Bìoball air-loidhne

Kolɔsɩ 1 - Farefare Ninkaré

¹ Mam Apolɩ n de Azezi-krisi Tõntõnna wʋ Nawẽnnɛ n boorɩ se'em, la tɩ sɔbia Atimõtɩ

² n gʋlsɛ gõŋɔ wã bɔ'ɔra yãma Nawẽnnɛ nẽrba n boe Kolɔsɩ, dɛna tɩ sɔbiisi n de sɩra dõma Krisi sore doosgo pʋam na. Tɩ Sɔ Nawẽnnɛ wʋn ẽŋɛ ya yel-sõnnɛ, dee bɔ ya sũ-mã'asʋm.

Apolɩ pʋ'ʋsrɩ Nawẽnnɛ a yel-sõnnɛ

³ Tõma pʋ'ʋsrɩ Nawẽnnɛ n de tɩ Zuudãana Azezi-krisi Sɔ a yel-sõnnɛ mɛ, tõma pʋ'ʋsrɩ ẽ mɛ yãma ĩyã wakatɛ wuu.

⁴ Tõma wõm ban tɔgrɩ yãma n bɔ Azezi-krisi sɩra, dee nõŋɛ Nawẽnnɛ nẽrba wuu se'em,

⁵ yãma n tarɩ pʋtẽ'erɛ gu'ura sɛla tɩ Nawẽnnɛ bĩŋe a yire gu'ura tɩ a bɔ ya la ĩyã. La de la yãma n dẽŋɛ wõm sɩra yetɔga n de Nawẽnnɛ kõ-yẽlga la, n botɩ yãma tara pʋtẽ'erɛ ẽŋa.

⁶ Kõ-yẽlga ẽŋa paagɛ yãma zẽ'am mɛ, wʋ ẽn paagɛ dũnia zẽ'esɩ wuu se'em na, la a ɩtɩ nẽrba sõŋa mɛ, tɩ ba sakra zozo'e, tɩ ba kãllɛ pa'asra. A mẽ ɩtɩ la bɛla yãma zẽ'am lan sẽŋɛ la daar-sɛka tɩ yãma wõm, dee bãŋɛ Nawẽnnɛ yel-sõnnɛ sɩra sɩra la.

⁷ Yãma zãsʋm bõn-ẽŋa la A'epafrasɩ n de tõma tõntõn-tadãana tɩ tõma nõŋɛ la zẽ'am. A de la Azezi-krisi tõntõnna n de sɩra dãana tõnna bɔ'ɔra yãma.

⁸ Ẽŋa n yele tõma Nawẽnnɛ Sɩa n basɛ tɩ yãma tara nõŋlʋm se'em.

⁹ Bɛla tɩ lan sẽŋɛ la daar-sɛka tɩ tõma wõm yãma yelle la, tɩ tõma pʋ'ʋsra Nawẽnnɛ yãma ĩyã wa paam lɛɛlɛ wã. Tõma sosrɩ ẽ tɩ a botɩ ya bãŋɛ ẽŋa n boorɩ se'em sõŋa sõŋa, la ya tara yɛm, la bãŋrɛ wuu tɩ Nawẽnnɛ Sɩa bɔ'ɔrɩ.

¹⁰ Tɩ ya yel-ɩrɛ wʋn masɛ wʋ Zuudãana la n boorɩ se'em, tɩ la paagɛ a yɛm sɛla woo pʋam. Tɩ ya wʋn tõm tõon-sõma buuri wuu, dee bãŋɛ Nawẽnnɛ pa'asɛ.

¹¹ Nawẽnnɛ wʋn bɔ ya pãŋa sɛla woo pʋam a na'am pãn-kãtɛ la ĩyã, tɩ ya wʋn wĩbe sɛla woo pʋam la sũ-mã'asʋm.

¹² Pʋ'ʋsra-ya tɩ Sɔ Nawẽnnɛ a yel-sõnnɛ la sũ-yẽlga, ẽŋa n basɛ tɩ ya tãna wʋn po to'oge bõn-sõma tɩ a bĩŋe tɩ a bɔ a nẽrba a so'olʋm n de peelem pʋam na.

¹³ Nawẽnnɛ fãagɛ tɩ mɛ lika pãŋa pʋam, tarɩ tɩ sẽŋɛ a Bi-nõŋrɛ so'olʋm pʋam.

¹⁴ Ẽŋa ĩyã tõma yẽ fãarɛ mɛ, tɩ Nawẽnnɛ basɛ tɩ tõon-be'ero taalɛ.

Krisi n de sɛka

¹⁵ Azezi-krisi de la Nawẽnnɛ tɩ ba ka yẽtɩ la wõnnɛ. Ẽŋa n de bõn-sɛba n nãam na wuu yiɛn dãana.

¹⁶ La doose la ẽŋa tɩ Nawẽnnɛ nãam sɛla woo, bõn-sɛba n boe dũnia zuo la saazuum, bõn-sɛba tɩ ba yẽtɩ, la bõn-sɛba tɩ ba ka yẽtɩ, bõn-sɛba n tarɩ na'am, la zuudãandõma, la pãnsɩ dõma, la kɛ'ɛndõma wuu. La doose la ẽŋa tɩ Nawẽnnɛ nãam sɛla woo, tɩ la dɛna a bõnɔ.

¹⁷ Ẽŋa n dẽŋɛ sɛla woo bɔna, la de la ẽŋa ĩyã tɩ sɛla woo ken bɔna a zẽ'am.

¹⁸ Ẽŋa n de a nẽrba n de a ĩyã la zuudãana. Ẽŋa n de sɛla woo pɔspɔsɩ dãana, ẽŋa n de pɔspɔsɩ dãana n vo'oge dee basɛ kũm tɩ a dɛna sɛla woo nẽŋadãana.

¹⁹ La paagɛ la Nawẽnnɛ yɛm tɩ a basɛ tɩ ẽŋa n ãn se'em na wuu, Azezi mẽ ãna bɛla.

²⁰ Dee botɩ la doose la Azezi tɩ sɛla woo, la ẽŋa naagɛ taaba, la de la Azezi n ki kũm dɔ-puurŋa zuo tɩ a zɩɩm yese la ĩyã, n botɩ sũ-mã'asʋm bɔna sɛla n boe tẽŋa, la saazuum wuu, la Nawẽnnɛ tẽŋasʋka.

²¹ La yãma mẽ daan zãagɛ mɛ la Nawẽnnɛ, ya daan de la bɛ'ɛba ya pʋtẽ'e-be'ero, la ya tõon-be'ero la ĩyã.

²² La lɛɛlɛ wã, Nawẽnnɛ naagɛ ya mɛ la ẽŋa, a Dayʋa n lebge nẽrsaala ki la ĩyã, tɩ a tarɩ ya sẽŋɛ ka ze'ele Nawẽnnɛ nẽŋam la pʋpeelem, tɩ ya ka tara yelle, tɩ dõrga kana.

²³ Bɛla, dẽnɩ tɩ ya ken bɔ sɩra zɛ kãŋkãŋɛ, da basɛ tɩ sɛla zãagɛ ya la kõ-yẽlga la tɩ ya wõm tara pʋtẽ'erɛ gu'ura sɛla la. La de la kõ-yẽlga ẽŋa tɩ ba mõolɛ bɔ nẽrsaalba wuu n boe dũnia zuo la. Mam Apolɩ de Nawẽnnɛ tõntõnna tɩ m mõolɛ la kõ-yẽl-ẽŋa.

Apolɩ n tõm se'em bɔ Nawẽnnɛ nẽrba

²⁴ Lɛɛlɛ wã, mam sũure ãn yẽlʋm mɛ, mam n nãmsrɩ bɔ'ɔra yãma la ĩyã. Mam n nãmsrɩ wã de la Krisi nãmsgɔ n deege dɛna mam nãmsɛ bɔ a nẽrba n de a ĩyã la.

²⁵ Nawẽnnɛ n looge mam tɩ m dɛna Azezi nẽrba tõntõnna mõolɛ a yetɔga la wuu bɔ yãma.

²⁶ Yetɔg-ẽŋa sʋgɛ mɛ yʋʋma yʋʋma, zamãana wuu wa paam zĩna, la lɛɛlɛ wã a yãŋa puke mɛ bɔ Nawẽnnɛ nẽrba.

²⁷ Nawẽnnɛ n boorɩ tɩ a basɛ tɩ a nẽrba la bãŋɛ yel-ẽŋa n daan sʋgɛ la na'am pãŋa n ãn sõŋa zo'oge se'em bu-zãŋsɩ tẽŋasʋka. Yel-ẽŋa n sʋgɛ la de la Krisi boe la ya lɛ, botɩ ya wʋn yẽ na'am pãŋa tɩ ya tarɩ pʋtẽ'erɛ gu'ura la a zẽ'am.

²⁸ La de la ẽŋa yelle tɩ tõma mõolɩ, kã'ana nẽra woo, dee zãsna nẽra woo la yɛm tɩ tɩ botɩ nẽra woo masɛ sɛla woo pʋam Krisi doosgo pʋam ka ze'ele Nawẽnnɛ nẽŋam.

²⁹ La de la bɛla ĩyã tɩ mam tõnna dee mõrgra. La de la Krisi pãn-kãtɛ tɩ a bɔ mam zozo'e la n botɩ mam tõnna bɛla.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan