Bìoball air-loidhne

Galatɩ 1 - Farefare Ninkaré

¹ Mam Apolɩ n de Krisi Tõntõnna n gʋlsɛ gõŋɔ wã. La dagɩ nẽrsaalba n tõm mam, la mẽ dagɩ nẽrsaalba n looge mam tɩ mam dɛna Krisi Tõntõnna. La de la Azezi-krisi, la tɩ Sɔ Nawẽnnɛ n vo'oge Azezi la n looge mam.

² Tɩ sɔbi-sɛba wuu n boe kalam na, n lagɩm na mam gʋlsɛ bɔ'ɔra yãma Azezi-krisi nẽrba n lagsrɩ Galatɩ tẽnsɩ pʋam na.

³ Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã'asʋm.

⁴ Azezi-krisi n dɩkɛ a mẽŋa bɔ tɩ ba kʋ ẽ tõma tõon-be'ero ĩyã, tɩ a fãagɛ tɔ dũnia wã be'em pʋam basɛ, wʋ tɩ Sɔ Nawẽnnɛ n boorɩ se'em na.

⁵ Ẽŋa n soe nã'asgɔ wakatɛ n ka ba'asrɩ. Amina.

Azezi kõ-yẽlga la de la ayɩla mã'a

⁶ Mam ze la yɛrɩ la yãma n darɛ basɛ Nawẽnnɛ n wi ya Krisi yel-sõnnɛ ĩyã, dee to'oge kõa ayẽma wʋ kõ-yẽlga la.

⁷ Kõ-yẽlga ayẽma ka boe. La de la nẽrba n bʋrsrɩ ya pʋtẽ'era bɔɔra tɩ ba teege Krisi kõ-yẽlga la.

⁸ Nẽra sãn mõolɛ kõ-yẽlga ayẽma bɔ ya, tɩ la dagna sɛka tɩ tõma mõolɛ bɔ ya la, baa la sãn dɛna tõma mẽŋa, bɩɩ malɛka n ze'ele Nawẽnnɛ yire, Nawẽnnɛ kã'a-be'ego bɔna a dãana zuo.

⁹ Tõma põn yele ya mɛ, la mam le yɛta ya mɛ, tɩ nẽra sãn mõolɛ kõ-yẽlga ayẽma n de to'ore la sɛka tɩ ya to'oge la, Nawẽnnɛ kã'a-be'ego bɔna a dãana zuo.

¹⁰ Bɛla, yãma tẽ'esɛ tɩ mam boorɩ tɩ nẽrba n pẽgɛ mam bɩɩ, bɩɩ Nawẽnnɛ n pẽgɛ ma? Yãma tẽ'esɛ tɩ mam boorɩ tɩ m ẽŋɛ tɩ la paagɛ la nẽrsaalba yɛm bɩɩ? Ayɛɩ, mam sãn boorɩ nɩ tɩ m ẽŋɛ tɩ la paagɛ nẽrsaalba yɛm, mam ka de nɩ Krisi tõntõnna.

Apolɩ n lebge Azezi tõntõnna se'em

¹¹ M sɔbiisi, mam boorɩ tɩ ya bãŋɛ mɛ tɩ kõ-yẽlga la tɩ mam mõolɩ la ka ze'ele nẽrsaalba zẽ'am.

¹² La mam mẽ ka to'oge ẽ nẽra zẽ'am, la mẽ dagɩ nẽra n zãsʋm mam. La de la Azezi-krisi mẽŋa n puke ẽ pa'alɛ mam.

¹³ Ya wõm mam daan ãn se'em Zifdõma sore la pʋam, daan nãmsra Azezi nẽrba la zozo'e, mõora tɩ m sã'am ba sore la.

¹⁴ Tõma Zifdõma sore la pʋam, mam daan sẽŋɛ nẽŋa mɛ wɩsgɛ m mẽŋa la tɩ yaabdõma dɔgmike la yelle, ɩta lan yele se'em na gãnna m zuutaaba zozo'e.

¹⁵ La Nawẽnnɛ daan welge mam na to'ore lan dẽŋɛ mam dɔka, ẽŋɛ mam yel-sõnnɛ, looge mam tɩ m dɛna a tõntõnna.

¹⁶ Ẽŋa n daan wa bɩsɛ tɩ la ãn sõŋa, tɩ a puke a Dayʋa la pa'alɛ mam tɩ m mõolɛ a Dayʋa la kõ-yẽlga bɔ bu-zãŋsɩ la, mam daan ka sẽŋɛ nẽr-sɛka zẽ'am tɩ a zãsʋm mam.

¹⁷ La mam mẽ daan ka sẽŋɛ Zerizalɛm sɛba n dẽŋɛ mam dɛna Azezi Tõntõnɩba la zẽ'am. Mam daan sẽŋɛ la Araabɩ so'olʋm, bɛla poorʋm tɩ mam lebe Damaasɩ.

¹⁸ Bɛla poorʋm yʋʋma atã n tole, tɩ mam yãŋa sẽŋɛ Zerizalɛm tɩ m ka bãŋɛ Apɩyɛɛrɩ, daan ẽŋɛ dabsa pia la anuu a zẽ'am.

¹⁹ La mam ka yẽ Azezi Tõntõnna ayẽma pa'asɛ, sãn dagna Azakɩ n de Zuudãana yɩbga la mã'a.

²⁰ Mam n gʋlsɛ ya sɛla wã, mam yetɩ ya Nawẽnnɛ nẽŋam tɩ la dagɩ põmpɔrŋɔ.

²¹ Bɛla poorʋm mam ze'ele Zerizalɛm sẽŋɛ la Siiri, la Silisi so'olʋm.

²² La Azezi-krisi nẽr-sɛba n boe Zude tẽnsɩ la daan nãn ka yẽ mam.

²³ Ba daan wen wõm mɛ tɩ ba tɔgrɩ mam yelle yetɩ: «Sɛka n daan nãmsrɩ tõma mõora tɩ a sã'am kõ-yẽlga tɩ tɩ bɔ sɩra la, yãŋa mõolɩ la kõ-yẽlga la.»

²⁴ Tɩ ba nã'asra Nawẽnnɛ mam ĩyã.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan