Bìoball air-loidhne

Efɛɛzɩ 1 - Farefare Ninkaré

¹ Mam Apolɩ n de Azezi-krisi Tõntõnna wʋ Nawẽnnɛ n boorɩ se'em na, n gʋlsɛ gõn-ẽna wã bɔ'ɔra yãma Nawẽnnɛ nẽrba n boe Efɛɛzɩ dɛna sɩra dõma Azezi-krisi doosgo pʋam na.

² Tɩ Sɔ Nawẽnnɛ, la tɩ Zuudãana Azezi-krisi wʋn ẽŋɛ ya yel-sõnnɛ, dee bɔ ya sũ-mã'asʋm.

Nawẽnnɛ n ẽŋɛ tõma yel-sõnnɛ se'em Krisi ĩyã

³ Tɩ pẽgɛ Nawẽnnɛ n de tɩ Zuudãana Azezi-krisi Sɔ la, ẽŋa n bɔ tɔ a Sɩa yel-sõnnɛ wuu n ze'ele saazuum, tõma n lagɩm na Krisi dɛna ayɩla la ĩyã.

⁴ Nawẽnnɛ looge tõma la ẽŋa ĩyã, lan dẽŋɛ dũnia nãaŋɔ, tɩ tɩ welge to'ore dɛna a nẽrba, ka tara yelle a nẽŋam.

⁵ A nõŋlʋm na ĩyã tɩ a dẽŋɛ looge tõma tɩ tɩ lebge a kɔma Azezi-krisi ĩyã, wʋ a mẽŋa yɛm n boorɩ se'em na.

⁶ A ẽŋɛ bɛla tɩ tɩ pẽgɛ ẽ mɛ, a yel-sõnnɛ n zo'oge gãŋɛ tɩ a ẽŋɛ bɔ tɔ zãŋa, tõma n de ayɩla la a Dayɔ-nõŋrɛ la ĩyã.

⁷ La de la Krisi n ki tɩ a zɩɩm yese la ĩyã tɩ Nawẽnnɛ basɛ tõma tõon-be'ero taalɛ, tɩ tõma yẽ fãarɛ, tɩ la masɛ wʋ Nawẽnnɛ yel-sõnnɛ n zo'oge pãɩ se'em na.

⁸ Yel-sõnnɛ ẽŋa n zo'oge la bɔ tõma la yɛm wuu, la bãŋrɛ wuu.

⁹ Nawẽnnɛ basɛ tɩ tõma bãŋɛ ẽn boorɩ tɩ a ẽŋɛ se'em n daan sʋgɛ tɩ a looge yɛm tɩ a ẽŋɛ Krisi ĩyã la mɛ.

¹⁰ Wakatɛ la sãn wa paagɛ, Nawẽnnɛ wʋn ẽŋɛ ẽŋa n looge yɛm tɩ a ẽŋɛ se'em na mɛ, a wʋn lagsɛ sɛla wuu n boe saazuum, la dũnia zuo, tɩ ba sakɛ Zuudãana ayɩla n de Krisi.

¹¹ Nawẽnnɛ n basɛ tɩ sɛla woo ɩta wʋ ẽn boorɩ se'em na, n dẽŋɛ looge tõma tɩ tɩ dɛna a nẽrba Krisi ĩyã.

¹² Tɩ tõma n dẽŋɛ tara pʋtẽ'erɛ la Krisi la, wʋn basɛ tɩ nẽrba pẽgɛ ẽ a na'am pãŋa la ĩyã.

¹³ Yãma n mẽ wõm sɩra kõ-yẽlga la, n basɛ tɩ ya bɔ Krisi sɩra yẽ fãarɛ, ẽŋa ĩyã tɩ Nawẽnnɛ bɔ ya a Sɩa wʋ ẽn bĩŋe nõorɛ se'em na, Sɩa ẽŋa de la dãalgɔ pa'alɛ tɩ ya de la a nẽrba.

¹⁴ A Sɩa la n de sɛla n pa'alɛ tɩ tɩ wʋn yẽ sɛla woo tɩ a bĩŋe nõorɛ tɩ a bɔ tɔ la, halɩ ka paagɛ wakat-sɛka tɩ a wʋn fãagɛ tõma wuu n de a nẽrba la ba'asɛ la, bõn-ẽŋa n wʋn basɛ tɩ tɩ pẽgɛ ẽ, a na'am pãŋa la ĩyã.

Apolɩ pʋ'ʋsrɩ Nawẽnnɛ Efɛɛzɩ dõma ĩyã

¹⁵ Bɛla n soe tɩ mam n wõm yãma n bɔ tɩ Zuudãana Azezi sɩra, la yãma n tarɩ nõŋlʋm la Nawẽnnɛ nẽrba wuu se'em na,

¹⁶ tɩ mam tẽra ya yelle m pʋ'ʋsgɔ pʋam, pʋ'ʋsra Nawẽnnɛ a yel-sõnnɛ ya ĩyã ka gɔ'ɔra.

¹⁷ Mam sosrɩ la tɩ Zuudãana Azezi-krisi Sɔ n de Nawẽnnɛ n tarɩ na'am pãŋa la, tɩ a bɔ ya a yɛm Sɩa tɩ a vẽlgɛ ya yɛm, tɩ ya bãŋɛ ẽn ãn se'em.

¹⁸ Mam ken sɔsra Nawẽnnɛ tɩ a botɩ ya pʋtẽ'era like tɩ ya bãŋɛ ẽn wi ya tɩ ya tara pʋtẽ'erɛ gu'ura sɛla, dee bãŋɛ bõn-sõma sɛba tɩ a bĩŋe nõorɛ tɩ a bɔ a nẽrba la n ba ãna sõŋa, dee zo'oge se'em.

¹⁹ Mam ken sɔsra ẽ tɩ a botɩ ya bãŋɛ a pãŋa la n ãn kãtɛ gãŋɛ se'em tɩ a tarɩ tõnna la tõma n bɔ ẽ sɩra la lɛ, wʋ a na'am pãn-kãtɛ n tõnnɩ tõon-kãra se'em na.

²⁰ Pãn-kãtɛ ẽŋa n bɛla tɩ a dɩkɛ vo'oge Krisi botɩ a zĩ'ire a zʋʋgɔ bɔba saazuum Nawẽnnɛ yire.

²¹ A botɩ Krisi n gãnna na'adõma wuu, la pãnsɩ dõma wuu, la kɛ'ɛndõma wuu, la ke'eŋo buuri wuu, ẽŋa yʋ'ʋrɛ n gãnnɩ yʋ'ʋra wuu, la dagɩ dũnia ẽna pʋam mã'a, la ken dɛna la dũnia sɛka n wʋn wa'am na pʋam.

²² Nawẽnnɛ basɛ mɛ tɩ Krisi sɔna sɛla woo, dee botɩ a dɛna a nẽrba wuu Zuudãana sɛla woo pʋam.

²³ Krisi nẽrba la ãn wʋ a mẽŋa ĩyã la, ẽŋa n vɔa ba pʋam, la ẽŋa n boe zẽ'a woo, botɩ sɛla woo bɔna.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan