Bìoball air-loidhne

Lilegere 1 - Farefare Ninkaré

Bõn-sɛba tɩ Azezi-krisi puke pa'alɛ Azã

¹ Gõŋɔ wã tarɩ la sɛla tɩ Azezi-krisi puke pa'alɛ. Nawẽnnɛ n daan bɔ ẽ bõn-bãma tɩ a pa'alɛ a tõntõnɩba sɛla n wʋn ẽŋɛ wakatɛ fẽfẽe pʋam. Azezi-krisi daan tõm na a malɛka a tõntõnna Azã zẽ'am tɩ a pa'alɛ ẽ bõn-bãma.

² Azã n gʋlsɛ sɛla wuu tɩ a yẽ la pa'alɛ tɩ la de la Nawẽnnɛ yetɔga tɩ Azezi-krisi puke pa'alɛ ẽŋa.

³ Nẽr-sɛka n karẽŋrɩ Nawẽnnɛ yetɔga tɩ a to'oge tɔgɛ wã, la sɛba n selsrɩ bõn-sɛba n gʋlsɛ gõn-ẽna wã pʋam dee sakra ba tarɩ zu-yẽlga. Wakatɛ la lɛm mɛ, tɩ bɛla wuu wʋn ẽŋɛ.

Azã pʋ'ʋsrɩ Nawẽnnɛ nẽrba n lagsrɩ tẽnsɩ bayopɔɩ

^4-5 Mam Azã n gʋlsɛ gõŋɔ wã bɔ'ɔra tẽnsɩ bayopɔɩ n boe Azi so'olʋm pʋam na Wẽndeto nẽrba. Zuudãana Nawẽnnɛ n daan boe, n ken bɔna, dee wʋn bɔna wakatɛ wuu la, la sɩɩsɩ bayopɔɩ n boe a na'am bĩmbĩnne nẽŋam, la Azezi-krisi n tɔgrɩ Nawẽnnɛ yelle sɩra, ẽŋa n ki dee dɛna pɔspɔsɩ dãana n vo'oge, dɛna dũnia na'adõma naba la, wʋn ẽŋɛ ya yel-sõnnɛ, dee bɔ ya sũ-mã'asʋm. Azezi-krisi nõŋɛ tõma mɛ, ki tɩ a zɩɩm fãagɛ tõma tõon-be'ero pʋam,

⁶ botɩ tõma dɛna a so'olʋm kãabgɔ kẽma tõnna bɔ'ɔra Nawẽnnɛ n de a Sɔ la. Ẽŋa n soe nã'asgɔ, la pãŋa wakatɛ n ka ba'asrɩ. Amina.

⁷ Bɩsɛ-ya, a boe la sawara pʋam sẽna. Nẽrsaalba wuu wʋn yẽ ẽ, baa la nẽr-sɛba n daan lʋ ẽ na. Buuri wuu nẽrba n boe dũnia wʋn kɛlla mɛ fabla a yelle. Ẽe, la de la bɛla. Amina.

⁸ Zuudãana Nawẽnnɛ n de ke'eŋo wuu dãana la yetɩ: «Mam de la pĩ'iluŋo la ba'asgɔ, mam n daan boe, n ken bɔna, dee wʋn bɔna wakatɛ wuu.»

Azã yẽ Azezi-krisi wʋ zãasŋɔ la

⁹ Mam de la Azã n de ya sɔbia n po nãmsra, lagɩm na yãma po tara pʋrɛ Nawẽnnɛ so'olʋm na pʋam, ken po lagɩm na yãma mõrgra sẽnna nẽŋa Azezi doosgo la pʋam. Mam daan tɔgɛ la Nawẽnnɛ yetɔga, la Azezi-krisi yelle, tɩ ba tarɩ mam sẽŋɛ tẽŋa tɩ ko'om gilge yʋ'ʋrɛ n de Patmõsɩ.

¹⁰ Tɩ Zuudãana daarɛ n de Lasrɩ daarɛ la, tɩ Nawẽnnɛ Sɩa bɔna la mam, botɩ mam wõm kõa n tɔgɛ ke'enke'em mam poorʋm wʋ benkonne n peebe la,

¹¹ yetɩ: «Gʋlsɛ sɛla tɩ fʋ wʋn yẽ la ẽŋɛ gõŋɔ pʋam, soolʋm bɔ tẽnsɩ bayopɔɩ la Wẽndeto nẽrba: Efɛɛzɩ, la Simirni, la Pɛrgamɩ, la Tiyatiiri, la Sardɩ, la Filadɛlfi, la Laodise.»

¹² Tɩ mam wẽrgɛ tɩ m bɩsɛ sɛka n tɔgrɩ la mam na, la mam n wẽrgɛ la, mam yẽ la sãlma fɩtladõma bayopɔɩ.

¹³ La nẽra n boe fɩtladõma la tẽŋasʋka ãna wʋ nẽrsaala dayʋa la. A yɛ la fuugo n wɔgɛ sige paagɛ a nãma, dee dɩkɛ sãlma sẽbrɩga bobe a yõ'ogɔ.

¹⁴ A zomto daan pelge mɛ ãna yɩlɩ yɩlɩ wʋ lɔnnɔ na, tɩ a nini ãna wʋ bugwitum na.

¹⁵ A nãma daan yẽgrɩ wʋ zũuro tɩ ba zuge ba bugum pʋam na, dee tɩ a kõa la ãna wʋ ko-kãtɛ dãmŋɔ la.

¹⁶ A daan zãlɩ la wõrbiɛ bayopɔɩ la a zʋʋgɔ nu'ugo. Tɩ sʋkɔbgɔ n saasɛ tara nõa ayi ze'ele a nõorʋm yɛsra. A nẽŋa daan yẽgrɩ wʋ wʋntɛɛŋa n ãn se'em na.

¹⁷ Mam n daan yẽ ẽ na, mam lui la tẽŋa a nẽŋam ãna wʋ kũm na. Tɩ a dɩkɛ a zʋʋgɔ nu'ugo paglɛ mam zuo yetɩ: «Da zoe dabeem, tɩ mam n de pĩ'iluŋo, la ba'asgɔ.

¹⁸ Mam de la sɛka n vɔɩ. Mam daan ki mɛ, la mam n wãna, mam vɔa mɛ wakatɛ wuu. Mam n tarɩ ke'eŋo sɔna kũm, la kɩ'ɩn-tẽŋa.

¹⁹ Bɛla, gʋlsɛ bõn-sɛba tɩ fʋ yẽ, sɛla n boe lɛɛlɛ wã, la sɛla n wʋn wa ẽŋɛ poorʋm na.

²⁰ Wõrbiɛ bayopɔɩ tɩ fʋ yẽ mam zʋʋgɔ nu'ugo pʋam, la sãlma fɩtladõma bayopɔɩ la võorɛ n wãna: Wõrbiɛ bayopɔɩ la de la tẽnsɩ bayopɔɩ la Wẽndeto la nẽrba gu'urba, la fɩtladõma bayopɔɩ la de la tẽnsɩ bayopɔɩ la Wẽndeto nẽrba.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan