Bìoball air-loidhne

Lilegere 16 - Farefare Ninkaré

Malɛkadõma ka'agɛ Nawẽnnɛ sũ-isgre bayopɔɩ dũnia zuo

¹ Tɩ mam wõm kõa n ze'ele Wẽnde-kãtɛ la pʋam tɔgra ke'enke'em la malɛkadõma bayopɔɩ la yetɩ: «Sẽŋɛ-ya ka ka'agɛ Nawẽnnɛ sũ-isgre la n pɩrɛ laasɩ bayopɔɩ la basɛ dũnia zuo.»

² Tɩ pɔspɔsɩ malɛka sẽŋɛ ka ka'agɛ a laaga bõnɔ basɛ dũnia zuo. Tɩ nõrtãnkɛ'ɛ-tɔɔsɩ n dõnnɩ ĩyã yõgɛ nẽr-sɛba n tarɩ dũŋa la dãalgɔ, dee nã'asra a bõnɔ na tɩ ba mãalɛ la.

³ Tɩ malɛka bʋyi dãana ka'agɛ a laaga bõnɔ basɛ ko-kãtɛ pʋam. Tɩ ko-kãtɛ la lebge wʋ nẽra n ki zɩɩm, tɩ bõn-vɔɔsɩ sɛba wuu n boe ko-kãtɛ la pʋam ki.

⁴ Tɩ malɛka bʋtã dãana ka'agɛ a laaga bõnɔ basɛ mõga, la kʋlsɩ ko'om pʋam, tɩ ko'om na lebge zɩɩm.

⁵ Tɩ mam wõm malɛka n bɩsrɩ ko'om yelle la n yele Nawẽnnɛ yetɩ: «Fõn de la pʋpeelem dãana, fõn daan boe mɛ, dee ken bɔna. Fõn di sarɩya se'em na masɛ mɛ.

⁶ Se'ere n soe la, ba kʋ la sɛba n welge to'ore dɛna fõn nẽrba, la fõn nõtɔ'ɔsrɩba tɩ ba zɩɩm yese, bɛla tɩ fõn bɔ ba zɩɩm tɩ ba yũ. Bɛla n masɛ la ba.»

⁷ Tɩ mam wõm kõa n ze'ele kãabgɔ bĩmbĩnne na zẽ'am yetɩ: «Asɩra, Zuudãana Nawẽnnɛ n de ke'eŋo wuu dãana, fõn sarɩyadia la masɛ mɛ, dɛna sɩra.»

⁸ Tɩ malɛka bʋnaasɩ dãana ka'agɛ a laaga bõnɔ basɛ wẽntulle zuo tɩ a yõ'ogɛ nẽrba la a bugum.

⁹ Tɩ tʋʋlg-kãtɛ yõ'ogɛ nẽrba, tɩ ba tʋʋra Nawẽnnɛ n de ke'eŋo wuu dãana n tara nõorɛ la tooro bãma la. La ba ka teege yɛm basɛ tõon-be'ero nã'asɛ Nawẽnnɛ.

¹⁰ Tɩ malɛka bʋnuu dãana ka'agɛ a laaga bõnɔ basɛ dũŋa la na'am bĩmbĩnne na zuo. Tɩ dũŋa la so'olʋm wuu lebge lika. Tɩ toogo basɛ tɩ nẽrba ɔbra ba zɩlɩsɩ, ba ĩyã n dõnnɩ ĩyã.

¹¹ Nõrtãnkɛ'ɛsɩ la tooro n tarɩ nẽrba la ĩyã, tɩ ba tʋʋra Nawẽnnɛ n boe saazuum na. La ba ka teege yɛm basɛ ba tõon-be'ero la.

¹² Tɩ malɛka bʋyoobɩ dãana ka'agɛ a laaga bõnɔ basɛ mõg-kãtɛ sɛka tɩ ba wi'iri tɩ Efratɩ la pʋam. Tɩ a ko'om kẽesɛ, lebge sore bɔ na'adõma sɛba n ze'ele wẽntulle doore bɔba la.

¹³ Tɩ mam yẽ kʋlkã'arsɩ batã n ãn wʋ lonno n ze'ele pʋryõŋ-yãlma la nõorʋm, la dũŋa la nõorʋm, la põmpɔrŋɔ nõtɔ'ɔsa la nõorʋm yɛsra.

¹⁴ Ba de la Asũtãana kʋlkã'arsɩ n ɩtɩ bõn-yãlma. Ba we'esɩ la dũnia na'adõma wuu zẽ'am tɩ ba lagsɛ ba, tɩ ba zɛbɛ la Nawẽnnɛ n de ke'eŋo wuu dãana, a dabs-kãtɛ la daarɛ.

¹⁵ Tɩ Zuudãana yetɩ: «Bɩsɛ-ya, mam sẽm wʋ nayiga la. Nẽr-sɛka n ka gĩsri dee yɛ a futo tarɩ zu-yẽlga, bɛla tɩ a kãn sẽnna beele tɩ nẽrba yẽta a yãnnɛ.»

¹⁶ Tɩ kʋlkã'arsɩ la lagsɛ na'adõma la zẽ'e-sɛka tɩ ba wi'iri la Ebre yetɔga tɩ «Armagedõ».

¹⁷ Tɩ malɛka bʋyopɔɩ dãana ka'agɛ a laaga bõnɔ sapebsʋm pʋam. Tɩ kõa ze'ele na'am bĩmbĩnne n boe Wẽnde-kãtɛ la pʋam zẽ'am yetɩ: «La ẽŋɛ ba'asɛ.»

¹⁸ Tɩ saaga yãgra, sũnna, tãsra, tɩ tẽŋa mĩim halɩ zozo'e. Nẽrsaalba n boe tẽŋa zuo tɛka, tẽŋa nãn ka mĩim be'em be'em wʋ bɛla.

¹⁹ Tẽŋa la n mĩim na, tẽn-kãtɛ la pãrsɛ la zẽ'esɩ batã. Tɩ dũnia so'olʋm wuu tẽnsɩ lui. Nawẽnnɛ tẽegɛ Babilɔnɩ tẽn-kãtɛ la yelle mɛ, botɩ a yũ a sũ-isgre kãtɛ n ãn wʋ dãam n boe a wannɛ pʋam na.

²⁰ Tɩ tẽn-sɛba wuu tɩ ko'om gilge, la tãnsɩ wuu bɔɩ, tɩ nẽra ka le yẽta ba.

²¹ Tɩ sakug-kãra ze'ele saazuum lui nẽrba zuto. Sakugre ayɩla tɩbsɩgɔ paagɛ wʋ kilo pinaasɩ. Tɩ nẽrba tʋʋra Nawẽnnɛ, sakuga la toogo ĩyã. Se'ere n soe la, toogo la tarɩ la pãŋa tɩ la yõsgɛ gãŋɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan