Bìoball air-loidhne

Taitusi 2 - Farefare Ninkaré

Zãsʋm nẽrba sɩra

¹ La fõn, zãsʋm nẽrba la bõn-sɛba n masɛ la sɩra zãsŋɔ la.

² Zãsʋm bʋra-yã'asɩ tɩ ba tara ba mẽŋa sõŋa, ba dɛna nẽrba tɩ ba nannɩ, ba tara pʋtẽ'e-sõŋɔ, la ba dɛna nẽrba n dolɩ Nawẽnnɛ sɩra la sõŋa, ba tara nõŋlʋm, dee dɛna nẽrba n mã'agɛ ba sũure sẽnna nẽŋa.

³ Yele pɔg-yã'asɩ tɩ ba yel-ɩrɛ pʋam ba dɛna pʋpeelem dõma, la ba da dɛna gõngõ'osrɩba, ba da dɛna nẽrba n dɩkɛ ba mẽŋa bɔ dãam. Ba pa'ala sɛla n ãn sõŋa,

⁴ ba pa'ala pɔg-bɩ'ɩsɩ tɩ ba nõŋɛ ba sɩrba, la ba kɔma,

⁵ tɩ ba tara pʋtẽ'e-sõŋɔ, tɩ ba da ɩta dẽgrɔ, tɩ ba dɛna pɔg-mẽnsɩ, la pɔg-sõma, tɩ ba sakra ba sɩrba, tɩ nẽrba da pɔ'ɔgɛ Nawẽnnɛ kõ-yẽlga la.

⁶ Kã'an kɔmbɩ'ɩsɩ la mẽ tɩ ba tara ba mẽŋa sõŋa sɛla woo pʋam.

⁷ Fõn mẽŋa botɩ fʋ yel-ɩrɛ wuu ãna sõŋa, pa'alɛ ba ban wʋn ãna se'em, la fʋ zãsʋm nẽrba Nawẽnnɛ yetɔga la sɩra, la ninmõ'orɛ.

⁸ La fʋ tɔgra sɩra tɩ ba da tã'agɛ zɛrgɛ fɔ, tɩ yãnnɛ wʋn yõkɛ sɛba n sɩ'ɩsrɩ la, ban kãn yẽ sɛla n de be'em tɩ zẽ'am tɔgɛ la ĩyã.

⁹ Yele yamsɩ tɩ ba sakra ba zuudãandõma sɛla woo pʋam, ɩta ba sũure yẽlʋm, ba da zagsɛ ba nõorɛ,

¹⁰ la ba da zũura ba lɔgrɔ. Ba tõnna tõon-sõma pa'alɛ tɩ bãma de la sɩra dõma, bɛla tɩ Nawẽnnɛ n de tɩ Fãagra zãsŋɔ la wʋn yẽta pẽka sɛla woo pʋam.

¹¹ Bẽm ĩyã, Nawẽnnɛ botɩ tɩ bãŋɛ a yel-sõnnɛ la n de fãarɛ bɔ nẽrsaalba wuu la mɛ.

¹² A zãsnɩ tõma tɩ tɩ basɛ la sɛla n ka dolɩ Nawẽnnɛ sore, la dũnia nẽrba n boorɩ sɛla la, dee vɔa dũnia wã zuo la pʋtẽ'e-sõŋɔ, la sɩra, dee dɔla Nawẽnnɛ sore sõŋa.

¹³ Bɛla tɩ tɩ wʋn tara pʋtẽ'erɛ gu'ura sũ-yẽlga daarɛ la, daar-ẽŋa Azezi-krisi n wʋn leme wa'am la a na'am pãŋa. Ẽŋa n de tõma Nawẽnnɛ, la tɩ Fãagra.

¹⁴ Ẽŋa n dɩkɛ a vɔm bɔ tõma ĩyã, tɩ a fãagɛ tɔ tõon-be'ero wuu pʋam, dee basɛ tɩ tɩ malgɛ ãna sõŋa dɛna a mẽŋa nẽrba, mõrgɛ tõnna tõon-sõma.

¹⁵ La de la bɛla tɩ fʋ wʋn zãsʋm ba, bɔ ba bʋraanɛ, dee kã'an ba. Ẽŋɛ bɛla la nõorɛ sɛka tɩ fʋ tarɩ la. Da basɛ tɩ nẽra pɔ'ɔgɛ fɔ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan