Bìoball air-loidhne

Hiburuduma 6 - Farefare Ninkaré

¹ Bɛla, tɩ sẽŋɛ-ya nẽŋa zãsʋm bõnkɛgsɩ zãsŋɔ, dee basɛ Krisi pɔspɔsɩ yɛla la zãsŋɔ tɩ tɩ dẽŋɛ mina la. Tɩ kãn le zãsna pĩ'iluŋo yɛla la n de tɩ teege yɛm basɛ tõon-be'ero n sẽm na kũm, la tɩ bɔ Nawẽnnɛ sɩra,

² la ko'om misga zãsŋɔ, la ban paglɩ nu'usi nẽrba zuto pʋ'ʋsra yelle, la kũm vo'ore, la dũnia ba'asgɔ sarɩyadia yelle.

³ Tɩ wʋn ẽŋɛ se'em n bɛla, tɩ sẽŋɛ nẽŋa, Nawẽnnɛ sãn sakɛ.

⁴ Nẽr-sɛba n bãŋɛ Nawẽnnɛ sɩra bɔna peelem pʋam, yẽ Nawẽnnɛ yel-sõnnɛ, to'oge Nawẽnnɛ Sɩa pãŋa,

⁵ bãŋɛ Nawẽnnɛ yetɔga n ãn sõŋa se'em, dee mina dũnia sɛka n sẽm na pãŋa n ãn se'em,

⁶ bãma sãn lebe poorʋm dee basɛ Nawẽnnɛ sore, la ka tã tɩ ba le tarɩ ba leme tɩ ba teege yɛm basɛ tõon-be'ero. Se'ere n soe la, nẽr-bãma ãn wʋ ba le ka'ara Nawẽnnɛ Dayʋa la kũm dɔ-puurŋa zuo, dee yaala ẽ nẽrba tẽŋasʋka.

⁷ Tɩ dɩkɛ makrɛ: Saaga sãn niira zozo'e tɩ va'am yũura ko'om sõŋa, a bõnkɔɔla wʋn mãalɛ mɛ bɔ sɛba n kɔɔrɩ ẽ na, bɛla a yẽtɩ Nawẽnnɛ yel-sõnnɛ mɛ.

⁸ La va'am na sãn yɛsra gõ'osɩ, la mõ-yooro mã'a, a ka tarɩ yõorɔ, ba wʋn kã la be'em bɔ ẽ, la ba'asgɔ ba wʋn yõ ẽ na bugum.

⁹ M sɩr-nõŋrɩsɩ, baa tõma n tɔgrɩ wãna la, tõma mi tɩ sũure pʋam sɩra sɩra tɩ yãma boe la so-sõŋɔ n wʋn botɩ ya yẽ fãarɛ la zuo.

¹⁰ Nawẽnnɛ de la sɩra dãana, a kãn yĩm ya tõoma, la yãma n pa'alɛ tɩ yãma nõŋɛ ẽ mɛ, tõm bɔ a nẽrba, dee ken tõnna bɔ'ɔra ba lɛɛlɛ wã.

¹¹ Bɛla tõma n boorɩ se'em de la ya nẽra woo keŋe a mẽŋa bɛla, sẽnna nẽŋa ka paagɛ ba'asgɔ, yẽ bõn-sɛba tɩ a tarɩ pʋtẽ'erɛ gu'ura la.

¹² Tõma ka boorɩ tɩ ya tara zẽyãgrɛ, ɩta-ya wʋ nẽr-sɛba n bɔ Nawẽnnɛ sɩra, mõrgɛ sẽŋɛ nẽŋa yẽ sɛla tɩ Nawẽnnɛ bĩŋe nõorɛ tɩ a bɔ a nẽrba la.

Nawẽnnɛ nõorɛ tɩ a bĩŋe la ka viiri

¹³ Nawẽnnɛ n yʋʋn bĩŋe nõorɛ la Abraham na, a pɔɩ mɛ, la nẽra n ka boe gãnna a mẽŋa la ĩyã, a pɔɩ la a mẽŋa

¹⁴ yetɩ: «Asɩra, mam wʋn ẽŋɛ fʋ yel-sõnnɛ zozo'e, dee botɩ fʋ yɩɩsɩ yɩrgɛ zozo'e.»

¹⁵ Tɩ Abraham mõrgɛ sẽŋɛ nẽŋa, yẽ sɛla tɩ Nawẽnnɛ bĩŋe nõorɛ tɩ a ẽŋɛ la.

¹⁶ Nẽrsaala sãn yetɩ a pɔɩ, a pɔtɩ la sɛla n gãnnɩ a mẽŋa, tɩ pɔtɛ la dɛna sɛla n pa'alɩ tɩ ẽn yele se'em na de la sɩra, tɩ nõke'ene ba'asɛ.

¹⁷ Bɛla, Nawẽnnɛ yʋʋn boorɩ tɩ a pa'alɛ la sɛba tɩ a bĩŋe nõorɛ la ba la, tɩ ẽŋa n bĩŋe a nõorɛ se'em na ka viiri, bɛla tɩ a bĩŋe a nõorɛ dee pɔɩ pa'asɛ.

¹⁸ Nawẽnnɛ n ka parnɩ na, n ẽŋɛ bõn-bãma bayi n ka viiri. Bɛla n bɔ'ɔrɩ tõma bʋraanɛ zozo'e, tõma sɛba n basɛ sɛla woo, dee tara pʋtẽ'erɛ gu'ura sɛla tɩ a yetɩ a ẽŋɛ bɔ tɔ la.

¹⁹ Tõma n tarɩ pʋtẽ'erɛ gu'ura sɛla la botɩ tõma zɛ la kãŋkãŋɛ Nawẽnnɛ nẽŋam, wʋ ka'aga n ka tẽŋa kẽ paagɛ pʋam pʋam yõkɛ kãŋkãŋɛ la. Bɛla tɩ tõma wʋn kẽ gãŋɛ fu-sɛka n beŋe Nawẽnnɛ zẽ'e-sõŋɔ la, paagɛ Nawẽnnɛ zẽ'am.

²⁰ La de la zẽ'e-ẽŋa tɩ Azezi dẽŋɛ tõma kẽ, bɔna mĩ tõma ĩyã, dɛna kãabgɔ kẽma nẽŋadãana wakatɛ wuu ĩyã, wʋ Amelkisedɛkɩ n ãn se'em na.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan