1 Corintios 10 - Biblia Yanowamö

Jaba tä a̦ ja täbä bufi lä jaducäblamaleno wei tä a̦

¹ Iba wamacö. Nö badabö bä jaba lä cuaano wei tä ja, bämacö mojodumabou bufiomi. Ö̦jölashi a feyacao däjä, täbä bluca nowamamofälöma. Modu Wacä u jamö, täbä wejediwä bucaduquefälöma.

² Ö̦jölashi a nofi mojodi jamö Moisesinö bä ca̦i lä funo wei däjä, modu u bada co̦jomo jamö bä ca̦i lä funo wei däjä, jai bä möfe bluca ojomamoma bä cuaafälöma, Moisesi ebä li jimamobä. Moisesinö bä lä nocamabono wei jamö bä bayeliblamou mö fa feduonö, a wa̦ fuaaö ojodaomaje.

³ Yai Bada tä nö lä wa̦lojaö wei tänö, yai täbä niibö fa blälämalalönö, ö̦jö täbä ja Moisesinö bä ca̦i bluca iyama.

⁴ Maa ma ja, Yai Bada tä lofotenö mau ubä fa famalönö, täbä amishi bluca co̦oma. Ö̦jö yai ma ja, täbä bayeliblamou cuaafälöma. Ö̦jö maa ma lä nojaono wei, Cristo bei ma li cuo showaoma.

⁵ Ö̦jö ma cui, ai bluca täbä nofi jushuaö fa majöonö, Yai Bada a Bufi doblaonomi. Tä ulufi wa̦lidiobä jamö täbä nomawä bluca malä yabucuomobodayono wei.

⁶ ¿Ö̦jö tawä? Yai Bada tänö ö̦jö bä nö badabö taamaö lä cuaano wei tä a̦ ja, bämacö wasöobä tä a̦ li. Wa̦lidiwä tä lä cui ja, ö̦jö bä bufi yaimou lä cuaano weinaja bämacö bufi yaimou cuaaö mlaobä.

⁷ ¿Ö̦jö tawä? Nö ijidubö täbä bädawä ma cui, ai täbänö täbä nö ijidubö bufiblaö lä cuaano wejeinaja, bä cuaa dijä. Täbä nö ijidubö nofi doablaö fa dicoojenö, abenaja tä a̦ oni taa malä balöqueno wei. Täbä iyabä, toubä ca̦i coabeje, täbä loquema. Täbä i̦liyamobä, täbä jocäcälaliyoma. Einaja tä a̦ cuu.

⁸ Ai täbä nofi lä jushublalou weinaja bämacö ca̦i cuaaö mlai. Inaja bä cuaaö fa dicoonö, moli tä mö jalu ma cui ja, 23.000 bä nomaa showadalaliyoma.

⁹ Yai Bada bäma a jushuo ca̦i lulubou mlai. Inaja ai bä cuaaö fa dicoonö, olu bänö bä bluca waicama.

¹⁰ Bämacö ca̦i nacömou mlai. Inaja ai bä cuaaö fa dicoonö, Waicalewä a lä cuinö täbä bluca waicaö showadaoma.

¹¹ Ai täbä mö feduwä lä cui täbä quiliblobä, inaja Yai Bada tänö täbä jaba taamama. Camiyä bämacö ma cui, bämacö ca̦i quiliblou nodiobä tä a̦ oniblamalema. Tä nia lä jödödöblou wei tä ajedou malä cui.

¹² Tä nö nia dedeaimi waiquiwä yalo, bä bufi da moyaweicu. “Camiyä ya bufi li lofote waiquiwä”, wa bufi lä cuu wei, wa nia dobloimi majöo.

¹³ Wamacö bufi lä wabamou wei tä ja, wamacö bufi wedinajamou mlai. Showadi täbä yanowamö bufi wabamou lä cuaaö weinaja wamacö wabamou cuaaö showawä. Ö̦jö ma cui Yai Bada wama a nofi mölabou showaobä cätä. Wamacö nö bleaamaö mlaicätä. Wamacö bufi ma wabamou wei ma cui wamacö nia bayeliblaö showao, wamacö nö wa̦lojaö fe yadiobä.

Ai täbä dodijamabeje bä lä yömölano wei tä a̦

¹⁴ Iba bämacö lä nofimaö wei wamacö lä cui. Yai Bada lija wamacö nia bayeliblamou waiquiwä yalo, nö ijidubö wama täbä bufiblaö dicoo mlai. Täbä waia da showadaalöje.

¹⁵ Wamacö bufi moyawe yalo bämacö yömölaö lä cule. Ei ya wa̦ lä fale tä ja, bä bufi da daeo.

¹⁶ Jesucristo a shämoa lä lälayono wei bäma tä nofi jaducäbobä, uba bäma toubä lä coaö wei toubä ja, Yai Bada lija bämacö bufi a̦fa doblalou wäyämou talei. Jesucristo i̦yäbö ja bämacö bufi bluca bayeliblamoma yalo, bäma i̦yäbö nö e̦le coaö. Nii bäma a lä cleaö wei bä ma cui ja, inaja showawä. A lä shämolayono wei tä ja, bämacö bufi ca̦i bluca bayeliblamoma yalo, bei bäma a nö e̦le ca̦i waö.

¹⁷ Nii moli cäcö cua, ¿ö̦jö tawä? Camiyä bämacö ma bluca wei ma cui, nii moli cäcö ja, bämacö iyaö. Nii moli cäcö ja, bämacö bluca iyalanö, Jesucristo lija bämacö lä moliblaliyono wei bäma tä jimaö.

¹⁸ Isaeli ebä lä cuaaö wei tä ja, bä bufi da daeo. Yai Bada lija a dodobobeje, yalo a shäöje. Ö̦jö tä yalo ja bä bluca lä iyaö wei, bä nofi tamayolanö bä iyaö. Yai Bada tä nofi mölabolajenö, bä yalo waö mö feduo showaoje.

¹⁹ ¿Ö̦jö tawä? Nö ijidubö täbä lija nii a lä dodobou wejei nii ja, wa caficö shamiaö mlaicätä. Nii a bädawä. Nii täbä shominajablabeje täbä nö ijidubö demi malä mlai. Nö ijidubö täbä li bädawä.

²⁰ Ö̦jö ma cui, abenaja ya cuu. Bä bufi lä mojodi wei bä lä cuinö, bä nia fa bayeliblamonö bä nii dodobouje. Inaja bä cuaalanö, fecula bä nofi yai mölabouje, Yai Bada mlai. ¿Ö̦jö tawä? Fecula bä nofi lä mölabou wejei bä lija bämacö coyocomabou bufiomi.

²¹ Bada a nomaa lä lälayono wei wama a nofi jaducäbobä, uba nashiwä wama toubä coaö waiquia ja, fecula bä befi lä cui ja wamacö nö liyo mö feduo daomi. Bada wama tä nofi jaducäbobä nii wama täcö waö ja, fecula bä befi lä cui ja wamacö nö liyo mö feduo daomi.

²² Inaja bämacö cuaaö dicoo ja, Bada a lä culadi bäma a li jushuamaö cuquei. Fecula bä lija bämalecö nofi malä jalubou wei. ¿Ö̦jö tawä? Bäma a lä jushumalei wei däjä bämacö nö nia wa̦lojaimi.

²³ Abenaja täbä cuu. “Ya cuaaö bufi lä doblao weinaja ya cuaabä lä. Tä a̦ läa malä mlai”, täbä ma cuu wei ma cui, inaja bä lä cuaaö wei tänö bä bayeliblamoimi. “Tä a̦ läa malä mlai”, bä ma cuu wei ma cui, inaja bä lä cuaaö wei tänö, täbä bufi lofotoblamaimije.

²⁴ Cama cäbä dodijaö ayaobä bä shi shi̦lo jalimou mlai, ai bä mashi dodijamabä bä shi yai jalijobä.

²⁵ Yalo bä lä lulaö wejei jamö wamacö bufi quilijou mlai, bä da däleje. Yalo bä ja wama bä wa̦lii mlai bä da walöje.

²⁶ Abenaja tä a̦ oni cuu malä balöono wei. Bita tä lä cui, Bada etä. Ö̦jamö täbä bluca lä cublai täbä ma cui, cama etäbä showawä. Einaja tä a̦ cuu.

²⁷ Jesucristo bufilewä lä mlai a lä cuinö wamacö nacaö däjä, wamacö fuu bufi doblao ja wamacö fubä. Wamacö lä dobämou wei tä ja wamacö iyabä. Yalo bä ja bä wa̦li dijejä, wamacö bufi quilijou ca̦i iyaö dicoo mlaobä.

²⁸ Ö̦jö ma cui, ai a bufi lä quilijou wei a wa̦ faö ja, “Täbä nia fa bayeliblamonö nö ijidubö täbä lija, ei bä yalo dodobou dicoo lä cufajei”, a cuu ja, bä yalo wa dijejä, ö̦jö wama a bufi nö bleaamaö mlaobä.

²⁹ ¿Ö̦jö tawä? Cafä wamacö bufi quilijou ma mlai ma cui, cama a bufi shi̦lo quilijou ayao ja, yalo wama bä nia waimi. Abenaja ai wa bufi cuu ja̦too fa cui, “Camiyä ya bufi lofotolanö ya bä nö walebö ma cui, ¿wedi tä tabä ai a bufi lä quilijou wei tänö, ya bä li waia dicolei?

³⁰ Yai Bada lija ya bufi doblalanö ya bä nö walebö ma cui, ¿wedi tä tabä ya li wasömou majöquei?”, wa bufi cuu ja̦too fa cui.

³¹ Abenaja. Wamacö lä iyaö wei tä ma cui ja, wama toubä lä coaö wei tä ma cui ja, jödödöwä wama tä lä taö wei tä ma cui ja, Yai Bada wama a nofi dodijaö doablamabä wamacö.

³² Judio bä ma cui, judio bä lä mlai bä ma cui, bä bufi nö bleaama dijejä. Yai Bada ebä lä yododaö wei bä ma cui, inaja showawä.

³³ Camiyänö ya täbä bufi shi̦lo bluca doblalamaö lä bufio weinaja, wama täbä bufi taamaö mö feduobä. ¿Ö̦jö tawä? Camiyä ya dodijabä ya shi jalimou mlai, ai ya bä dodijamabä ya shi lä jalijou weinaja wamacö cuaaö mö feduobä. Jesucristo a nofi mölabolajenö, täbä fucäamou fe yadiobä.