Bìoball air-loidhne

Lilegere 12 - Farefare Ninkaré

Pɔka, la pʋryõŋ-yãlma

¹ Bõn-bãn-kãtɛ n puke saazuum. Pɔka n dɩkɛ wẽntulle pile wʋ fuugo la, tɩ wõrga bɔna a nãma tẽŋa, dee tɩ a vuge mũŋa n tarɩ wõrbiɛ pia la ayi.

² Pɔka la tarɩ la pʋʋrɛ virgra tɩ a dɔgɛ, wʋlsra kaasra, dɔka toogo n tarɩ ẽ na ĩyã.

³ Tɩ bõn-bãnnɛ ayẽma puke saazuum: A de la pʋryõŋ-yãlma n ãn kãtɛ dɛna mõlga, a tarɩ la zuto bayopɔɩ, la ɩɩla pia, tɩ mũnsi vuge a zuto la wuu.

⁴ Tɩ a zʋʋrɛ kã'asɛ wõrbiɛ batã pʋam ayɩla saazuum lobe basɛ tẽŋa zuo. Pʋryõŋ-yãlma la ze la pɔka la n yetɩ a dɔgɛ la nẽŋam gu'ura tɩ pɔka la dɔgɛ tɩ a yõkɛ a bia la obe.

⁵ La pɔka la dɔgɛ la budibla n wʋn tara kuto dasaarɛ sɔna so'olʋm buuri wuu. Tɩ ba zɛ bia la tarɩ sẽŋɛ Nawẽnnɛ zẽ'am, a na'am bĩmbĩnne na zẽ'am.

⁶ Tɩ pɔka la zoe sẽŋɛ weem, zẽ'e-sɛka tɩ Nawẽnnɛ mãasʋm a ĩyã la, bilam tɩ ba diise ẽ dabsa tʋsrɛ la kɔbsyi la pisyoobɩ.

⁷ Tɩ zɛbrɛ isge Nawẽnnɛ yire. Tɩ malɛkadõma kɛ'ɛma Amisɛlɩ, la a malɛkadõma zɛbra la pʋryõŋ-yãlma la, tɩ pʋryõŋ-yãlma la, la a malɛgsɩ mẽ zɛbra la ba.

⁸ La ba koŋe pãŋa mɛ, tɩ sore ka le bɔna tɩ ba bɔna Nawẽnnɛ yire.

⁹ Tɩ ba daan lobe pʋryõŋ-yãlma kãtɛ la basɛ. Ẽŋa n de bõnsɛla n yʋʋn boe, tɩ ba wi'ira ẽ tɩ «Dõta» bɩɩ «Asũtãana» n pã'asrɩ dũnia nẽrba wuu la. Ba lobe ẽ, la a malɛgsɩ basɛ la tẽŋa zuo.

¹⁰ Tɩ mam wõm kõa n tɔgrɩ ke'enke'em Nawẽnnɛ yire yetɩ: «Nãnannɛ wã, Nawẽnnɛ fãarɛ daarɛ paagɛ mɛ, Nawẽnnɛ yãŋa pa'alɛ a pãŋa, la a na'am mɛ, dee pa'alɛ Krisi tɩ a tõm na ke'eŋo, se'ere n soe la, ba dige sɛka n wã'arɩ tɩ sɔbiisi Nawẽnnɛ zẽ'am wʋntɛɛŋa la yʋ'ʋŋɔ la mɛ.

¹¹ La de la Pebila la zɩɩm ĩyã, la ban mõolɛ Nawẽnnɛ yetɔga la ĩyã, tɩ tɩ sɔbiisi la yãŋɛ ẽ. Ba ka zoe tɩ ba wʋn kʋ ba.

¹² Bɛla, Nawẽnnɛ yire, la yãma sɛba wuu n boe mĩ na, ẽŋɛ-ya sũ-yẽlga. La toogo n wʋn yẽ tẽŋa, la ko-kãtɛ, se'ere n soe la, Asũtãana sige ya zẽ'am la sũ-yĩire, ẽn mi tɩ a wakatɛ deege la fẽe la ĩyã.»

¹³ Pʋryõŋ-yãlma la n yẽ tɩ ba lobe ẽ basɛ la tẽŋa zuo la, a babsɛ la pɔka la n dɔgɛ bia la.

¹⁴ Tɩ ba bɔ pɔka la sɩl-kãtɛ kempagsɩ bayi tɩ a ẽkɛ sẽŋɛ weem, zẽ'e-sɛka tɩ ba wʋn diisra ẽ yʋʋma atã la pʋsʋka la, zãagɛ la bõnsɛla la.

¹⁵ Tɩ bõnsɛla la ʋkɛ ko'om a nõorʋm wʋ mõgrɛ la pɔka la poorʋm tɩ ba pe'ege ẽ fõrgɛ.

¹⁶ La tẽŋa sõŋɛ pɔka la mɛ, ya'agɛ nõorɛ fõogɛ ko'om na n ze'ele pʋryõŋ-yãlma la nõorʋm na.

¹⁷ Tɩ pʋryõŋ-yãlma la sũure yĩige la pɔka la, tɩ a sẽŋɛ ka zɛbra la pɔka la yɩɩsɩ sɛba n weege ken sakra Nawẽnnɛ nõorɛ, dee tɔgra Azezi yelle bɔ'ɔra nẽrba la.

¹⁸ Pʋryõŋ-yãlma la sẽŋɛ ka zɛ la ko-kãtɛ la nõorʋm.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan