Bìoball air-loidhne

Tõoma 16 - Farefare Ninkaré

Atimõtɩ doose Apolɩ la Asɩlaasɩ, tɩ ba tõm Nawẽnnɛ tõoma

¹ La Apolɩ dõma sẽŋɛ ka paagɛ la Dɛrbɩ la Listri tẽnsʋm. Tɩ Azezi karẽnbia daan bɔna mĩ tɩ a yʋ'ʋrɛ dɛna Atimõtɩ, a ma de la Zifu n sakɛ bɔ Azezi sɩra. Dee tɩ a sɔ dɛna Grɛkɩ.

² Tɩ Azezi karẽnbiisi n boe Listri la Ikonim tẽnsʋm na daan tɔgra a yelle sõŋa.

³ Tɩ Apolɩ bɔɔra tɩ a dɔla la ba lɛ tõnna, daan wã ẽ Zifdõma sɛba n boe tẽn-bãma la ĩyã, se'ere n soe la, ba wuu daan mi tɩ a sɔ de la Grɛkɩ.

⁴ La ba daan dolɩ la tẽnsɩ pʋam bɩsra Azezi nẽr-kʋʋŋɔ la, dee tɔgra pa'ala ba Azezi Tõntõnɩba la, la kẽma la n boe Zerizalɛm na n looge yɛm se'em, dee yɛta ba tɩ ba sakɛ bõn-sɛba tɩ ba looge la.

⁵ Bɛla tɩ Azezi nẽr-kʋʋŋɔ la daan yẽ pãŋa Nawẽnnɛ doosgo la pʋam, tɩ ba kãllɛ pa'asra daarɛ woo.

Apolɩ boe la Trʋasɩ zãasʋm tɩ ba wi ẽ Masedʋanɩ

⁶ Tɩ Apolɩ dõma daan bɔɔra tɩ ba sẽŋɛ Azi tẽnsʋm ka mõolɛ Nawẽnnɛ yetɔga, tɩ Nawẽnnɛ Sɩa gu ba, tɩ ba doose Frizi la Galatɩ so'olʋm.

⁷ La ban sẽŋɛ ka lɛm Mizi so'olʋm na, ba boorɩ tɩ ba sẽŋɛ la Bitini, tɩ Azezi Sɩa la ka bɔ ba sore.

⁸ Tɩ ba doose Mizi tole sẽŋɛ Trʋasɩ.

⁹ La yʋ'ʋŋɔ tɩ Apolɩ bɩsɛ yẽ Masedʋanɩ nẽra wʋ zãasŋɔ la, tɩ bʋraa la zɛ a zẽ'am bɛlna ẽ yetɩ: «Wa'am Masedʋanɩ wa sõŋɛ tɔ.»

¹⁰ La Apolɩ n daan yẽ bɛla la, tõma mãasʋm mɛ tɔtɔ tɩ tɩ sẽŋɛ Masedʋanɩ, bẽm ĩyã, tõma tẽ'esɛ bãŋɛ mɛ tɩ la de la Nawẽnnɛ n wi tõma yetɩ, tɩ sẽŋɛ ka mõolɛ kõ-yẽlga la bɔ ba.

Alidi bɔ Azezi sɩra Filipi tẽŋam

¹¹ Tɩ tõma kẽ õorŋɔ bilam kɔ'ɔn sẽŋɛ Samotrasɩ. Tɩ beere wiige, tɩ tõma paagɛ Neapolisi.

¹² La tõma yãŋa ze'ele la bilam sẽŋɛ Filipi n de Masedʋanɩ tẽn-kãra la tẽŋa ayɩla. Filipi tẽŋa de la Rom dõma n soe ẽ. Tõma ẽŋɛ bilam na dabsa faa.

¹³ Tɩ vo'osgo daarɛ tɩ tõma yese tẽŋa la pʋam sẽŋɛ kʋlaa nõorʋm, tõma tẽ'esɛ mɛ tɩ zẽ'e-ẽŋa de la Zifdõma pʋ'ʋsgɔ zẽ'a. Tɩ tõma zĩ'ire bilam tɔgra bɔ'ɔra pɔgsɩ n lagsɛ.

¹⁴ La pɔka ayɩla n daan boe mĩ pʋ'ʋsra Nawẽnnɛ, tɩ a yʋ'ʋrɛ dɛna Alidi, a ze'ele la Tiyatiiri. A daan koosrɩ la fu-sõma n de gomusga. Tɩ a sɛlsra tõma yetɔga la, tɩ Zuudãana botɩ a bãŋɛ Apolɩ yetɔga la võorɛ dee sakɛ.

¹⁵ Tɩ tõma daan mise ẽŋa la a yir-dõma ko'om pʋam. Tɩ a sose tõma yetɩ: «Ya sãn sakɛ tɩ mam sɩrɩ bɔ Zuudãana sɩra mɛ, ya wa'am kẽ'era mam yire.» La a pẽrgɛ tõma mɛ, tɩ tõma sakɛ.

Apolɩ dõma boe la yʋ'a deem Filipi tẽŋam

¹⁶ Tɩ daarɛ ayɩla tɩ tõma wɛ pʋ'ʋsgɔ zẽ'am, tɩ pugla n de yamŋa tɩ kʋlkã'arga dolɩ ẽ daan tʋ'ʋsɛ tõma. Kʋlkã'arga la daan botɩ a yẽta la yel-sɛba n boe nẽŋam sẽnna tɔgra bɔ'ɔra nẽrba, la sɛba n soe ẽ na daan yẽtɩ ligri zozo'e mɛ a zẽ'am.

¹⁷ Tɩ a dɔla Apolɩ la tõma tĩi tɔgra yetɩ: «Nẽr-bãna wã de la Nawẽnnɛ n gãnnɩ sɛla wuu la tõntõnɩba, ba mõolɩ la fãarɛ sore pa'ala ya.»

¹⁸ La a ẽŋɛ bɛla la dabsa faa. Tɩ Apolɩ sũure sã'am la ẽ, tɩ a wẽrgɛ yele kʋlkã'arga la yetɩ: «Mam yetɩ fʋ la Azezi-krisi yʋ'ʋrɛ, tɩ fʋ yese dee basɛ pugla wã.» Tɩ kʋlkã'arga la yese bilam zẽ'am dee basɛ ẽ.

¹⁹ Tɩ sɛba n soe ẽ na n bãŋɛ tɩ bãma kãn le yẽ ligri a zẽ'am na, tɩ ba yõkɛ Apolɩ la Asɩlaasɩ ve'ege ba kẽ da'am ka sãm ba tẽŋa la nẽŋadõma zẽ'am.

²⁰ Tɩ ba tarɩ ba paagɛ sɛba n diti sarɩya la zẽ'am ka yetɩ: «Nẽr-bãna wã de la Zifdõma, bãma n dãmnɩ tɩ tẽŋa wã.

²¹ Ba pa'alɩ la bõn-sɛba n sisri, tɩ tõma n de Rom nẽrba kãn sakɛ ẽŋɛ.»

²² Tɩ nẽr-kʋʋŋɔ la lagɩm zɛbra Apolɩ la Asɩlaasɩ, tɩ sɛba n diti sarɩya la botɩ ba vɛ ba futo la yɛɛsɛ, dee bɔ nõorɛ yetɩ, ba wẽ ba la ka'asa.

²³ Tɩ ba wẽ ba zozo'e dee kẽ'esɛ ba yʋ'a deem, dee yele gu'ura la tɩ a gu'ura ba sõŋa.

²⁴ Ban yele bɛla la, tɩ a kẽ'esɛ ba yʋ'a de-sɛka n boe pʋam pʋam na, lʋ ba nãma lablɛ la dɔɔgɔ.

²⁵ Tɩ sõnsʋa tɩ Apolɩ la Asɩlaasɩ pʋ'ʋsra dee yõona yõoma pẽgra Nawẽnnɛ, tɩ sɛba n po bɔna yʋ'a deem na sɛlsra.

²⁶ Tɩ tẽŋa darɛ mĩim zozo'e, tɩ yʋ'a deego la mĩim la a ẽbrɛ waa wuu, tɩ kʋlɩnsɩ la wuu yo'ose, tɩ bãnsɩ la wuu ba'asɛ.

²⁷ Tɩ yʋ'a deego gu'ura la nẽegɛ isge yẽ tɩ kʋlɩnsɩ la yo'ose mɛ, tɩ a tẽ'esɛ tɩ ba yese mɛ, tɩ a fooge sʋ'a tɩ a kʋ a mẽŋa.

²⁸ Tɩ Apolɩ tɔgɛ ke'enke'em yetɩ: «Da kãn ẽŋɛ fʋ mẽŋa sɛla, tõma wuu boe la kalam.»

²⁹ Tɩ yʋ'a deego gu'ura la wi yetɩ, ba tarɩ bugum wa'am. Dee ẽŋɛ tɔtɔ kẽ deego la pʋam ka lui Apolɩ la Asɩlaasɩ nẽŋam gõgra la dabeem,

³⁰ isge tarɩ ba yese, soke ba yetɩ: «Bʋraasɩ, mam wʋn ẽŋɛ la wãne yẽ fãarɛ?»

³¹ Tɩ ba lerge ẽ yetɩ: «Bɔ Zuudãana Azezi sɩra, tɩ fõn na fʋ yir-dõma wuu wʋn yẽ fãarɛ.»

³² Tɩ ba tɔgɛ Zuudãana yetɔga bɔ ẽŋa la sɛba wuu n boe a yire la.

³³ La wakat-ẽŋa mẽŋa tɩ a tarɩ ba ka pɛ ba nõtɔ la. La bilam zẽ'am tɩ ba mise ẽŋa la a yir-dõma wuu ko'om pʋam la Azezi yʋ'ʋrɛ.

³⁴ Tɩ a tarɩ Apolɩ la Asɩlaasɩ sẽŋɛ a yire ka bɔ ba dia. Tɩ ẽŋa la a yir-dõma la wuu sũure daan ãna yẽlʋm zozo'e, ban bɔ Nawẽnnɛ sɩra la ĩyã.

³⁵ La beere n wiige, tɩ sɛba n diti sarɩya la tõm ba tõntõnɩba yetɩ, ba sẽŋɛ ka yele sɛka n gu'uri yʋ'a deego la yetɩ, a basɛ bʋraasɩ la.

³⁶ Tɩ yʋ'a deego gu'ura la tɔgɛ bɔ Apolɩ yetɩ: «Sarɩyaditba la bɔ nõorɛ yetɩ, m basɛ tɩ ya yese. Bɛla yese-ya fõrgɛ la sũ-mã'asʋm.»

³⁷ Tɩ Apolɩ yele tõntõnɩba la yetɩ: «Tõma n de Rom tẽŋa nu'ugo nẽrba, tɩ ba ka di tõma sarɩya dee wẽ tõma, kẽ'esɛ tõma yʋ'a deem, yãŋa yetɩ ba li'ise basɛ tõma? Ayɛɩ, ba mẽŋa wa'am wa yese to.»

³⁸ Tɩ tõntõnɩba la sẽŋɛ ka yele sarɩyaditba la bɛla. Tɩ dabeem kẽ ba, ban wõm tɩ Apolɩ la Asɩlaasɩ de la Rom tẽŋa nu'ugo nẽrba la ĩyã.

³⁹ Tɩ ba mẽŋa wa'am wa belem ba, botɩ ba yese, dee sose ba yetɩ, ba fõrgɛ dee basɛ ba tẽŋa.

⁴⁰ La ba yese yʋ'a deem na sẽŋɛ la Alidi yire ka tɔgɛ bɔ Azezi karẽnbiisi la bʋraanɛ dee fõrgɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan