Bìoball air-loidhne

Lilegere 6 - Farefare Ninkaré

Bõnɔ n tabɛ zẽ'esɩ bayopɔɩ la, bayoobɩ lakrɛ

¹ La mam yẽ mɛ tɩ Pebila la lakɛ bõnɔ na n tabɛ zẽ'esɩ bayopɔɩ la ayɩla. Tɩ mam wõm bõn-vɔɔsɩ banaasɩ la ayɩla n tɔgrɩ tɩ a kõa ãna wʋ saaga n tãsrɩ la yetɩ: «Wa'am!»

² Tɩ mam bɩsra, yẽ wemõa n de pɛɛlga. Tɩ nẽra bã ẽ zãla tãpɔ, tɩ ba bɔ ẽ mũŋa. Tɩ a dɛna nẽra n yãŋrɩ, sẽŋɛ tɩ a yãŋɛ.

³ Tɩ Pebila la lakɛ bõnɔ bʋyi dãana n tabɛ la, tɩ mam wõm bõn-vɔa bʋyi dãana n yetɩ: «Wa'am!»

⁴ Tɩ wemõa n de mõlga yese. Tɩ ba bɔ sɛka n bã ẽ na ke'eŋo tɩ a yese dũnia sũ-mã'asʋm tɩ nẽrba kʋʋra taaba, dee bɔ ẽ sʋkɔbgɔ n ãn kãtɛ.

⁵ Tɩ Pebila la lakɛ bõnɔ bʋtã dãana n tabɛ la, tɩ mam wõm bõn-vɔa bʋtã dãana la n yetɩ: «Wa'am!» Tɩ mam bɩsra, yẽ wemõ-sabga. Tɩ sɛka n bã ẽ na zãla bõn-makrɩga a nu'ugo pʋam.

⁶ Tɩ mam wõm dãmnɛ n ãn wʋ kõa n ze'ele bõn-vɔɔsɩ banaasɩ la tẽŋasʋka yetɩ: «Si ligri wʋn zo'oge mɛ, tɩ nẽra daarɛ ayɩla yɔɔrɔ wʋn da si wʋlla ayɩla, dee tɩ kamãana wʋlsɩ batã dɛna nẽra daarɛ ayɩla yɔɔrɔ. La, la sãn dɛna kaam la dãam, da pa'asɛ sɛla.»

⁷ Tɩ Pebila la lakɛ bõnɔ bʋnaasɩ dãana n tabɛ la, tɩ mam wõm bõn-vɔa bʋnaasɩ dãana n yetɩ: «Wa'am!»

⁸ Tɩ mam bɩsra, yẽ wemõa n de puka. Sɛka n bã ẽ na yʋ'ʋrɛ n de Akũm, tɩ kɩ'ɩn-tẽŋa dɔla a poore. Tɩ ba bɔ ba ke'eŋo tɩ ba kʋ dũnia nẽrba banaasɩ woo pʋam nẽra ayɩla. Sʋkɔbgɔ, la kɔm, la bã'asɩ, la we-dũnsi n wʋn kʋ ba.

⁹ Tɩ Pebila la lakɛ bõnɔ bʋnuu dãana n tabɛ la, tɩ mam yẽ nẽr-sɛba tɩ ba daan kʋ ba, ban mõolɛ Nawẽnnɛ yetɔga la, dee vɔa wʋ yetɔga la n yele se'em na ĩyã, sɩɩsɩ n boe kãabgɔ bĩmbĩnne na tilum.

¹⁰ Tɩ ba tɔgra ke'enke'em yetɩ: «Zuudãana n gãnnɩ wuu n ãn sõŋa, n de sɩra dãana, fõn wʋn yuuge paagɛ la wãne dee di dũnia nẽrba sarɩya sɩbgɛ ba, ban kʋ tõma la ĩyã?»

¹¹ Tɩ ba bɔ ba nẽra woo fu-pɛɛlga, dee yele ba yetɩ ba gu fẽe, halɩ tɩ ba kʋ ba sɔbiisi n de ba tõntõn-taaba, n de ba kʋ ba wʋ bãma la, tɩ ba sõorɛ paagɛ.

¹² Tɩ Pebila la lakɛ bõnɔ bʋyoobɩ dãana n tabɛ la, tɩ tẽŋa mĩim zozo'e, tɩ wʋntɛɛŋa lebge lika wʋ tãn-sabga, dee tɩ wõrga lebge mõlga wʋ zɩɩm na.

¹³ Tɩ wõrbiɛ ze'ele saazuum sʋʋgɛ tẽŋa, wʋ kẽnkãŋa tɩ kʋseb-kãtɛ mĩim tɩ kẽnkãma sʋʋgɛ la.

¹⁴ Tɩ sagõŋɔ kilim wʋ sõŋɔ la bɔɩ. Tɩ tãnsɩ wuu, la tẽn-sɛba tɩ ko'om gilge la wuu ka le bɔna ba zẽ'esɩ.

¹⁵ Tɩ dũnia na'adõma, la nẽr-kegro, la sʋdaasɩ kɛ'ɛndõma, la bõntatba, la pãnsɩ dõma, la yamsɩ, la burkĩndõma wuu sʋgra tãnsɩ bogro pʋam, la tãmpĩisi lɛma.

¹⁶ Dee yɛta tãnsɩ, la tãmpĩisi la yetɩ: «Lui-ya tɩ zuto sʋgɛ tɔ, tɩ sɛka n zĩ na'am bĩmbĩnne zuo la da yẽta tɔ, tɩ Pebila la sũ-isgre da paagɛ tɔ.

¹⁷ Se'ere n soe la, ba sũ-isgre daarɛ paagɛ mɛ, nẽra ka boe n wʋn yãŋɛ põsɛ.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan