Bìoball air-loidhne

Tõoma 22 - Farefare Ninkaré

¹ A yele ba yetɩ: «M sɔdõma la m sɔbiisi, selse-ya mam n yetɩ m tɔgɛ se'em to'oge m mẽŋa ya nẽŋam.»

² Ban wõm tɩ a tɔgrɩ la Ebre yetɔga bɔ'ɔra ba la, tɩ ba go'oge malɩn sɛlsra ẽ. Tɩ a yetɩ:

³ «Mam de la Zifu, ba dɔgɛ mam na Tarsɩ n boe Silisi so'olʋm pʋam na, uge mam Zerizalɛm kalam. Tɩ Agamalɩyɛlɩ zãsʋm mam tɩ yaabdõma lɔɔ la sõŋa sõŋa. Mam daan wɩsgɛ m mẽŋa mɛ la Nawẽnnɛ tõonɛ, wʋ yãma n wɩsgɛ ya mẽŋa se'em zĩna wã.

⁴ La mam daan nãmsɛ sɛba n dolɩ Azezi sore la mɛ zozo'e, yõgɛ bʋraasɩ la pɔgsɩ botɩ ba kẽ'esɛ ba yʋ'a deem, dee kʋ basɛba.

⁵ Nawẽnnɛ kãabgɔ kẽma nẽŋadãana, la kẽma la wuu n tã wʋn yetɩ, mam n tɔgɛ se'em na de la sɩra. Mam daan to'oge gõnnɔ mɛ ba zẽ'am wɛ'ɛsa tɩ m ka bɔ Zifdõma sɛba n boe Damaasɩ la, dee yõgɛ so-ẽŋa karẽnbiisi la n boe mĩ na, tarɩ ba sẽŋɛ Zerizalɛm ka nãmsɛ ba.

⁶ La mam daan boe la sore wɛ'ɛsa ka lɛm Damaasɩ, la daan masɛ wʋ wʋntɛɛŋa wẽnnɛ zuu-tẽŋasʋka, tɩ peelem daan ze'ele saazuum darɛ wa nẽegɛ zozo'e gilge mam.

⁷ Tɩ mam lui tẽŋa, wõm kõa n yele mam yetɩ: ‹Asolɩ, Asolɩ, bẽm tɩ fʋ nãmsra mam?›

⁸ Tɩ mam lerge yetɩ: ‹Zuudãana, fõn de la ãne?› Tɩ a lerge mam yetɩ: ‹Mam de la Azezi n de Nazarɛtɩ nẽra la tɩ fʋ nãmsrɩ.›

⁹ Tɩ nẽr-sɛba n daan dolɩ mam na yẽ peelem na, dee ka wõm kõa la n tɔgrɩ la mam na.

¹⁰ Tɩ mam soke yetɩ: ‹Zuudãana, fõn yetɩ m ẽŋɛ la wãne?› Tɩ Zuudãana la yele mam yetɩ: ‹Isge sẽŋɛ Damaasɩ, tɩ ba wʋn ka yele fo sɛla wuu tɩ Nawẽnnɛ bɔ nõorɛ yetɩ fʋ ẽŋɛ.›

¹¹ La peelem na yãlgɛ mam nini mɛ tɩ mam ka yẽta. Tɩ sɛba n daan dolɩ mam na ve'ege mam tɩ tõma sẽŋɛ Damaasɩ.

¹² La bʋraa n daan boe mĩ tɩ a yʋ'ʋrɛ dɛna Ananiyasɩ. A daan sakrɩ la Nawẽnnɛ lɔɔ sõŋa sõŋa, tɩ Zifdõma sɛba n boe Damaasɩ la wuu tɔgra a yelle sõŋa.

¹³ Tɩ a wa'am wa ze'ele lɛm mam zẽ'a yele mam yetɩ: ‹M sɔbia Asolɩ, le yẽta.› Tɩ mam nini le yẽta wakat-ẽŋa mẽŋa, tɩ mam yẽ ẽ.

¹⁴ Tɩ a yele mam yetɩ: ‹Nawẽnnɛ tɩ tõma yaabdõma yʋʋn pʋ'ʋsrɩ la n looge fo tɩ fʋ bãŋɛ ẽn boorɩ se'em, la fʋ yẽ sɩra dãana la, dee tɩ a tɔgɛ la a mẽŋa nõorɛ bɔ fɔ,

¹⁵ tɩ fʋ wʋn dɛna a kaset-dãana yele nẽrba wuu, fõn yẽ dee wõm se'em na.

¹⁶ La lɛɛlɛ wã, bẽm tɩ fõn gʋ'ʋna? Isge pʋ'ʋsɛ la Azezi yʋ'ʋrɛ, botɩ ba mise fʋ ko'om pʋam tɩ Nawẽnnɛ basɛ fʋ tõon-be'ero taalɛ.›

¹⁷ La bɛla poorʋm mam daan lebe la Zerizalɛm ka bɔna Wẽnde-kãtɛ la pʋam pʋ'ʋsra, yẽ Zuudãana wʋ zãasŋɔ la,

¹⁸ tɩ a yele mam yetɩ: ‹Ẽŋɛ tɔtɔ yese Zerizalɛm, se'ere n soe la, tẽŋa la nẽrba kãn sakɛ fõn wʋn tɔgɛ mam yelle bɔ ba la.›

¹⁹ Tɩ mam lerge ẽ yetɩ: ‹M Zuudãana, nẽrba wã mi mɛ tɩ mam n daan sẽnnɩ ba wẽndeto pʋam yõgra nẽr-sɛba n bɔ fõn sɩra la, botɩ ba wẽ'era ba, dee kẽ'esra ba yʋ'a deto pʋam.

²⁰ La wakat-sɛka tɩ ba daan kʋ A'etɩɛnɩ n tɔgɛ fõn yɛla bɔ nẽrba la, mam daan boe mĩ mɛ sakɛ tɩ a kũm na masɛ mɛ, dee daan gu'ura sɛba n kʋ ẽ na futo.›

²¹ Tɩ Zuudãana la yele mam yetɩ: ‹Sẽŋɛ, mam yetɩ m tõm fʋ la bu-zãŋsɩ zẽ'am zãazãarɛ.› »

²² La nẽrba la daan selsrɩ Apolɩ yetɔga la mɛ, la ẽn wa tɔgɛ bu-zãŋsɩ yelle la, tɩ ba tɔgra ke'enke'em yetɩ: «Kʋ-ya ẽ, nẽr-ẽna ka narɩ a bɔna dũnia zuo.»

²³ Tɩ ba kaasra tagursi yɛɛsra ba futo lɔbra, dee vaara tẽntõnnɔ lɔbra saazuum.

²⁴ Tɩ sʋdaasɩ kɛ'ɛndõma kɛ'ɛma la bɔ sʋdaasɩ la nõorɛ yetɩ, ba botɩ Apolɩ kẽ bãma yi-kãtɛ la pʋam tɩ ba wẽ ẽ na ka'asa, dee soke ẽ bãŋɛ, bẽm n soe tɩ ba tĩi kaasra ẽŋa ĩyã bɛla.

²⁵ Tɩ ba lʋ ẽ yetɩ ba wẽ ẽ na ka'asa, tɩ a soke sʋda-kɛ'ɛma la n ze mĩ na yetɩ: «Sore boe tɩ ba wẽ Rom tẽŋa nu'ugo nẽra dee nãn ka di a sarɩya?»

²⁶ La sʋda-kɛ'ɛma la n wõm bɛla la, tɩ a sẽŋɛ sʋdaasɩ kɛ'ɛndõma kɛ'ɛma la zẽ'am ka soke ẽ yetɩ: «Fʋ wʋn ẽŋɛ la wãne? Bʋraa wã de la Rom tẽŋa nu'ugo nẽra.»

²⁷ Tɩ sʋdaasɩ la kɛ'ɛndõma kɛ'ɛma la sẽŋɛ Apolɩ zẽ'am ka soke ẽ yetɩ: «Yele ma: Fõn sɩrɩ de la Rom tẽŋa nu'ugo nẽra?» Tɩ a lerge yetɩ: «Ẽe!»

²⁸ Tɩ sʋdaasɩ kɛ'ɛndõma kɛ'ɛma la yetɩ: «Mam mẽŋa yɔ la ligri zozo'e dee lebge Rom tẽŋa nu'ugo nẽra.» Tɩ Apolɩ yetɩ: «Ba kɔ'ɔn dɔgɛ mam tɩ mam dɛna la Rom tẽŋa nu'ugo nẽra.»

²⁹ Tɩ sɛba n yetɩ ba wẽ ẽ na ka'asa la vuta lɛbra poorʋm. Tɩ dabeem yõkɛ sʋdaasɩ kɛ'ɛndõma kɛ'ɛma la, ẽŋa n bãŋɛ tɩ Apolɩ de la Rom tẽŋa nu'ugo nẽra dee tɩ ẽŋa botɩ ba ba ẽ na bãnsɩ la ĩyã.

Apolɩ ze Zifdõma kẽma nẽŋam

³⁰ La sʋdaasɩ kɛ'ɛndõma kɛ'ɛma la daan boorɩ tɩ a bãŋɛ la sɩra sɩra yel-sɛka n botɩ Zifdõma la dõrɛ ẽ. Tɩ beere wiige, tɩ a ba'agɛ Apolɩ basɛ. Dee bɔ nõorɛ yetɩ, Nawẽnnɛ kãabgɔ kẽma nẽŋadõma, la kẽma n po dita sarɩya la wuu lagsɛ. Tɩ ba lagsɛ. Tɩ a tarɩ ẽ sẽŋɛ ka ze'ele ba nẽŋam.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan