Bìoball air-loidhne

Yemesi 3 - Farefare Ninkaré

Tara ya zɩlɩŋa sõŋa

¹ M sɔbiisi, da kãn bɔɔra-ya tɩ ya wuu dɛna karẽnsãandõma. Se'ere n soe la, ya mi tɩ tõma sɛba n de karẽnsãandõma la sarɩyadia n wʋn dɛna toogo gãnna.

² Tõma wuu tuuri mɛ zozo'e. Nẽra sãn ka tuura a yetɔga pʋam, a de la nẽra n masɛ sɛla woo pʋam, tãna wʋn yõkra a mẽŋa sõŋa sõŋa.

³ Tõma sãn ẽŋɛ wiiri nõorɛ salba tɩ ba sakɛ ɩta tɩn boorɩ se'em, ba ĩyã la wuu ɩtɩ la tõma n boorɩ se'em.

⁴ Ken bɩsɛ-ya õornɔ n ãn se'em na, baa ban kãrgɛ se'em, dee tɩ kʋseb-kãra vugra zã'ara ba la, ba tarɩ la dɔ-pɩka wẽrgra ba, tɩ ba sẽnna wɛ'ɛsa zẽ'e-sɛka tɩ sɛka n tarɩ ba la boorɩ.

⁵ Nẽrsaala zɩlɩŋa mẽ ãn na bɛla, a de la ĩyã zẽ'a ayɩla n ãn pɩka pɩka, dee tɔgra yel-kãra. La de la bug-pɩka n tã wʋn di we-kãtɛ wuu.

⁶ Zɩlɩŋa mẽ ãn wʋ bugum na. A boe la tɩ ĩyã la pʋam tõnna tõon-be'ero tɩ la taara tɩ ĩyã la wuu. A bugum na ze'etɩ la bug-tẽŋa sã'ana tɩ vɔm wuu.

⁷ Nẽrsaala tã dũnsi buuri wuu, la bõn-ẽgla buuri wuu, la bõn-vuula buuri wuu, la sɛba n boe ko'om pʋam wuu mɛ, botɩ ba sakra ẽ.

⁸ La nẽra ka boe n tã wʋn yãŋɛ a zɩlɩŋa. A pɩrɛ la yetɔg-be'ero tɔgra ka gɔ'ɔra, a tarɩ la yabga n kʋʋrɩ.

⁹ Tɩ tarɩ la ẽŋa pʋ'ʋsra Zuudãana n de tɩ Sɔ la a yel-sõnnɛ, dee ken tara ẽ kã'ara be'em bɔ'ɔra nẽrba tɩ Nawẽnnɛ nãam tɩ ba ãna wʋ a mẽŋa la.

¹⁰ Kã'a-be'ero, la kã'a-sõma ze'etɩ la nõ-ẽŋa ayɩla pʋam yɛsra. M sɔbiisi, la ka masɛ tɩ la dɛna bɛla.

¹¹ Ko-sõma, la ko-be'ero tã wʋn bulla bulnifo ayɩla pʋam? M sɔbiisi, kẽnkãŋa tã wʋn wɔnna tã'ama?

¹² Bɩɩ sẽnsãabga tã wʋn wɔnna kẽnkãma? Bɛla, bulga n bulli ko-be'ero ka tã wʋn bulla ko-sõma.

Yɛm n ze'ele Nawẽnnɛ zẽ'am

¹³ Ãne n boe ya pʋam tẽ'esɛ tɩ ẽŋa tarɩ yɛm, la bãŋrɛ? A ẽŋɛ yel-ɩr-sõŋɔ, dee sike a mẽŋa pa'alɛ tɩ a tarɩ yɛm.

¹⁴ La, la sãn dɛna tɩ ya ɩtɩ la sũure, dee gẽela taaba, da wẽ-ya yõ'ogɔ tɩ ya de la yɛm dõma parɩm sɩ'ɩsɛ sɩra la.

¹⁵ Yɛm ẽŋa dagɩ yɛm sɛka n ze'ele Nawẽnnɛ zẽ'am. A de la tẽŋa wã zuo bõnɔ, a de la nẽrsaala bõnɔ, a ze'ele la Asũtãana zẽ'am.

¹⁶ Sũure la gẽelgɔ n boe zẽ'e-sɛka la, tõon-yooro, la tõon-be'ero buuri wuu boe la bilam.

¹⁷ La yɛm n ze'ele Nawẽnnɛ zẽ'am ãn na sõŋa ka tara dẽgrɔ, dee botɩ nẽra tara sũ-mã'asʋm la a taaba, la sũ-bʋgsʋm, ɩta sugri, zɔta nẽrba ninbãalga zozo'e, tõnna tõon-sõma zozo'e, ka bɔkra nẽrba, dee ka dɛna pʋlibsum dãana.

¹⁸ Sũ-mã'asʋm dõma n botɩ sũ-mã'asʋm bɔna nẽrba tẽŋasʋka la tõoma de la tõon-sõma n masɛ Nawẽnnɛ zẽ'am.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan