1 Corintios 1 - Biblia Yanowamö

Pablo a wa̦fa lä wäyämou wei tä a̦

¹ Pablo cä ya. Yai Bada tänö Jesucristo lija wale yaiamaö fa bufinö wale nacalema, wale shimabä. Camiyä ai bämacö mashi lä cui, Sodene a wa̦fa lä cule sho, yafä si oni shimaö bufi fa doblaonö, ya si oniblaö lä cule.

² Colido jamö Yai Bada wama ecö lä yododaö wei wamacö lija yafä si oni shimaö, Jesucristo lija wamacö bufi cuobä, wamacö lä yaimolayono wei wamacö lija. Yai Bada wama ecö cuobä wamacö nacalema, ai täbä bluca taamaö mö feduwä lä showainaja. Bluca täbä lä bälöblai täbänö, Bada tä Jesucristo a lä bufiblaö wejei, cama lä ebä bluca. Camiyä bämacönö bäma a nosie fuaö lä cuaaö weinaja, a nosie fuaö cuaaö mö feduoje.

³ Bei. Fayä Yai Bada lija wamacö shi̦lo bayeliblamobä, Bada tä Jesucristo lija ca̦i. Wamacö bufi shi̦lo yanöcömaboböbä. Wamacö nofi ca̦i shi̦lo ojodaboböbä.

Jesucristo lija täbä lä bayeliblamou wei tä a̦

⁴ Jesucristo lija wamacö bufi fa cuicunö, Yai Bada tänö wamacö nofi ojodabou. Ö̦jö cudeenö Yai Bada lija ya bufi a̦fa doblalou wäyämou talei.

⁵ Cama lija wamacö bayeliblamou fe malä balojoo wei. Ö̦jönö wamacö a̦ nö shi̦lo yai wa̦lojomabou. Wamacö bufi ca̦i jaducämabou fe balojowä.

⁶ Cristo yama a wa̦fa lä wäyäno wei wama tä a̦ lofotobolanö, wamacö bayeliblamou.

⁷ Ö̦jö cudeenö Bada tä Jesucristo a nia lä bädou wei wama a noshi jali dabolanö, dodijidawä wamacö cua. Yai Bada tä Bufinö täbä lä jibädaö wei täbä ja wamacö fo̦limi.

⁸ Wama tä a̦ lofote fuwäbou showaobä, Jesucristonö wamacö nia bayeliblaö shi wa̦lii, Bada tä Jesucristo a bädou däjä wamacö a̦fa dobloimi tamou mlaobä.

⁹ Yai Bada wama a nofi mölabobä cätä. Ö̦jönö wamacö nacalema, bä Ijilubö Bada tä Jesucristo sho wamacö nofi tamayobä.

Täbä bufi shedecou lä wasöno wei tä a̦

¹⁰ Iba wamacö. Bada tä Jesucristo a wa̦nö bämacö yömölaö. Moli tä a̦ showawä ja, bä bufi da shalilo. Wamacö a̦ fa majöablalonö, wamacö bufi shedecou mlai. Moli tä a̦ ja wamacö fa cadidonö, wamacö dodijabä.

¹¹ ¿Ö̦jö tawä, iba wamacö? Wamacö lä cuaaö wei tä ja, wale yömölamaje, Cloemi ebä lä cuinö. Wamacö a̦fa jo̦wa lafumayou dicoo.

¹² ¿Ö̦jö daanö? Abenaja wamacö jo̦wa cuadalou dicoo. “Pablo ya wa̦ shi̦lo yai ji̦liabä”, ai wamacö cuu. “Ma, Abolo ya wa̦ nia yai ji̦liaö”, ai wamacö cuu mö feduo. “Ma, Pedro a wa̦ yai”, ai wamacö jo̦wa cuu. “Ma, Jesucristo ya wa̦ yai ji̦liabä”, ai wamacö jo̦wa cuu mö feduwä showawä. Inaja wamacö jo̦wa bluca cuu majöablalou dicoo.

¹³ ¿Cristo a sheleleblamoa yailayo nowa tawä? Cafä wamacö bayeliblamobä, fii balitama tefi jamö, ¿camiyä Pablo wale lä shäleno wejei bei ya mada tawä? Wamacö möfe lä ojomamono wei, ¿camiyä Pablo lä ya wa̦nö wamacö möfe ojomamoma daanö?

¹⁴ Camiyänö bämaco möfe bluca ojomanomi. Clibo a lä cui, Cayo a ca̦i lä cui, ö̦jö ya cöbä möfe shi̦lo fa ojoblalönö, Yai Bada lija ya bufi doblalou,

¹⁵ camiyä ya wa̦nö wamacö möfe a̦fa ojomamou wäyämou mlaobä.

¹⁶ ¡Jai! Cama Edefana ya ebä möfe ca̦i ojoblamalema. Ai ya tä möfe ojoblamaö nofi jaducäboimi.

¹⁷ Ya bä möfe ojomabä, Jesucristonö wale shimano malä mlai. Cama dodijidawä ya etä a̦ wäyäbä, wale yai shimölema. Ö̦jö ma cui täbä a̦ faö fe lä difeliablalou wei tänö mlai. Ma, ya aca nofi jayu mölamobobä tämi. Fii balitama tefi ja, Cristo a lä shäleno wejei tä a̦ lä cui, cama tä a̦ nö wa̦lojaö waiquiwä. Cama tä a̦ lofote showawänö, täbä bufi li taamamou. Camiyä ya aca jayu nofi mölamobou fa cunoja, ya tä a̦ nö doblamabö mlai.

Yai Bada tänö täbä fucäaö bufi lä doblao wei tä a̦

¹⁸ Shobali wacä jamö täbä cadidou lä showai täbä lija, fii balitama tefi ja Jesucristo a lä shäleno wejei tä a̦ ji̦limamou nofi mojodi talei. Cama bä lija tä a̦ ji̦limamou nofi ma mojodi wei ma cui, camiyä bämacö lä fucäamou wei bämacö lija tä a̦ ji̦limamou yai walalawä. Ö̦jö tä a̦nö Yai Bada tä lofote dablamou.

¹⁹ Abenaja tä a̦ oni cuu malä balöono wei. Täbä bufi a̦fa jaducäwä lä jilabou wejei, ya etä nia doblamaimi. Täbä bufi a̦fa dao lä jilabou wejei, ya etä shi nia wa̦liamaö. Einaja tä a̦ cuu. ¿Ö̦jö tawä?

²⁰ Täbä bufi a̦fa jaducäwä ma jilabou wejei ma cui, Yai Bada tänö bä möfe nia bomabou. Moisesi tä a̦ oni lä daö wejei, bä a̦fa moyawe taö ma cujei, ö̦jö bä möfe nia ca̦i bomabou mö feduo. Ai täbä a̦ nö wa̦lojowä ma jimaö wejei ma cui, inaja showawä. Yanowamö täbänö tä a̦fa moyawe lä taö wejei, Yai Bada tänö etä a̦fa jole taö malä waiquii.

²¹ Yai Bada tä Bufi shi̦lo yai moyawe yalo, cama yanowamö täbä bufi moyawe anö a dablamou bufionomi. Cama Yai Bada yama etä a̦ lä wäyäö wei tä a̦ showawänö, täbä shi̦lo fucäaö bufi doblaoma. Ai täbä lija tä a̦ ji̦limamou nofi ma mojodi wei ma cui, ö̦jö tä a̦ bejedi lä bufibou wejei täbä shi̦lo yai fucäamou.

Jesucristo lija Yai Bada tä lofote lä dablamou wei tä a̦

²² Täbä bufi taamamou si ijejewä malä mlai. Judio bä lä cuinö, Yai Bada tä mayo shi̦lo wawämaö bufiije. Judio bä lä mlai bänö bufi moyawe tä a̦ lä cui, tä a̦ shi̦lo dayäaöje.

²³ Ö̦jö ma cui, fii balitama tefi jamö Cristo a lä shäleno wejei yama tä a̦ shi̦lo wäyäö. Judio bä lija tä a̦ ji̦limamou nofi jushuwä. Judio bä lä mlai bänö tä a̦ ji̦liaimije.

²⁴ Ö̦jö ma cui Yai Bada tänö täbä bluca lä nacaö wei täbä lija, judio bä ma cui lija, judio bä lä mlai bä ma cui lija, tä a̦ ji̦limamou walalawä. Cristonö Yai Bada tä lofote dablamaö. A bufi ca̦i moyawe dablamaö.

²⁵ Yai Bada tä a̦ nofi jo̦wa ji̦limamou mojodi ma cui, ö̦jö a bufi shi̦lo jaducäwä ayawä. A nö a̦fa wa̦lojaimi ma taö wejei ma cui, ö̦jö a shi̦lo lofote ayawä.

²⁶ Iba wamacö. Bä bufi da jaducäicu. Yai Bada tä a̦ ja wamacö bufi jaba lä jaducäblaliyono wei däjä, yanowamö täbänö wamacö nofi tabobeje wamacö bluca cuonomi. Wamacö bufi a̦fa dao tanomije. Wamacö nosie fuabeje wamacö ca̦i cuonomi. Wamacö a̦fa bada wäyänomije.

²⁷ Ö̦jö ma cui, täbä bufi a̦fa jaducäwä lä taö wejei bä lä cui, Yai Bada tänö ö̦jö bä bufi nia fa wedinajamomanö, bä bufi a̦fa jaducäwä taö lä mlajei bä li yailema. Täbä nö a̦fa wa̦lojaö lä taö wejei bä bufi nia fa wedinajamomanö, bä nö a̦fa wa̦lojaö taö lä mlajei bä lä cui, ö̦jö bä ca̦i yaia mö fedulema.

²⁸ Täbä nofi tabou lä mlajei bä ma cui, täbä nofi ca̦i lä wa̦libou wejei bä ma cui, ö̦jö bä yaialalema, täbä nofi yai lä tabou wejei täbä dobloimi dablamobä.

²⁹ ¿Ö̦jö tawä? Cama a lä cule jamö yanowamö a nofi doablamou mlaobä, inaja Yai Bada a cuaama.

³⁰ Jesucristo lija wamacö bufi fa yädäicunö, Yai Bada tänö wamacö ba̦limibou lä cule. ¿Ö̦jö tawä? Cama bufi moyawe etä lä cuinö bämacö bufi li camiyä moyawäblaliyoma. Cama dodijidawä etänö, bämacö li dodijidablaliyoma. Yai Bada bäma ecö dodijidawä cuobä, Jesucristo lija bämacö yaimoa yädälayoma. Bämalecö nowa fa co̦macönö, Yai Bada lija bämalecö ajedea comaquema.

³¹ Ö̦jö cudeenö tä a̦ oni cuu lä balöono wei, bäma tä a̦ bejedi dablaö. Yanowamö a wa̦ shi doaö bufi doblao ja, cama a nofi doamolanö mlai, Bada tä nofi shi̦lo yai doabä. Einaja tä a̦ cuu.