Azudi 1 - Farefare Ninkaré

¹ Mam Azudi n de Azezi-krisi tõntõnna, la Azakɩ yɩbga la n gʋlsɛ gõŋɔ wã bɔ'ɔra yãma sɛba tɩ tɩ Sɔ Nawẽnnɛ wi tɩ ya dɛna a nẽrba, nõŋɛ ya, tɩ Azezi-krisi gu'ura ya la.

² Nawẽnnɛ wʋn zoe ya ninbãalga zozo'e, bɔ ya sũ-mã'asʋm, la nõŋlʋm zozo'e.

Põmpɔrŋɔ karẽnsãandõma

³ M sɩr-nõŋrɩsɩ, mam daan boorɩ mɛ tɩ m gʋlsɛ ya la m sũure wuu tɔgɛ fãarɛ la tɩ tɩ wuu lagɩm yẽ la yelle. Mam bɩsɛ mɛ tɩ la de la pẽrgrɛ tɩ mam gʋlsɛ kã'an ya, tɩ ya mõrgɛ zɛbɛ ze'ele kãŋkãŋɛ yetɔga la tɩ ya bɔ sɩra la pʋam. Nawẽnnɛ dɩkɛ yetɔg-bãma bɔ a nẽrba la nõorɛ ayɩla mã'a wakatɛ wuu ĩyã.

⁴ Se'ere n soe la, nẽrba basɛba n li'ise kẽ ya pʋam. Nẽr-bãma de la sɛba n sɩ'ɩsrɩ Nawẽnnɛ, tɛɛra a yel-sõnnɛ yetɔga la, dɩkɛ tõnna tõon-dẽgrɔ, dee sɩ'ɩsra Azezi-krisi n de tɩ kɛ'ɛma la tɩ Zuudãana ayɩla mã'a la. Halɩ kʋrʋm kʋrʋm tɩ la põn gʋlsɛ sɩbgrɛ sɛka tɩ ba wʋn yẽ.

⁵ Baa la yãma n mi bõn-bãma wuu sõŋa sõŋa la, mam boorɩ tɩ m tẽegɛ ya mɛ tɩ Nawẽnnɛ n yʋʋn fãagɛ a nẽrba Ezipti tẽŋa la, a yʋʋn yãŋa basɛ mɛ tɩ nẽr-sɛba n ka bɔ ẽ sɩra la ki.

⁶ La malɛkadõma sɛba n yʋʋn ka sakɛ Nawẽnnɛ n bɔ ba ke'eŋo se'em basɛ zẽ'e-sɛka tɩ Nawẽnnɛ bɔ ba la, Nawẽnnɛ ba ba mɛ la bãnsɩ, basɛ tɩ ba bɔna lika pʋam wakatɛ wuu gu'ura dabs-kãtɛ la n de sarɩyadia daarɛ la.

⁷ La sãn dɛna Sodom la Gomõorɩ dõma, la tẽnsɩ sɛba n lɛm ba la, n mẽ yʋʋn ẽŋɛ wʋ bɛla, tõm yalsɩ tõoma, la, la dagɩ la nẽrsaalba mã'a. Ba yʋʋn yẽ sɩbgrɛ mɛ n de bugum n ka kĩŋri, tɩ la dɛna kã'aŋɔ bɔ nẽrba basɛba.

⁸ La de la bõn-bãma buuri n bɛla tɩ nẽr-bãma mẽ ɩtɩ. Ban tẽ'esrɩ se'em na botɩ ba dẽgra la ba mẽŋa, ba pɔ'ɔrɩ Nawẽnnɛ n tarɩ nõorɛ la ba lɛ la mɛ, dee tʋʋra saazuum pãnsɩ dõma.

⁹ La baa malɛkadõma kɛ'ɛma Amisɛlɩ n yʋʋn tɔgrɩ la Asũtãana wẽ'era nõke'ene Amoyisi kũm ĩyã la, a ka saagɛ tɔgɛ zɛrgɛ ẽ tʋ ẽ, a yʋʋn yetɩ: «Zuudãana la wʋn sɩbgɛ fɔ.»

¹⁰ Nẽr-bãma tɔgrɩ la sɛla tɩ ba ka mi be'em, ba ɩtɩ la yooryooro, ba ãn wʋ dũnsi n ka tarɩ yɛm n ɩtɩ se'em na, bõn-ẽŋa n sã'anɩ ba.

¹¹ Ba wʋn yẽ toogo, se'ere n soe la, ba dolɩ la so-sɛka tɩ Akãɩ yʋʋn doose la, la ba kẽ'esɛ ba mẽŋa mɛ tuure pʋam yɔɔrɔ ĩyã, wʋ Abalaam n ẽŋɛ se'em ligri ĩyã la. Ban sɩ'ɩsɛ Nawẽnnɛ nõorɛ wʋ Akoore n yʋʋn sɩ'ɩsɛ Nawẽnnɛ nõorɛ se'em na, ba ki mɛ.

¹² Ba sãn lagɩm na ya dita nõŋlʋm dia, la de la yãnnɛ bɔ ya. Ba ka zotɩ yãnnɛ, ba kɔ'ɔn dita mɛ ɩta sũ-yẽlga ba mẽŋa ĩyã. Ba ãn wʋ sawara n ka tarɩ ko'om tɩ kʋsebgo pe'erɩ, ba ãn wʋ tɩɩsɩ n ka tarɩ biɛ ba wɔŋa wakatɛ, tɩ ba võ, basɛ tɩ ba võorɔ, la ba yẽga wuu kʋɩ.

¹³ Ba ken ãna wʋ ko-kãtɛ ko-mĩ'isi n wẽ'erɩ la pãŋa, ba yãnnɛ tõoma la ãn wʋ ko-kãtɛ fulfuka la, ba ãn wʋ wõrbiɛ sɛba n eerɩ. Nawẽnnɛ mãasʋm na zẽ'a n de lika tam bĩŋe wakatɛ n ka ba'asrɩ gu'ura ba.

¹⁴ La po dɛna la nẽr-bãma yelle tɩ A'enõkɩ n de tɩ yaaba bʋyopɔɩ dãana lan pɔsɛ la Adam na, yʋʋn to'oge Nawẽnnɛ yetɔga tɔgɛ yetɩ: «Bɩsɛ-ya, Zuudãana Nawẽnnɛ sẽm mɛ la a malɛkadõma tʋsa tʋsa

¹⁵ tɩ a di nẽrsaalba wuu sarɩya, sɩbgɛ tõon-be'ero dõma wuu, ban sɩ'ɩsɛ ẽ tõnna tõon-be'ero la wuu ĩyã, la yetɔg-be'ero wuu tɩ ba tɔgɛ pɔ'ɔgɛ ẽ na ĩyã.»

¹⁶ Nẽr-bãma de la nẽrba n yõnnɩ wakatɛ wuu, ba sũure ka ãn yẽlʋm la ban ãn se'em na. Ba ɩtɩ la ba mẽŋa yɛm n boorɩ se'em, tɔgra pa'al-m-mẽŋa yetɔga, dee tɔgra nẽrba nõ-yẽlʋm yetɔga tɩ ba yẽ yõorɔ.

Kã'aŋɔ

¹⁷ La sãn dɛna yãma, m sɩr-nõŋrɩsɩ, tẽra-ya yetɔg-sɛba tɩ tɩ Zuudãana Azezi-krisi Tõntõnɩba la daan dẽŋɛ tɔgɛ bɔ ya la.

¹⁸ Ba daan yele ya yetɩ: «Dũnia ba'asgɔ wakatɛ, nẽrba n la'arɩ nẽrba n wʋn wa bɔna dɔla ba mẽŋa yɛm n boorɩ se'em, sɩ'ɩsra Nawẽnnɛ.»

¹⁹ La de la bãma n tarɩ welgre sẽna. Ba dolɩ la nẽrsaalba pʋtẽ'era n boorɩ se'em, Nawẽnnɛ Sɩa ka boe la ba lɛ.

²⁰ La yãma, m sɩr-nõŋrɩsɩ, sõŋra-ya taaba sẽnna nẽŋa yan bɔ Nawẽnnɛ sɩra la pʋam, pʋ'ʋsra-ya Nawẽnnɛ la a Sɩa pãŋa.

²¹ Bɔna-ya Nawẽnnɛ nõŋlʋm na pʋam gu'ura tɩ tɩ Zuudãana Azezi-krisi n de ninbãal-zɔta la wʋn bɔ ya vɔm n ka ba'asrɩ.

²² Zɔta-ya sɛba yɛm n yɔɔrɩ la ninbãalga.

²³ Fãagɛ-ya sɛba n boe bugum pʋam na. La, la sãn dɛna basɛba la, zɔta-ya ba ninbãalga, la ya guuse ya mẽŋa da lagɩm na ba tõnna tõon-dẽgrɔ tɩ ba mẽŋa boorɩ la baa fẽfẽe.

²⁴ Pẽgɛ-ya Nawẽnnɛ, ẽŋa n tarɩ pãŋa wʋn gu ya tɩ ya kãn basɛ a sore, dee wʋn tarɩ ya sẽŋɛ ka ze'ele a nẽŋam tɩ ya ka tara dõrga, tɩ ya yẽ a na'am pãŋa, la sũ-yẽlga zozo'e.

²⁵ Nawẽnnɛ ayɩla mã'a n de tɩ Fãagra tɩ Zuudãana Azezi-krisi ĩyã, n soe pẽka, la nã'asgɔ, la pãŋa, la ke'eŋo, lan dẽŋɛ pĩ'iluŋo, la lɛɛlɛ wã, la wakatɛ n ka ba'asrɩ. Amina.