Bìoball air-loidhne

Lilegere 9 - Farefare Ninkaré

¹ Tɩ malɛka bʋnuu dãana peebe benkonne. Tɩ mam yẽ wõrbiire n ze'ele saazuum lui dũnia zuo. Tɩ ba bɔ ẽ bog-ko'ogo saafɩbiire.

² Tɩ wõrbiire la pakɛ bog-ko'ogo la, tɩ bug-zũ'usi ze'ele bog-ko'ogo la pʋam yɛsra wʋ bug-kãtɛ zũ'usi la, botɩ wʋntɛɛŋa, la sapebsʋm sobe.

³ Tɩ tẽnta'aba ze'ele zũ'usi la pʋam yese saagɛ dũnia zuo. Tɩ ba bɔ ba toogo wʋ nãnsɩ toogo la.

⁴ La ba yele ba yetɩ ba da ẽŋɛ mõorɔ, la bõn-sɛba wuu n yesrɩ tẽŋa, la tɩɩsɩ sɛla, ba pɔglʋm nẽr-sɛba n ka tarɩ Nawẽnnɛ dãalgɔ ba dĩa zuto la mã'a.

⁵ Ba daan ka bɔ tẽnta'aba la nõorɛ tɩ ba kʋ nẽrba la, la de la ba nãmsɛ ba wõr-sɩnuu. Ban botɩ toog-sɛka nãmsra nẽrba la ãn wʋ nãŋa n ẽn dõn nẽra tɩ la dõnna se'em na.

⁶ La dabsa bãma, nẽrsaalba wʋn ɛɛra kũm, la ba kãn yẽ ẽ. Ba wʋn bɔɔra tɩ ba ki, la kũm wʋn zoe dee basɛ ba.

⁷ Tẽnta'aba la ãn wʋ wiiri n mãasʋm gu'ura zɛbrɛ, la sɛla n boe ba zuto ãna wʋ sãlma mũnsi, dee tɩ ba nẽnsɩ ãna wʋ nẽrba nẽnsɩ la.

⁸ Ba tarɩ la zomto n ãn wʋ pɔgsɩ zomto la. Dee tɩ ba yẽna ãna wʋ gɩgma yẽna la.

⁹ Ba dɩkɛ la bõnɔ n ãn wʋ kuto futo pĩ ba yõ'orɔ. La ba kempagsɩ la dãmnɛ ãn wʋ wiiri toto tɩ wiiri zozo'e ve'erɩ zɔta wɛ'ɛsa zɛbrɛ zẽ'a.

¹⁰ Ba tarɩ la zɔa wʋ nãnsɩ zɔa la dõnna. Ba zɔa bãma n bɔ ba ke'eŋo tɩ ba nãmsɛ nẽrba wõr-sɩnuu.

¹¹ Ba daan tarɩ la naba, a de la malɛk-sɛka n gu'uri bog-ko'ogo la. A yʋ'ʋrɛ la Ebre yetɔga de la «Abadõ», la Grɛkɩ yetɔga de la «Apoliyõ», n boorɩ tɩ la yetɩ «Sã'ama».

¹² Pɔspɔsɩ toogo la tole mɛ. La toogo bʋyi n wʋn ken wa'am.

¹³ Tɩ malɛka bʋyoobɩ dãana peebe benkonne. Tɩ mam wõm kõa n ze'ele sãlma kãabgɔ bĩmbĩnne n boe Nawẽnnɛ nẽŋam kʋgra banaasɩ la zẽ'am.

¹⁴ Kõa la yele malɛka bʋyoobɩ dãana n zãlɩ benkonne na yetɩ: «Lorge malɛkadõma banaasɩ tɩ ba lʋ ba, tɩ ba bɔna Efratɩ kʋl-kãtɛ zẽ'am na basɛ.»

¹⁵ Tɩ a lorge malɛkadõma banaasɩ la basɛ. Ba daan mãasʋm malɛg-bãma gu'ura la wakatɛ ẽŋa, la dabsrɛ ẽŋa, la wõr-ẽŋa, la yʋʋn-ẽŋa, tɩ ba kʋ nẽrsaalba batã woo pʋam ayɩla.

¹⁶ Tɩ ba pa'alɛ mam ba sʋdaasɩ n bã'arɩ wiiri kãllɛ, ba de la tʋsa kɔbsyi nõorɛ tʋsrɛ.

¹⁷ Tɩ mam yẽ wiiri la, la ba wi-bã'arba n ãn se'em: Ba tarɩ la kuto futo n pĩ'iri yõ'orɔ, tɩ ba mõ'ogɛ ãna wʋ bugum, dee dɛna yõosnɛ, la dõbʋʋlʋm. Wiiri la zuto ãn wʋ gɩgma zuto la. Bugum, la bug-zũ'usi, la kidibre n ze'ele ba nõa pʋam yɛsra.

¹⁸ Tɩ tooro bãma batã n de bugum, la bug-zũ'usi, la kidibre n ze'ele wiiri la nõa pʋam yɛsra la, kʋ nẽrsaalba batã pʋam woo ayɩla.

¹⁹ Wiiri la ke'eŋo boe la ba nõa, la ba zɔa pʋam. Ba zɔa la ãn wʋ bõnsɛ'ɛdõma la, ba tarɩ la zuto bãma tɩ ba tarɩ ɩta nẽrba be'em sã'ana ba.

²⁰ La nẽr-sɛba n weege tɩ tooro bãma ka kʋ ba la, ka teege yɛm basɛ ban ɩtɩ sɛla tɩ ba mẽŋa boorɩ la. Ba ken dɔla la kʋlkã'arsɩ, la baga tɩ ba dɩkɛ sãlma, la zũuro, la yõgõm, la kuga, la dɔɔrɔ mãalɛ, tɩ ba ka yẽta, ka wõnna, ka tãna sẽnna.

²¹ Ba ken ka teege yɛm basɛ ba nẽr-kʋa, la ba tɩɩm tõoma, la ba yalsɩ tõoma, la ba nayigum na.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan