1 Corintios 11 - Biblia Yanowamö

¹ Cristo ya owämaö lä cuaaö weinaja, wamale owämaö cuaaö mö da feduo.

Jesucristo ebä yododabä jamö bä nia lä cuaano wei tä a̦

² Wamacö dodijaö waiquiwä yalo, cafä wamacö lija ya bufi doblalou. Ya lä cuaaö wei wamale nofi jaducäbou yalo ya bufi doblao. Cafä wamacö lija ya tä a̦ wäyäö fe lä dolemono wei, wama tä a̦ nofi cadidibou ja, ya bufi ca̦i doblalou.

³ Ö̦jö ma cui, ei wama tä a̦ ca̦i däaö mö feduobä. Wa̦lo bä lä cui, Cristo a nosie fuabeje cäbä. Inaja showawä, suwä bänö bä fe̦yalobö ebä nosie fuaö mö feduobeje. Cristonö cama Yai Bada tä nosie fuabä, ö̦jö bei a.

⁴ Yai Bada wama ecö lä yododaö wei däjä, wa̦lo wamacö lä cuinö, Yai Bada lija wamacö nö bayeli nacao ja, fe yojolanö wamacö a̦ nia faimi. Inaja showawä, wama etä a̦ wäyäö ja, fe malocolanö wama tä a̦ nia wäyäö. Fe yojolanö wamacö nö bayeli nacao dicoo ja, fe yojolanö wama etä a̦ ca̦i wäyäö dicoo ja, tä doblaami. Jai Cristo wama a nö waiblaö tä cuwä dicoo.

⁵ Ö̦jö ma cui, inaja suwä bä nia cuaaimi. Wamacö lä yododoo wei jamö, fe yojoo mlalanö Yai Bada lija suwä bä nö bayeli nacao dicoo ja, fe yojoo mlalanö etä a̦ ca̦i wäyäö dicooje ja, tä doblaami. Jai bä fe̦yalobö bä nö waiblaöje tä cuwä. A fe suwä malocoshiblaöje däjä, a mömou nö quilijiwä lä culenaja tä cuwä.

⁶ ¿Ö̦jö tawä? Cama suwä bä fe yojoo bufiomi dicoo ja, bä feta u̦cu joyamou showaobä, ö̦jö lä. Ö̦jö ma cui bä fe malocoblamou quilii ja, bä fe yai yojoobä, ö̦jö lä.

⁷ Wa̦lo täbä fe yojoobä tä cuami. Yai Bada tänö cama a lä culenaja a wa̦lo tablaö malä cadidiono wei. Täbä fe yojoomi anö, Yai Bada tä nö lä wa̦lojaö wei tä jimaöje. Ö̦jö ma cui suwä bä fe nia shi̦lo yojoo. Bä fe yojoo anö, jai bä fe̦yalobö e a̦fa doblao taöje tä cuwä.

⁸ Suwä a ja, wa̦lo a tablano malä mlai. Wa̦lo a ja, suwä bei a tablalema.

⁹ Ei malä cui. Suwä a befi wa̦lo a tablanomi. Ma, wa̦lo a befi suwä bei a tablalema.

¹⁰ Ö̦jö cudeenö, suwä a fe nia shi̦lo yojoo. Bä fe̦yalobö e a̦fa bada taö ja, a fe yojoquei. A̦jele bä lä doblaladi bä mamo malä showale.

¹¹ Inaja tä cua ma cule, Bada tä Jesucristo lija bämacö bufi lä cuo wei, bämacö nofi taboyobä bämacö. Wa̦lo bänö suwä bä bufiblaö lä cuaaö wejeinaja, suwä bä ma cuinö, wa̦lo bä ca̦i bufiblaö mö feduo showaoje.

¹² Wa̦lo a ja, a suwä jaba ma tablaleno wei ma cui, fei däjä suwä lija wa̦lo bä cublou nomöjöo malä cui. Suwä wamacö ma cui, wa̦lo bämacö ma cui, Yai Bada tänö bämalecö bluca malä tablaö wei.

¹³ ¿Ei wama tä nö bejedi ö̦jöböaimi tawä? Wamacö lä yododaö wei jamö, fe yojoo mlalanö Yai Bada lija suwä bä nö bayeli nacao ja, ¿tä mömou nö quilijiwämi daanö?

¹⁴ Yedu ja ma cui, inaja Yai Bada tänö täbä bluca malä taamano wei. Wa̦lo täbä möcö labe malä mlai. Täbä feta u̦cu nofi labe jushuwä.

¹⁵ Ö̦jö ma cui suwä bä möcö lä labaö wei däjä, bä nofi liyäjäwä doablaöje. Jai bei feta u̦cu ja bä fe yojoo showaobä, bä feta u̦cu shi̦co malä jibämoqueno wei.

¹⁶ Inaja ya bä nowa shi̦lo ma taö wei ma cui, ai anö wale a̦ ji̦liaö bufiomi ja, abenaja ya cuu. Yama täbä lä yömölaö wei jamö, inaja yama täbä shi̦lo taamaö. Shominaja ya täbä taamaö majöobä tä cuami. Yai Bada lija täbä bluca lä yododaö wei, inaja täbä shi̦lo bluca cuaaö blaucou.

Bä iyaö ca̦i yododabä jamö bä doblono lä mlai tä a̦

¹⁷ Ai tä ja wamacö ma dodijaö wei ma cui, ya tä a̦ nia wäyäö lä nomöjöo wei tä ja, bämacö a̦fa dodijaö taimi. Wamacö lä yododaö wei däjä wamacö dodijaimi. Wamacö bufi bayeliblayoimi, wamacö bufi shi̦lo wa̦lidiamayou dicoo.

¹⁸ ¿Ö̦jö tawä? Abenaja balöwä. Wamacö lä yododaö wei däjä wamacö a̦ jo̦wa ji̦liayoimi. Ai wama bä a̦ ji̦liaö mlai, wama bä nofi lä yaibou wei wama bä a̦ shi̦lo macocaö dicoo. Ö̦jö ya tä a̦ lä ji̦liaö wei däjä, “Tä a̦ bejedi ja̦toicätä”, ya bufi cuu.

¹⁹ Showadi inaja täbä malä cuaaö wei. Ai täbä shominajaaö mlao fa cunoja, täbä lä bejedimou wei täbä nö bejedi dablamobö mlai.

²⁰ Wamacö bluca iyaö mö yododaö däjä, “Bada tänö tä lä jimöqueno wei, yama tä taö lä cule”, wamacö bufi jole cuu ma cui, wama etä taimi.

²¹ Abenaja ai bä malä cuaaö wei. Nii bä ca̦i waloqueije. Ai bä nö dabou mlajei bä balöö fa dicoonö, bä shi̦loco lä waloo wei bä daleije. Ai bä ofi nö bleaaö. Ai bänö nashiwä toubä bluca coaö fa ayaojenö, bä shi wa̦liblou.

²² ¿Wedinaja tawä? Wamacö iyabä, wama toubä coabä, ¿wamacö yafibö cuami tawä? Yai Bada ebä lä yaibole, ¿wama bä nö waiblaö dicoo tawä? Bä lä ofäö wei, ¿wama bä bufi quilijamaö dicoo tawä? ¿Wedinaja bämacö nowa li taö dodijiobä? ¿Bämacö nofi dodijaö doablabä daanö? Ma, ö̦jö tä ja bämacö nofi doablaimi.

Jesucristo e a̦fa ji̦shöma lä wäyäno wei tä a̦

²³ Bada tä Jesucristo lija camiyänö ya tä a̦ lä däleno wei, cafä wamacö lija ya tä a̦ fe dolemaö waiquioma. Abenaja tä cuoma. Bä nö lä nabämono wei bä lija, Bada tä Jesús a jimaö fe jaluo lä bufiono wei däjä, nii a dälema.

²⁴ Nii a ja, Yai Bada lija a bufi a̦fa doblalou fa wäyämonö, a joyolalema. Abenaja bä nowa tama. —Ei nii a lä cui, camiyä ei bei ya ya̦ji nö owä. Cafä wamacö bayeliblamobä, ya nia lä jiböo wei. Bämacö iyaö lä cuaalenaja bä cuaaö da juo, wamale nofi jaducäbobä, —bä nowa tama.

²⁵ Inaja showawä, bä fa iyalönö, ji̦shöma a ja, nashiwä toubä befi ca̦i däa nomöjölema. Abenaja a cuu nomöjöoma. —Yai Bada tänö tä a̦fa lä wäqueno wei tä a̦ bejedi cublobä, ö̦jö bei lä ya i̦yäbö nö owä. Ö̦jö wama tä a̦ nofi dude jaducäbobä, ei a li ji̦shima. Wamacö yododoo juobä jamö, bämacö iyaö lä cuaalenaja bä cuaaö da juo, ei wama toubä coaö däjä showadi wamale nofi jaducäbou juobä. Einaja Jesús a cuma.

²⁶ ¿Ö̦jö tawä? Nii ya wa̦fa lä tafe a ja wamacö lä iyaö wei däjä, Bada tä Jesucristo a lä nomalayono wei wama tä malä jimaö wei. Ya tä a̦fa ji̦shöma lä tafe tä ja wama toubä lä coaö wei däjä ma cui, inaja showawä. Wama a nö dabolanö, inaja wamacö nia shi̦lo cuaadii.

²⁷ Ö̦jö cudeenö, Jesucristo a nö waiblalajenö täbä iyaö bädao dicoo ja, bei ya̦jicö lä cacablamolayono wei ya̦jicö nö shi̦lo yai waiblaöje. A nö waiblalajenö toubä coaö bädao dicooje ja, bei i̦yäbö lä falayono wei i̦yäbö nö shi̦lo yai waiblaöje.

²⁸ Cama täbä bufi bejedimou mömou fa balöonö, nii a shi̦lo wabeje, toubä shi̦lo coabeje.

²⁹ Jesucristo a nö waiblalajenö ya̦jicö nö owä waöje ja, bei i̦yäbö nö owä coaöje ja, Yai Bada tänö tä nowa malä tabou wei.

³⁰ Ö̦jö tä nowa ja, ai wamacö bluca ujuduu, wamacö ca̦i jaliliaö, ai wamacö cuami malä waiquii.

³¹ Ö̦jö ma cui, camiyä bämacö bufi bejedi mömou fa balöonö, bufi jaducälanö bämacö iyaö ja, Cristonö bämalecö nia jimaimi.

³² Ö̦jö ma cui, Bada tä lä culadinö bämalecö dobloimi jimaö däjä bämalecö cadidamaö showawä, yanowamö täbä bluca waimou däjä, bämacö waimou naleo mlaobä.

³³ ¿Ö̦jö tawä? Iba wamacö. Wamacö iyaö ca̦i lä yododaö wei däjä wamacö nö daboyobä, ö̦jö lä.

³⁴ Ai a ofi bädawä ja, wamacö iyaö yododaö showao mlao däjä cama e yafi jamö a iyaö balöobä, wamacö lä cuaaö wei tä ja Yai Bada lija wamacö a̦fa tamou mlaobä. Bei. Wamale lä wa̦lino wei ai tä ja, cafä wamacö lija ya lä waloquei wei däjä bämacö yömölaö cadidio wä.