Bìoball air-loidhne

Lilegere 11 - Farefare Ninkaré

Kaset-dõma bayi

¹ Tɩ ba daan bɔ mam mẽelŋɔ n ãn wʋ dibga tɩ ba tarɩ makra, dee yele mam yetɩ: «Isge makɛ Wẽnde-kãtɛ la, la kãabgɔ bĩmbĩnne na, dee kãalɛ nẽr-sɛba n pʋ'ʋsrɩ a pʋam na.

² La basɛ a zẽnzaka la, da makɛ ẽ, se'ere n soe la, ba dɩkɛ ẽ bɔ la bu-zãŋsɩ la, ba wʋn nẽ Nawẽnnɛ tẽŋa la mɛ wõrsɩ pinaasɩ la ayi sã'am.»

³ «Mam wʋn tõm na nẽrba bayi n wʋn ze'ele mam poorʋm tɔgɛ mam yelle. Ba wʋn yɛ la bɔra futo to'ose mam yetɔga tɔgɛ bɔ nẽrba dabsa tʋsrɛ la kɔbsyi la pisyoobɩ.»

⁴ Nẽr-bãma bayi de la Oliivi tɩɩsɩ bayi, dee ken dɛna fɩtladõma bayi n ze dũnia wuu Zuudãana nẽŋam na.

⁵ Nẽra sãn ɛɛra tɩ a ẽŋɛ ba be'em, bugum n ze'etɩ ba nõa pʋam dita ba bɛ'ɛba la. Asɩra, nẽr-sɛka n eerɩ tɩ a ẽŋɛ ba be'em, dẽnɩ tɩ a ki bɛla.

⁶ Ba tarɩ la ke'eŋo wʋn yõkɛ saaga tɩ a ka niira wakat-sɛba wuu tɩ ba to'osrɩ Nawẽnnɛ yetɔga tɔgra bɔ'ɔra nẽrba la. La ba ken tara ke'eŋo mɛ wʋn botɩ ko'om lebge zɩɩm, dee ken tara ke'eŋo wʋn botɩ tooro buuri wuu paagɛ dũnia nẽrba wakat-sɛka wuu tɩ ba boorɩ.

⁷ Ba sãn wa tɔgɛ yetɔga la ba'asɛ, dũŋa n wʋn ze'ele bog-ko'ogo la pʋam yese zɛbɛ la ba, yãŋɛ kʋ ba.

⁸ Tɩ ba kũm na wʋn gã peelem nẽŋam tẽn-kãtɛ la pʋam. Bilam tɩ ba daan ka ba Zuudãana dɔ-puurŋa zuo. Tẽŋa la yʋ'ʋrɛ n pa'alɛ ẽn ãn se'em de la Sodom, la Ezipti.

⁹ Tẽnsɩ wuu nẽrba, la buuri wuu nẽrba, la yetɔga buuri wuu nẽrba, la so'olʋm wuu nẽrba wʋn bɩsra ba kũm na la dabsa atã la pʋsʋka, dee kãn sakɛ tɩ ba dɩkɛ ba kũm na laagɛ.

¹⁰ Dũnia nẽrba sũure wʋn ẽŋɛ yẽlʋm mɛ, ban yẽ tɩ nẽrba bayi la ki la ĩyã. Tɩ ba wʋn ẽŋɛ sũ-yẽlga de'em, bɔ taaba bɔ'a, se'ere n soe la, nõtɔ'ɔsrɩba bayi la nãmsɛ nẽrba dũnia mɛ.

¹¹ La dabsa atã la pʋsʋka la poorʋm, vo'osʋm n bɔ'ɔrɩ vɔm n wʋn ze'ele Nawẽnnɛ zẽ'am wa'am wa kẽ ba pʋam, tɩ ba vo'oge isge. Tɩ dabeem zozo'e wʋn yõkɛ sɛba n yẽ ba la.

¹² La nõtɔ'ɔsrɩba bayi la wʋn wõm na kõa n ze'ele Nawẽnnɛ yire yele ba yetɩ: «Zom-ya wa'am.» Tɩ ba kẽ sawara pʋam zɔnna wɛ'ɛsa Nawẽnnɛ yire, tɩ bɛ'ɛba la bɩsra ba.

¹³ Wakatɛ ẽŋa mẽŋa, tẽŋa n wʋn mĩim halɩ zozo'e. Tɩ Zerizalɛm tẽŋa la zẽ'esɩ pia pʋam, zẽ'a ayɩla wʋn lui saam. Tɩ nẽrba tʋsa ayopɔɩ ki, tẽŋa la n mĩim na ĩyã. Tɩ dabeem wʋn yõkɛ nẽr-sɛba n weege la, tɩ ba bɔ Nawẽnnɛ n boe saazuum nã'asgɔ.

¹⁴ Toogo bʋyi dãana tole mɛ. La toogo bʋtã dãana la dee la fẽe la a wa'am.

Benkonne bʋyopɔɩ dãana

¹⁵ Tɩ malɛka bʋyopɔɩ dãana peebe benkonne, tɩ kõosɩ ze'ele Nawẽnnɛ yire tɔgɛ ke'enke'em yetɩ: «Dũnia so'olʋm lebge la tõma Zuudãana, la Krisi tɩ a tõm na n soe, la a na'am na boe la wakatɛ n ka ba'asrɩ.»

¹⁶ Tɩ kẽma pisyi la anaasɩ la n zĩ ba na'am bĩmbĩna zuto Nawẽnnɛ nẽŋam na, võglɛ nẽnsɩ tẽŋa nã'asra Nawẽnnɛ yetɩ:

¹⁷ «Zuudãana Nawẽnnɛ n de ke'eŋo wuu dãana, n daan boe, n ken bɔna la, tõma pʋ'ʋsrɩ la fõn fʋ yel-sõnnɛ, fõn dɩkɛ fʋ ke'eŋo n zo'oge vigle fʋ na'am na ĩyã.

¹⁸ Bu-zãŋsɩ wuu nẽrba sũure isge mɛ, la lɛɛlɛ wã fõn sũ-yĩire wakatɛ n paagɛ, tɩ fõn wʋn di sɛba n ki la sarɩya, la fõn wʋn yɔ fʋ tõntõnɩba la n de fʋ nõtɔ'ɔsrɩba, la fʋ nẽrba la n nã'asrɩ fõn, kɛ'ɛndõma la tarɩmdõma wuu mɛ. La de la wakatɛ tɩ fõn wʋn sã'am nẽr-sɛba n sã'anɩ dũnia la.»

¹⁹ Tɩ Wẽnde-kãtɛ n boe Nawẽnnɛ yire la yo'oge, tɩ nõor-bĩŋre daka la yẽta. Tɩ saaga yãgra, sũnna, tãsra, tɩ tẽŋa mĩim, tɩ sakuga zozo'e lui.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan