Bìoball air-loidhne

Lilegere 10 - Farefare Ninkaré

Malɛka n zãlɩ gõn-pɩka n lakɛ

¹ Tɩ mam daan yẽ malɛka ayẽma n tarɩ pãŋa n ze'ele Nawẽnnɛ yire sigra. Tɩ sawara pile ẽ wʋ fuugo tɩ a yɛ, dee tɩ gõmatɩ-tãpɔ kɔkɛ a zuugo. A nẽŋa ãn wʋ wẽntulle, dee tɩ a nãma ãna wʋ bug-zɩlɩsɩ la.

² A zãlɩ la gõn-pɩka n lakɛ a nu'usum. A dɩkɛ a zʋʋgɔ nã'arɛ taglɛ la ko-kãtɛ zuo, dee dɩkɛ a gɔbga nã'arɛ taglɛ tẽŋa zuo.

³ A daan tɔgɛ mɛ ke'enke'em wʋ gɩgnɛ n kaasɛ la. Ẽn daan tɔgɛ la, saaga n tãsɛ nõorɛ bʋyopɔɩ.

⁴ Saaga la n tãsɛ tɔgɛ la, mam yetɩ m gʋlsɛ la ban yele se'em na. La mam wõm na kõa n ze'ele Nawẽnnɛ yire tɔgɛ mam yetɩ: «Sʋgɛ sɛla tɩ saaga tãsɛ bʋyopɔɩ tɔgɛ la, da gʋlsɛ ba.»

⁵ Tɩ malɛk-sɛka tɩ mam daan yẽ tɩ a ze ko-kãtɛ la tẽŋa zuo la, n zẽkɛ a zʋʋgɔ nu'ugo saazuum,

⁶ pɔɩ la Nawẽnnɛ n boe wakatɛ wuu, n nãam saazuum, la tẽŋa, la ko-kãtɛ, la sɛla wuu n boe ba pʋam na, yetɩ: «La kãn le yuuge.

⁷ Malɛka bʋyopɔɩ dãana la sãn peebe benkonne, Nawẽnnɛ wʋn ẽŋɛ ẽn looge yɛm tɩ a ẽŋɛ se'em n sʋgɛ la mɛ, wʋ ẽn yʋʋn tɔgɛ la a nõtɔ'ɔsrɩba n de a tõntõnɩba se'em na.»

⁸ Tɩ kõa la n ze'ele Nawẽnnɛ yire tɔgɛ tɩ mam wõm na, le yele mam yetɩ: «Sẽŋɛ ka to'oge gõn-pɩka la n lakɛ bɔna malɛka la n ze ko-kãtɛ la tẽŋa zuo la nu'um.»

⁹ Tɩ mam sẽŋɛ malɛka la zẽ'am ka yele ẽ yetɩ: «Bɔ mam gõn-pɩka la.» Tɩ a yele mam yetɩ: «To'oge ẽ obe vole. A wʋn lebge la toogo fʋ pʋʋrʋm. La fʋ nõorʋm, a wʋn ãna yẽlʋm wʋ seero la.»

¹⁰ Tɩ mam to'oge gõn-pɩka la a nu'um obe vole. Tɩ a ãna yẽlʋm wʋ seero mam nõorʋm. La mam n vole ẽ na, a lebge la toogo mam pʋʋrʋm.

¹¹ Tɩ ba yele mam yetɩ: «Dẽnɩ tɩ fʋ le tɔgɛ Nawẽnnɛ yetɔga pa'alɛ la wʋn ẽŋɛ tẽnsɩ zozo'e nẽrba, la so'olʋm zozo'e nẽrba, la yetɔga buuri zozo'e nẽrba, la na'adõma zozo'e se'em.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan