1 Corintios 12 - Biblia Yanowamö

Yai Bada tä Bufinö täbä bayeli lä jibäö wei tä a̦

¹ Iba wamacö. Yai Bada tä Bufinö bämalecö bayeliblabä bämalecö dobäö talei. Bämacö nö wa̦lojabä täbä lä jibädaö wei täbä ja, bämacö mojodumabou bufiomi.

² Yai Bada wama a dano mlai ja, wamacö bufi jaba yacläablaloma. Täbä a̦ nö ijidubö faö ma mlai ma cui, wama täbä bufiblaö dicooma.

³ Wamacö bufi jaba yacläma yalo bämacö cadidamaö lä cule, wamacö bufi wedinajamou mlaobä. ¿Ö̦jö tawä? Yai Bada tä Bufinö a wa̦ lä faö wei a lä cui, Jesús a wa̦fa nia wa̦lidiwä taimi. Inaja showawä, Yai Bada tä Bufi lija a bufi taamamou lä mlai a lä cui, “Jesús Bada cätä waiquiwä”, a nia cuimi.

⁴ Täbä nö bluca wa̦lojaö shedecobä, Yai Bada tänö täbä dobädaö. Täbä nö wa̦lojodamabä täbä lä jibäö wei täbä bluca shomiblawä ma cui, Yai Bada ö̦jö a Bufi showawänö, täbä bluca jibäö cuaaö.

⁵ Yai Bada lija täbä ojodamou shedecobä tä ma bluca wei ma cui, Yai Bada moli tä showawä lija täbä bluca ojodamou.

⁶ Täbä ojodamou shedecobä jamö täbä bluca dodijabä, Yai Bada tänö täbä nö bluca wa̦lojodamaö shedecou showao.

⁷ Yai Bada tänö täbä bufi bluca fa jaducäblamanö, tä Bufi läa nö ö̦jöböleije. Tä lä jibädaö wei tänö täbä nö fa wa̦lojodonö, Jesucristo ebä bluca bayeliblamou.

⁸ Yai Bada tä Bufinö, ai a wa̦ nö fa wa̦lojoblamanö, a wa̦ faö moyawäobä etä jibäö. Ai a wa̦ nö fa wa̦lojoblamanö, a wa̦ faö walalaobä etä jibäö mö feduo, ö̦jö tä Bufi showawänö.

⁹ Ai a bufi nö fa wa̦lojomabonö, ö̦jö tä Bufi showawänö Yai Bada tä nofi mölabobä etä jibäaö. Ö̦jö moli tä Bufi showawänö ai a bufi fa lofotomabonö, jalili bä jalomabä etä ca̦i jibäaö mö feduo.

¹⁰ Ai a nö wa̦lojoblamaö mö fa fedulonö, tä nö lä quilijii tä wawämabä etä li ca̦i jibäaö mö feduo. Ai a nö wa̦lojoblamaö mö fedua fa showadalonö, Jesucristo ebä lä yododaö wei jamö etä a̦ wäyäbä etä ca̦i li jibäaö. Ai a mö feduwä lä cui, a bufi moyawämabou yalo, tä a̦ lä wäyämou wei tä a̦ nö bejedi ö̦jöböamobä etä li ca̦i jibäaö mö feduo. Yai Bada tä Bufinö täbä bufi lä taamaö wei däjä, tä nö bejedi ö̦jöböaö showaobä. Fecula bä läo lä ja̦too wei, ö̦jö bä nö ö̦jöböaö mö feduo showaobä etä ca̦i jibäaö. Ai a mö feduwä lä cui a fa bayelibonö, a caficö a̦ shominajaalanö tä a̦ wäyäbä etä ca̦i jibäaö showadao. Ai a bufi fa bayeliblanö, a caficö a̦ lä shominajaaö wei tä a̦ ja a bufi jaducäblobä etä ca̦i jibäaö, tä a̦ fe dolemabä.

¹¹ Yai Bada moli tä Bufi showawänö etäbä bluca jibädaö fa cuaanö, camanö täbä dobäö lä bufio weinaja, täbä dobäö cuaaö.

Cristo lija bämacö lä yädäblamou wei tä a̦

¹² Yanowamö wa moli ma cui wa bayucuwä. Wa bayucuwä ma cule wa moli showawä. Cristo lija bämacö lä yädäo wei, inaja tä cuwä mö feduwä.

¹³ Yai Bada tä Bufinö, Cristo lija bämalecö bluca yädämaquema. Judio bä ma cui, judio bä lä mlai bä ma cui, täbä a̦ fuamobä bä lä tabou wejei bä ma cui, bä tabou lä mlajei bä ma cui, Cristo lija bämalecö bluca yädämaquema. Yai Bada tä Bufi ma moli wei ma cui, bluca bämacönö bäma a Bufi tabou. A bälöo shedequewä.

¹⁴ Wa lä bayucui wa tetewä.

¹⁵ Bei wa mamicö a̦ faö fa cunoja, “¿Wedi tabä bei ya imicö shi̦lo cuo mlai, ya mamicö li cua dicoquema?”, wa mamicö cuu fa cunoja, ¿wa mamicö bayucuwä mablou majölayou daanö?

¹⁶ Bei wa yömöcacö a̦ faö fa cunoja, “¿Wedi tabä bei ya mamocu shi̦lo cuo mlai, ya yömöcacö li cua dicoquema?”, wa yömöcacö cuu fa cunoja, ¿wa yömöcacö shadio mablou majölayou daanö?

¹⁷ Bei wa mamocu shi̦lo yami cuo fa cunoja, ¿wedi tänö wa tä a̦ nö li ji̦lilebö wei? Bei wa yömöcacö shi̦lo yami cuo fa cunoja, ¿wedi tänö wa tä nö li u̦cucabö wei?

¹⁸ Ö̦jö ma cui, inaja Yai Bada tänö bämalecö tablanomi. Bämalecö bayucamaö lä bufiono weinaja, inaja showawä bämalecö tablaö showalayoma.

¹⁹ Wa bayucuwä mlao fa cunoja yanowamö wa nö cuobö mlai.

²⁰ ¿Ö̦jö tawä? Wa bayucuwä ma cui moli wa waiquiwä.

²¹ Bei wa mamocu ma cule ma cui, wa imicö bufiblamou. Bei wa fe ma cule ma cui, wa mamicö bufiblamou.

²² ¿Ö̦jö tawä? Ai wa lä bayucui tä bufiblamoimi ma cui, wa yai bayeliobä cätä.

²³ Ai wa lä bayucui tä ma cui, tä mömou shi̦loco quilijio mlaobä wa tä baushiblaö. Wa tä wawädobou lä quilii wei wa tä lucämaö.

²⁴ Wa tä wawädobou quilii lä mlai wa tä lucämaimi. Ö̦jö ma cui, Yai Bada tänö wa bayucublamaö lä cuaano wei tä ja, ai täbä nö bufiblamobö ma mlai ma cui täbä yai bufiblamou.

²⁵ ¿Ö̦jö tawä? Ö̦jö cudeenö wa lä bayucui täbä nö nia bleaamayoimi, täbä nia yai bayeliblayou.

²⁶ Ai wa mashi lä bayucui tä nini balaö däjä, wa nini jödödöblaliyo. Inaja showawä, ai wa mashi lä bayucui wa bayeliblou ja, bei wa comi ayäyaimou cuquei.

Bämacö bayeliblayobä bämacö

²⁷ Jesucristo lija wamacö lä cule, jai moli wamacö bayucuwä cuwä. Jesucristo lija wamacö bluca yädäa.

²⁸ Cama ebä lä yododaö wei bä bayeliblayobä, Yai Bada tänö bä nö bluca wa̦lojomabou. Jesucristonö yamalecö lä shimöleno wei ei yama ecö balöwä. Ö̦jö däjä, cama ebä yododabä jamö Yai Bada etä a̦ wäyäbeje ai bä ca̦i tablamaö nomöjöoma. Ö̦jö däjä, cama ebä damabeje ai cäbä. Ö̦jö däjä, tä nö lä quilijii tä wawämabeje, ö̦jö bä ca̦i mö feduwä. Ö̦jö däjä, jalili täbä jalomabeje, ö̦jö bä ca̦i. Täbä bayeliblabeje bä ca̦i. Täbä cadidamabeje bä ca̦i. Täbä caficö a̦ shominajaalanö etä a̦ wäyäbeje bä ca̦i.

²⁹ ¿Ö̦jö tawä? A wa̦no wäyäö cuaabeje, Jesucristonö bluca jödödöwä täbä shimaimi. Cama ebä lä yododaö wei jamö Yai Bada etä a̦ wäyäbeje, täbä ca̦i bluca tablamaimi. Inaja showawä, Yai Bada etä a̦ ja täbä damabeje, täbä bluca cublou malä mlai. Tä nö lä quilijii tä wawämabeje, täbä nö bluca ca̦i wa̦lojamaimi.

³⁰ Jalili täbä jalomabeje, täbä bluca dobäimi. Täbä caficö a̦ shominajaalanö täbä a̦ fabä, täbä ca̦i bluca cuomi. Ö̦jö bä caficö a̦ lä shominajaaö wei bä a̦ fe dolemabeje, täbä ca̦i bluca dobäimi.

³¹ Bamacö bayeliblayobä, Yai Bada tä Bufinö bluca täbä ja bämalecö dobäö ma shedecou wei ma cui, tä yai lä dodijidai tä da bufiblaje. ¿Ö̦jö tawä? Fei däjä, dodijidawä tä yai lä cui ya tä nia jimaö majöo.