Bìoball air-loidhne

Lilegere 7 - Farefare Ninkaré

Nawẽnnɛ nẽrba dãalgɔ

¹ Bɛla poorʋm, mam yẽ la malɛkadõma banaasɩ n ze dũnia sakʋgrɔ banaasɩ. Ba daan yõgɛ la dũnia kʋsebgo n ze'ele zẽ'esɩ banaasɩ la wuu, tɩ ba da vugra wẽ'erɩ tẽŋa, bɩɩ ko-kãtɛ, bɩɩ tɩa.

² La mam yẽ la malɛka ayẽma n ze'ele wẽntulle n doorɩ zẽ'a la zɔnna, a zãlɩ la vɔm dãana Nawẽnnɛ dãalgɔ bõnɔ. La a tɔgɛ la ke'enke'em yele malɛkadõma banaasɩ la tɩ Nawẽnnɛ bɔ ba nõorɛ tɩ ba sã'am tẽŋa, la ko-kãtɛ la yetɩ:

³ «Nãn da sã'am-ya tẽŋa, bɩɩ ko-kãtɛ, bɩɩ tɩɩsɩ, basɛ-ya tɩ tɩ ẽŋɛ Nawẽnnɛ tõntõnɩba la dĩa dãalgɔ, dee tɩ ya sã'am.»

⁴ Tɩ mam wõm sɛba tɩ ba ẽŋɛ ba Nawẽnnɛ dãalgɔ la sõorɛ. Ba de la nẽrba tʋskɔbga la tʋspinaasɩ la anaasɩ (144'000). Ba ze'ele la Ɩsrayɛlɩ buuri la wuu pʋam.

⁵ Azuda buuri nẽrba tɩ ba dãalɛ de la tʋspia la ayi, Arubã buuri nẽrba tʋspia la ayi, Agadɩ buuri nẽrba tʋspia la ayi,

⁶ Azɛɛrɩ buuri nẽrba tʋspia la ayi, Aneftali buuri nẽrba tʋspia la ayi, Amanase buuri nẽrba tʋspia la ayi,

⁷ Asimeyõ buuri nẽrba tʋspia la ayi, Alevi buuri nẽrba tʋspia la ayi, A'isakaarɩ buuri nẽrba tʋspia la ayi,

⁸ Azabilõ buuri nẽrba tʋspia la ayi, Azozɛfʋ buuri nẽrba tʋspia la ayi, Abẽnzamẽ buuri nẽrba tʋspia la ayi.

Nẽr-kʋʋŋɔ zozo'e n lagsɛ

⁹ Bɛla poorʋm mam bɩsrɩ mɛ, yẽ nẽr-kʋʋŋɔ zozo'e tɩ nẽra nẽra ka tã wʋn kãalɛ. Ba de la so'olʋm wuu nẽrba, la buuri wuu nẽrba, la tẽnsɩ wuu nẽrba, la yetɔga buuri wuu nẽrba. Ba daan yɛ la fu-pɛɛlsɩ zãla karkɔŋa võorɔ ba nu'usum zɛ na'am bĩmbĩnne, la Pebila la nẽŋam.

¹⁰ Ba tɔgrɩ la ke'enke'em yetɩ: «Fãarɛ ze'etɩ la tõma Nawẽnnɛ n zĩ na'am bĩmbĩnne zuo, la Pebila la zẽ'am.»

¹¹ Malɛkadõma la wuu daan ze gilge la na'am bĩmbĩnne, la kẽma, la bõn-vɔɔsɩ banaasɩ la. Ba daan ẽn ka la dũma dɩkɛ ba nẽnsɩ võglɛ tẽŋa na'am bĩmbĩnne na nẽŋam nã'asra Nawẽnnɛ

¹² yetɩ: «Asɩra, Nawẽnnɛ n soe nã'asgɔ, la na'am pãŋa, la yɛm, la yel-sõnnɛ pʋ'ʋsgɔ, la pẽka, la ke'eŋo, la pãŋa wakatɛ n ka ba'asrɩ. Amina.»

¹³ Tɩ kẽma la ayɩla soke mam yetɩ: «Ãndõma n de nẽr-bãma n yɛ fu-pɛɛlsɩ la, ba ze'ele la bɛ?»

¹⁴ Tɩ mam lerge ẽ yetɩ: «M zuudãana, fõn mi.» Tɩ a yele mam yetɩ: «Ba de la nẽr-sɛba n ze'ele toog-kãtɛ pʋam na. Ba peege ba futo mɛ Pebila la zɩɩm pʋam tɩ ba pelge.

¹⁵ Bɛla n soe tɩ ba zɛ Nawẽnnɛ na'am bĩmbĩnne na nẽŋam, tõnna bɔ'ɔra ẽ wʋntɛɛŋa la yʋ'ʋŋɔ a yire la pʋam. Sɛka n zĩ na'am bĩmbĩnne zuo la n wʋn gu'ura ba.

¹⁶ Kɔm la koyũuro kãn le yõkɛ ba, wʋntɛɛŋa la a tʋʋlgɔ kãn le wõŋɛ ba.

¹⁷ Se'ere n soe la, Pebila la n boe na'am bĩmbĩnne tẽŋasʋka la n wʋn bɩsra ba yelle, ẽŋa n wʋn tarɩ ba sẽŋɛ ko'om n bulli n bɔ'ɔrɩ vɔm zẽ'am. La Nawẽnnɛ n wʋn duuse ba nintãm wuu.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan