Bìoball air-loidhne

Lilegere 19 - Farefare Ninkaré

¹ Bɛla poorʋm, mam wõm na kõa n tɔgrɩ ke'enke'em Nawẽnnɛ yire wʋ nẽr-kʋʋŋɔ kõosɩ la yetɩ: «Aleluya! Nã'asɛ-ya Nawẽnnɛ! Fãarɛ, la nã'asgɔ, la ke'eŋo de la tõma Wẽnnaam n soe.

² Ẽŋa sarɩyadia la masɛ mɛ, dɛna sɩra. Se'ere n soe la, a di pɔg-tutulga la n daan tõnnɩ yalsɩ tõoma zozo'e sã'ana dũnia la sarɩya mɛ sɩbgɛ ẽ, ẽn botɩ a tõntõnɩba ki la ĩyã.»

³ Tɩ ba le yetɩ: «Aleluya! Nã'asɛ-ya Nawẽnnɛ. Tẽn-kãtɛ la tɩ bugum laŋɛ dita la bug-zũ'usi zonnɩ na saazuum wakatɛ wuu.»

⁴ Tɩ kẽma pisyi la anaasɩ, la bõn-vɔɔsɩ banaasɩ la ka dũma tẽŋa nã'asra Nawẽnnɛ n zĩ a na'am bĩmbĩnne zuo la yetɩ: «Amina. Aleluya! Nã'asɛ-ya Nawẽnnɛ.»

Pebila pɔgdire kibsa

⁵ Tɩ kõa ze'ele na'am bĩmbĩnne na zẽ'am yetɩ: «Yãma n de Nawẽnnɛ tõntõnɩba n zotɩ ẽ na, tarɩmdõma, la kɛ'ɛndõma, nã'asɛ-ya tɩ Nawẽnnɛ.»

⁶ Tɩ mam le wõm kõa n ãn wʋ nẽr-kʋʋŋɔ zozo'e n tɔgrɩ, dee ãna wʋ ko-kãtɛ dãmnɛ, dee ãna wʋ saaga n tãsrɩ ke'enke'em yetɩ: «Aleluya! Nã'asɛ-ya Nawẽnnɛ. Zuudãana Nawẽnnɛ n de ke'eŋo dãana la n soe na'am.

⁷ Basɛ-ya tɩ tɩ ẽŋɛ sũ-yẽlga sɩrʋm nã'asɛ Nawẽnnɛ, se'ere n soe la, Pebila la pɔgdire wakatɛ paagɛ mɛ, tɩ pɔka la mẽ mãasʋm a mẽŋa ba'asɛ.

⁸ Tɩ ba bɔ ẽ fu-sõŋɔ n yẽgrɩ ka tara dẽgrɔ, tɩ a yɛ.» Fu-sõŋɔ la de la Nawẽnnɛ nẽrba tõon-sõma.

⁹ Tɩ malɛka la yele mam yetɩ: «Gʋlsɛ yetɩ: Sɛba tɩ ba wi ba tɩ ba wa'am wa di Pebila la pɔgdire kibsa la tarɩ zu-yẽlga.» Dee le yetɩ: «Yetɔg-bãma de la Nawẽnnɛ yetɔga sɩra sɩra.»

¹⁰ Tɩ mam ka dũma tẽŋa a nẽŋam tɩ m nã'asɛ ẽ, tɩ a yele mam yetɩ: «Da ẽŋɛ bɛla! Mam mẽ de la Nawẽnnɛ tõntõnna wʋ fõn, la fʋ sɔbiisi la n sakɛ sɩra tɩ Azezi pa'alɛ la. La de la Nawẽnnɛ n de fʋ nã'asɛ.» Sɩra la tɩ Azezi puke pa'alɛ la n bɛla tɩ Nawẽnnɛ Sɩa botɩ a nõtɔ'ɔsrɩba tɔ'ɔsra tɔgra.

We-bã'ara n bã wemõ-pɛɛlga

¹¹ La mam yẽ la Nawẽnnɛ yire n yo'oge, tɩ wemõ-pɛɛlga bɔna mĩ, tɩ sɛka n bã ẽ na yʋ'ʋrɛ dɛna Atẽntẽa, la Sɩra Dãana. A diti la sarɩya tɩ la masɛ, dee zɛbra zɛbrɛ tɩ la masɛ.

¹² A nini ãn wʋ bugwitum na, dee vuge mũnsi zozo'e a zuum. A tarɩ la yʋ'ʋrɛ n gʋlsɛ tɩ nẽra ka mina ẽ, sãn dagna a mẽŋa mã'a.

¹³ La a yɛ la fu-woko n lʋsɛ zɩɩm pʋam. A yʋ'ʋrɛ de la Nawẽnnɛ yetɔga.

¹⁴ Tɩ Nawẽnnɛ yire zɛbzɛbrɩba yɛ fu-pɛɛlsɩ n ãn sõŋa ka tara dẽgrɔ, bã wemõ-pɛɛlsɩ dɔla ẽ.

¹⁵ Tɩ sʋkɔbgɔ n saasɛ tara nõorɛ ze'ele a nõorʋm yɛsra. A wʋn dɩkɛ la sʋ'a la zɛbɛ yãŋɛ so'olʋm buuri wuu. A wʋn tara la kuto dasaarɛ sɔna ba. A wʋn mẽrɛ ba la viinye biɛ wẽkrɛ bõnɔ n pa'alɩ ke'eŋo dãana Nawẽnnɛ sũ-isgre la pʋam.

¹⁶ Yʋ'ʋrɛ n gʋlsɛ a fuugo zuo, la a gere zuo yetɩ: «Na'adõma Naba, la zuudãandõma Zuudãana.»

¹⁷ Tɩ mam yẽ malɛka n ze wẽntulle pʋam n tɔgɛ ke'enke'em yele bõn-ẽgla wuu n ẽgrɩ saazuum yetɩ: «Wa'am-ya wa lagsɛ Nawẽnnɛ di-kãtɛ la zẽ'am.

¹⁸ Ya wʋn di la na'adõma nẽnnɔ, la kɛ'ɛndõma, la sʋdaasɩ nẽnnɔ, la wiiri, la wi-bã'arba nẽnnɔ, la nẽrba wuu, burkĩndõma, la yamsɩ, la kɛ'ɛndõma, la tarɩmdõma wuu nẽnnɔ.»

¹⁹ Tɩ mam yẽ dũŋa la, la dũnia na'adõma, la ba zɛbzɛbrɩba n lagsɛ taaba tɩ ba zɛbɛ la sɛka n bã wemõa, la a zɛbzɛbrɩba la.

²⁰ Tɩ ba yõkɛ dũŋa la, la põmpɔrŋɔ nõtɔ'ɔsa la n daan ẽŋɛ bõn-yãlma dũŋa la nifum pã'asɛ sɛba n to'oge dũŋa la dãalgɔ, dee nã'asɛ a bõnɔ tɩ ba mãalɛ la. Ba lobe dũŋa, la põmpɔrŋɔ nõtɔ'ɔsa la wuu la vɔɔsɩ basɛ bugum mõgrɛ n diti kidibre pʋam.

²¹ Tɩ sʋ'a la n ze'ele we-bã'ara la nõorʋm yɛsra la, kʋ sɛba n weege la. Tɩ bõn-ẽgla wuu di ba nẽnnɔ na tɩgɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan