1 Corintios 13 - Biblia Yanowamö

Bä bufi lä nofio wei tä a̦

¹ Bluca täbä caficö a̦ ja, ya aca ma jayuaö wei ma cui, a̦jele ya bä caficö a̦ ca̦i ma daö wei ma cui, ya bufi nofio mlalanö ya wa̦ faö bädao ja, ya wa̦ jole jole nacli faö bädaquei.

² Jesucristo ebä lä yododaö wei jamö ya etä a̦ wäyäbä, Yai Bada tä Bufinö yale nö ma wa̦lojoablalamaö wei ma cui, ya bufi jaducäa ma jödödöi ma cui, ya bufi dao fe ma balojoi ma cui, Yai Bada ya nofi mölabolanö jefu ya tä balöcö majöblamaö ma daö wei ma cui, ya bufi nofiomi ja, ya no ojode co̦amamobä tä cuami waiquiwä.

³ Täbä nö fo̦li lä bleaaö wei täbä lija, bluca ya täbä lä tabole ya täbä ma jibäaö wei ma cui, ya bufi nofio mlalanö ya täbä jibäaö dicoo ja, ya nö bleaaö bäa. Jesucristo a nowa ja wale demi yaabeje ya noshi ma ö̦jödao wei ma cui, ya bufi nofio mlalanö ya tä taö ja, ya nö bleaaö bäa.

⁴ Bä bufi lä nofio wei bä jushuo jaöomi. Täbä bayeliblaöje. Ai täbä dodijaö ma ayao wei ma cui, bä jushudoimi. Cama bä nofi doablamoimi.

⁵ Bä bufi lä nofio wei bä nofi jushuaimi. Bä joomodou si ijejewä. Bä jölaö si ijejewämi. Täbä nowa tabou nö dedeaimije.

⁶ Täbä doblou lä mlale jamö, bä bufi lä nofio wei bä bufi doblaloimi. Täbä lä dodijale jamö bä bufi shi̦lo yai doblalou.

⁷ Bä bufi lä nofio wei bä lä cui, bä waiquidoimi. Yai Bada etä a̦ bejedi bufibou showao fe yadioje. Bä mölaö fe yadio. Bä nö ma bleaaö wei ma cui, bä nö wa̦lojaö fe yadio.

⁸ Bufi nofio tä lä cui, tä mabloimi. Jesucristo ebä yododabä jamö ai täbänö Yai Bada etä a̦ ma wäyäö wejei ma cui, täbä a̦ nia obi mablou. Ai täbä mö feduwänö, täbä caficö a̦ shominajaalanö Yai Bada etä a̦ ma wäyäö wejei ma cui, täbä caficö a̦ nia obi shominajaaö mablou. Ai täbä mö feduwä lä cui, Yai Bada etä a̦ ja täbä bufi ma dao wei ma cui, bufi dao etä nia obi mablou. Ö̦jö tä bluca nia ma mablou wei ma cui, täbä bufi lä nofio wei tä nia shi̦lo mabloimi. Ö̦jö tä yai nia feiblou.

⁹ Yai Bada tänö bämalecö fa dobälönö, bämacö bufi ma dao wei ma cui, bämacö bufi walalawä bäwä. Jesucristo ebä yododabä jamö bäma etä a̦ wäyäbä, Yai Bada tänö bämalecö ma dobäö wei ma cui, ijede bäma tä shi̦lo daö bäwä.

¹⁰ Obi, bäma tä daö jödödöo däjä, ijede bäma tä daö lä bäle tä nia ca̦i mladou. Tä lä doblale tä nia cuo malä waiquii.

¹¹ Ei malä cui. Ya osheo däjä, ya wa̦ faö osheoma. Ijilu bä bufi lä cuaablalou weinaja ya bufi cuaablaloma. Ijilu bä bufi daeo lä culenaja ya bufi ca̦i daeo cuaama. Ya fa badalönö, ijilu bä lä cuaaö weinaja ya cuaaö mlalayoma.

¹² Möle mö shami ajamö bäma täbä manashi möö cuo lä bädao weinaja, Yai Bada bäma a manashi möö cua bädaa lä cule. Obi bäma tä dablaö walalao wä. Fei däjä, Yai Bada lija ya bufi ijede jaducäblou ma cule, ö̦jö däjä Yai Bada tänö camiyä wale daö walalawä lä culenaja, camiyänö ya nia daö walalao cuo mö feduo.

¹³ ¿Ö̦jö tawä? Bämacö nia cuaaö fujeblou lä mlai, abenaja tä cua. Bufi shalililanö Yai Bada bäma a nofi nia mölabou. Ö̦jö lija bämacö nia shi̦lo mölaö. Bämacö bufi nia ca̦i shi̦lo nofio. Inaja bämacö nia shi̦lo cuaadii ma cui, bämacö bufi lä nofio wei tä ja, bämacö bufi mö yai blucaobä. ¡Inaja lä yai!