Bìoball air-loidhne

Lilegere 15 - Farefare Ninkaré

Malɛkadõma bayopɔɩ n zãlɩ ba'asgɔ tooro, la Pebila yõonɛ

¹ Tɩ mam le yẽ bõn-bãnnɛ ayẽma saazuum n de yel-kãtɛ n ẽgrɩ palẽŋa. La de la malɛkadõma bayopɔɩ n zãlɩ tooro bayopɔɩ n de ba'asgɔ tooro. Se'ere n soe la, bãma n wʋn ẽŋɛ tɩ Nawẽnnɛ sũ-yĩire la ba'asɛ.

² Tɩ mam yẽ sɛla n ãn wʋ ko-kãtɛ n yẽgrɩ wʋ bɩsga n gaam na bugum. La mam yẽ la nẽr-sɛba n zɛbɛ yãŋɛ dũŋa, la a bõnɔ tɩ ba mãalɛ, dee ka sakɛ to'oge a yʋ'ʋrɛ la kãllɛ dãalgɔ la, n ze ko-kãtɛ n yẽgrɩ wʋ bɩsga la nõorʋm. Ba zãlɩ la kõnnɔ tɩ Nawẽnnɛ bɔ ba.

³ Ba yõonɩ na Nawẽnnɛ tõntõnna Amoyisi yõonɛ, la Pebila la yõonɛ yetɩ: «Zuudãana Nawẽnnɛ n de ke'eŋo wuu dãana, fõn tõoma de la tõon-kãra, la tõon-yãlma. So'olʋm buuri wuu Naba, fõn yɛla la masɛ mɛ, la ba de la sɩra.

⁴ Zuudãana, ãne n kãn zoe fõn, nã'asɛ fõn yʋ'ʋrɛ la? Se'ere n soe la, fõn mã'a n de pʋpeelem dãana. So'olʋm wuu nẽrba wʋn wa'am wa ka dũma nã'asɛ fɔ, se'ere n soe la, fõn tõoma n masɛ la puke mɛ tɩ ba yẽ.»

⁵ Bɛla poorʋm mam bɩsɛ mɛ, yẽ tɩ Wẽnde-kãtɛ n boe Nawẽnnɛ yire la pʋam deego la yo'oge mɛ.

⁶ Tɩ malɛkadõma bayopɔɩ la n zãlɩ tooro bayopɔɩ la ze'ele Wẽnde-kãtɛ la pʋam yese, ba yɛ la fu-pɛɛlsɩ n yẽgrɩ, dee dɩkɛ sãlma sẽbrɩsɩ bobe ba yõ'orɔ.

⁷ Tɩ bõn-vɔɔsɩ banaasɩ la ayɩla bɔ malɛkadõma bayopɔɩ la sãlma laasɩ bayopɔɩ n pɩrɛ la Nawẽnnɛ n vɔa wakatɛ wuu la sũ-isgre.

⁸ Tɩ Wẽnde-kãtɛ la pɩrɛ la bug-zũ'usi n pa'alɩ Nawẽnnɛ na'am pãŋa, la a ke'eŋo. Tɩ nẽra nẽra ka tãna wʋn kẽ Wẽnde-kãtɛ la pʋam, sãn dagna tɩ tooro bayopɔɩ la tɩ malɛkadõma bayopɔɩ la zãlɩ la n ba'asɛ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan