö nia jocädou lä co̦o wei bei tä bädamaö nomöjölayoma.

²² Adana lija täbä yädäa yalo täbä bluca nomaö malä cui. Inaja showawä, Cristo lija täbä fa yädäicunö täbä demi nia cuo shi wa̦lii.

²³ Tä bluca bädou malä nodimou wei. Nii cäcö jaba lalou lä culenaja, Cristo bei a jaba demi jocädaliyoma. Cama a lä bädoyoluu wei däjä, cama ebä nia ca̦i demi jocädou nomöjöo.

²⁴ Ö̦jö däjä tä nia bluca waiquidou. Täbä nö lä nabämoladi täbä nabä fa queicunö, täbä jole jole lä nosiemou wei täbä ca̦i, täbä a̦fa jole jole lofote lä jilou wei täbä nö ca̦i bluca fa blemalalönö, bä Fö̦ö Yai Bada lija tä ulufi befi ca̦i nia co̦amaö.

²⁵ Täbä nö lä nabämou wei bä lä cui, Cristo lija Yai Bada tänö bä bluca blamabou showao mlao däjä, Cristo a nia bälöo lofotomabou dodijio.

²⁶ Täbä nö lä nabämou wei tä nia waicaö lä jödödöo wei tä lä cui, ö̦jö nomaö bei tä.

²⁷ Abenaja tä a̦ oni cuu malä balöono wei. Cristo lija täbä bluca nosiemamobä, Yai Bada tänö Bada bei a tablamalema. Einaja tä a̦ cuu. Ö̦jö ma cui, Cristo lija täbä bluca nosiemamobä, tä a̦ oni lä cuu wei, Cristo Bada bei a lä tablamaleno wei tä a̦fa wayoamonomi.

²⁸ Cristo lija täbä bluca lä nosiemamou wei däjä, Bada a lä tablamaleno wei a lija, bä Ijilubö Jesucristo a ma cui a nia nosiemamou mö feduo. Ö̦jö däjä Yai Bada tänö jödödöwä täbä lä cublai täbä nia lofote fuwäbou.

²⁹ Täbä lä mladaliyono wei bä befi, ai bä möfe ojomamou. ¿Wedinaja bä bufi li fa cunö bä li inaja cuaaö? Yai Bada tänö täbä demi jocädamaö mlao fa cunoja, bä lä mladaliyono wei bä befi, bä möfe nö ojomamobä mlai. Täbä nia demi jocädou lä co̦o wei tä nofi mölabou waiquiaje yalo, bä li inaja cuaaö malä cui.

³⁰ Täbä demi jocädou mlao fa cunoja, wamalecö nabä lämobä jamö yamacö nö ca̦i fudibö mlai.

³¹ Bejedi lä ya wa̦. Showadi ya shämobä tä läa showaa ma cule, Bada tä Jesucristo lija wamacö bufi cuquema yalo, bejedi lä ya bufi doblalou.

³² Efesoteli bä waitelimou fe balojooma. Yalo bänö täbä nabä queo nö lä quiliaö wejeinaja wale ma taamano wejei ma cui, ya tä a̦ wäyäö fe blacäjoma. ¿Wedi tä nowa ja ya fe li blacäjou? Yai Bada tänö wale demi jocädamaö mlao fa cunoja, ya nö shämou ojodaobö mlai. Ya demöo co̦obä tä cuo mlao fa cunoja, yanowamö täbä showadi lä cuu weinaja ya nö cubö wei. Abenaja. “Bämacö da showayo. Bämacö nomaö bädao ja, bämacö dodijaö co̦obä tä nia cuo malä mlai”, ya nö cubö wei.

³³ Bä möla dijä. Ai bä ma dodijaö wei ma cui, täbä nofi lä jushuaö wei täbä lija bä nocaablalou lä dicoo wei, bä wa̦lidilalio.

³⁴ Bä bufi da jaducäicu. Wa̦lidiwä wama tä taö dicoo mlai. “Yai Bada ya daö”, wamacö cuu ma cui, ai wamacö bejedimou malä mlai. Wamacö shädayaimobä ya wa̦.

Bämacö nia cublou lä nomöjöo wei tä a̦

³⁵ Abenaja ai a cuu ja̦too fa cui. “Bä lä mladou wei, ¿wedinaja bä li demia taa co̦malei? ¿Wedinaja täbä cuwä, bei täbä li demi cua co̦quei?” Einaja a cuu ja̦too fa cui.

³⁶ Einaja wa lä cuu wei wa lä cui, wa bufi jaducäami fe balojowä. Nii bei wa mo döaö däjä, mo wa̦ocoblou fa balölonö, dodijidawä tesi shi̦lo falayou.

³⁷ Tä nia obi lä cublou wei bei wa tä döaimi. Wa mo döa lä dodijiquei wei mo nia faimi, bei mo li bädawä, yono mo ja̦towä, shomi tä mo ja̦towä.

³⁸ Yai Bada tänö täbä nii shomitawä yaiblaö fa balöonö, bluca mobä shomi lä cublai tä mobä ja, nii shomitawä bä faö cuaaö malä showai.

³⁹ Inaja showawä, täbä demi lä cublai täbä shomi mö malä fedui. Yanowamö bämacö ya̦jicö lä culenaja, yalo bä ya̦jicö cuwä mö feduwä malä mlai. Yalo bä lä yäö wei bä ya̦jicö ca̦i shomi mö feduwä malä cui. Yuli bä ya̦jicö ma cui, bä ya̦jicö ca̦i shomi mö feduwä.

⁴⁰ Fedu jamö täbä bluca lä culadi, täbä ca̦i shomi mö feduwä, yanowamö bämacö lä culenaja mlai. Fedu jamö täbä bluca lä culadi, täbä liyäjäwä shomitawä. Eja täbä lä cule, täbä liyäjäwä shomitawä mö feduwä.

⁴¹ Judu mösö jamö täbä bluca lä culadi, täbä mömou shomiblawä ma cui, täbä mömou bluca liyäjäwä. Motoca a shi̦i jilajao. Belibo shi̦i wawädowä. Shidicali bä mamoca shi̦i mida midamou liyäjäwä. Ai bä mamoca shi̦i wacacawä, ai bä li shomitawä mö feduwä.

⁴² Inaja showawä, Yai Bada tänö täbä demi jocädamaö co̦o däjä, shomi tä liyäjäwänö, täbä nia liyäjäblou majöo. Yanowamö täbä lä cublai täbä mladou si ijejewä ma cui, täbä demi lä jocädou wei täbä ba̦limi.

⁴³ Nomawä täbä wa̦lidiwä nö quilijiwä ma cui, täbä demi lä jocädamaö wei, liyäjäwä fe balojowä täbä jocädamaö. Nomawä täbä ujudi fe balojowä ma cui, lofote täbä jocädamalei.

⁴⁴ Yanowamö bei täbä je̦le je̦lemou fa mladonö täbä nomaö ma cui, Yai Bada tä Bufinö täbä demimabou shi wa̦liobä, täbä nia malä jocädamaö wei. ¿Ö̦jö tawä? Yanowamö bei bämacö mladou si ma ijejei ma cui, Yai Bada tä Bufinö ba̦limi bämalecö nia tablamaö.

Cristo bäma a nia ba̦limi lä nodibou wei tä a̦

⁴⁵ Abenaja tä a̦ oni cuu. Yanowamö a jaba cuo lä balöono wei, Adana a lä cui, a demi cublaliyoma. Einaja tä a̦ cuu. Yanowamö a cuo lä nodiono wei, Cristo a lä cui, täbä demi tamabou shi wa̦liobä bei a cublaliyoma.

⁴⁶ Ba̦limi tä lä cui a balöbloimi. Tä mladou si lä ijejei a balöo. Ba̦limi tä lä cui a nojao.

⁴⁷ Yanowamö a jaba lä cuono wei, mashita a ja a tablamolayoma. Coshi coshi bä ja a cuoma. A yanowamö lä nodiono wei, Cristo a lä cui, fedu jamö a li cuoma a.

⁴⁸ Mashita a ja a lä tablamolayono wei a lä cui, a mladou si ijejewä lä cuono weinaja, eja bä bluca lä cublai bä ujudi cuwä nodiwä. Inaja showawä, fedu jamö a lä culadi a ba̦limi yai lä culenaja, cama ebä nia bluca ba̦limi cuo mö feduo.

⁴⁹ Mashita a ja a lä tablamolayono wei bäma a ujudi nodibou lä culenaja, fedu jamö a lä culadi bäma a nia ca̦i lofote nodibou mö feduo.

⁵⁰ Wamale a̦ da ji̦li, iba wamacö. Täbä sicö mladou si lä ijejei sicö tabou showalajenö, Yai Badanö cama ebä ca̦i lä cuo wei jamö bä walodayou mlaicätä. Täbä ba̦limi lä mlai bä lä cui, täbä ba̦limiobä jamö bä cuo daomi.

Bei bämacö nia bluca obi lä shomiblou wei tä a̦

⁵¹ Wamale a̦ da ji̦li. Tä a̦ jaba lä jo̦yaono wei ya tä a̦ wawämaö lä cule. Ai bämacö nia nomaimi. Bämacö bluca nomaö ma mlai ma cui, bämacö nia bluca shomiblou.

⁵² Yedu täbä mamo casi midou lä culenaja, amowa fibä lä jolamou wei tä a̦ famaö jödödöo däjä, bämacö nia shomiblaliyo. Tä a̦ ji̦lio fa balöonö, täbä lä mladaliyono wei täbä lofote jocäblou fa co̦lonö, bämacö nia bluca shomiblou.

⁵³ Bämacö mladou si lä ijejei, lofote tä lä cui tä ja bämacö nia lucäö. Bämacö cudio lä mlai, ba̦limi tä ja bämacö nia didio.

⁵⁴ Bämacö mladou si lä ijejei, lofote tä ja bämacö nia didio. Bämacö cudio lä mlai, ba̦limi tä ja bämacö nia lucäö. Ö̦jö däjä, tä a̦ oni cuu lä balöono wei tä a̦ nia bejedi cublou. Abenaja tä a̦ oni cuu. Bämacö nia nomaö co̦daaimi. Nö wa̦lojou tä lä cuinö, nomaö tä blabou lä cule. Einaja tä a̦ cuu. Abenaja ca̦i.

⁵⁵ Nomaö wa lä cui, ¿wedi jamö tänö wa nö wa̦lojaö co̦obä, ö̦jö lä? Nomaö wa lä cuinö, ¿wedi tänö yamalecö nö nia bleaamaö co̦o? Einaja tä a̦ cuu.

⁵⁶ Täbä nö malä bleaamaö wei. Täbä doblou lä mlai Yai Bada tänö tä nowa nia yuaö yalo, täbä nomaö quilii. Täbä doblou lä mlai däjä, Moisesi tä a̦ nofi cadidiboimije yalo tä nowa yulei.

⁵⁷ Ö̦jö ma cui, Yai Bada lija bämacö bufi doblalobä bämacö. Bada tä Jesucristo a shämou fa läonö tä nowa mladamalema, bämacö nö wa̦lojaö fe yadiobä, bämacö nomaö quilii mlaobä.

⁵⁸ Ö̦jö cudeenö, iba bämacö lä nofimaö wei wamacö, bä bufi da lofotoicu. Wamacö mojiblou mlai, Yai Bada lija wamacö yai ojodamou balafälöbä. Bada tä lä culadi tä lija wamacö ojodamou ja, wamacö nö nia bleaaö malä mlai.