Bìoball air-loidhne

Azã 9 - Farefare Ninkaré

Azezi botɩ fʋa yẽta

¹ La Azezi daan sẽnnɩ tɔlla mɛ, yẽ bʋraa tɩ ba dɔgɛ ẽ tɩ a dɛna fʋa.

² Tɩ a karẽnbiisi soke ẽ yetɩ: «Karẽnsãama, nẽr-kãna n tõm tõon-be'ero? Bʋraa wã bɩɩ a sɔ bɩɩ a ma n tõm tõon-be'ero, tɩ ba dɔgɛ ẽ tɩ a dɛna fʋa?»

³ Tɩ Azezi lerge yetɩ: «La dagɩ bʋraa wã bɩɩ a sɔ bɩɩ a ma tõon-be'ero ĩyã, tɩ a dɛna fʋa. La de la Nawẽnnɛ n yetɩ a tõm na ẽ pa'alɛ a tõoma.

⁴ Dẽnɩ tɩ tõma tõm sɛka n tõm mam na tõoma, la nãn ken dɛna wʋntɛɛŋa wã. Yʋ'ʋŋɔ sẽm mɛ tɩ nẽra kãn le tã'agɛ tõm.

⁵ Mam n nãn boe dũnia pʋam wã, mam de la dũnia peelem.»

⁶ A yele bɛla dee tʋbsɛ la nõtõorʋm tẽŋa bũn tẽntõnnɔ bɩ fʋa la nini,

⁷ dee yele ẽ yetɩ: «Sẽŋɛ ka wire fʋ nẽŋa Silowe kʋlgam.» (Silowe võorɛ de la «sɛka tɩ ba tõm».) Tɩ a sẽŋɛ ka wire a nẽŋa, dee lɛbra, tɩ a nini na yẽta.

⁸ Tɩ a sawiiba, la sɛba n mi ẽ kʋrʋm tɩ a sosrɩ mɛ na yetɩ: «Dagɩ ẽna n daan zĩ sɔsra la?»

⁹ Tɩ sɛba yetɩ: «La de la ẽŋa.» Tɩ basɛba yetɩ: «Ayɛɩ, a wõn na ẽŋa dee la dagɩ ẽ.» Tɩ a mẽŋa yetɩ: «La de la mam.»

¹⁰ Tɩ ba soke ẽ yetɩ: «La ẽŋɛ la wãne tɩ fõn nini na yãŋa yẽta?»

¹¹ Tɩ a lerge ba yetɩ: «Bʋraa la yʋ'ʋrɛ n de Azezi la n bũn tẽntõnnɔ bɩ mam nini, dee yele mam tɩ m sẽŋɛ Silowe kʋlgam ka wire. Tɩ mam sẽŋɛ ka wire, yãŋa yẽta.»

¹² Tɩ ba soke ẽ yetɩ: «A boe la bɛ?» Tɩ a lerge yetɩ: «Mam ka mi.»

Farisi dõma soke fʋa lan ẽŋɛ se'em tɩ ẽŋa yẽta

¹³ Tɩ ba tarɩ sɛka n daan de fʋa la sẽŋɛ Farisi dõma zẽ'am.

¹⁴ La Azezi n daan bũn tẽntõnnɔ bɩ fʋa la nini daar-sɛka tɩ a yẽta la, daan de la Zifdõma vo'osgo daarɛ.

¹⁵ Tɩ Farisi dõma la mẽ le soke ẽ yetɩ: «La ẽŋɛ la wãne tɩ fõn yẽta?» Tɩ a lerge ba yetɩ: «A bũn na tẽntõnnɔ bɩ mam nini, tɩ mam wire, yãŋa yẽta.»

¹⁶ Tɩ Farisi dõma basɛba yetɩ: «Nẽr-ẽna wã ka ze'ele Nawẽnnɛ zẽ'am wa'am, se'ere n soe la, a ka sakrɩ vo'osgo daarɛ sisgo.» Tɩ basɛba yetɩ: «Nẽra n de tõon-be'ero dãana wʋn ẽŋɛ la wãne tõm tõon-yãlma wãna?» Tɩ welgre kẽ Farisi dõma la tẽŋasʋka.

¹⁷ Tɩ ba le soke bʋraa la yetɩ: «Fõn wʋn yele a yelle tɩ bẽm, ẽn basɛ tɩ fõn nini yẽta la?» Tɩ a lerge ba yetɩ: «A de la Nawẽnnɛ nõtɔ'ɔsa.»

¹⁸ Tɩ Zifdõma nẽŋadõma la ka bɔɔra tɩ ba sakɛ tɩ a daan de la fʋa dee yãŋa yẽta, tɩ ba wi a sɔ la a ma,

¹⁹ soke ba yetɩ: «Ẽna de la yãma dayʋa la tɩ yãma yetɩ yãma dɔgɛ ẽ tɩ a dɛna la fʋa la? La ẽŋɛ la wãne tɩ a yãŋa yẽta?»

²⁰ Tɩ a sɔ la a ma lerge yetɩ: «Tõma mi tɩ a de la tõma dayʋa, la tõma daan dɔgɛ ẽ tɩ a dɛna la fʋa.

²¹ La tõma ka mi lan ẽŋɛ se'em tɩ a yãŋa yẽta, bɩɩ sɛka n botɩ a nini na yẽta. Soke-ya ẽ, tɩ a ka le dɛna bia, a mẽŋa wʋn tɔgɛ.»

²² A sɔ la a ma la n zotɩ Zifdõma nẽŋadõma la ĩyã tɩ ba yele bɛla. Zifdõma nẽŋadõma la daan dẽŋɛ tɔgɛ kʋ mɛ yetɩ, nẽra sãn sakɛ tɩ Azezi de la Krisi, bãma wʋn yese ẽ mɛ ba wẽndeego la pʋam.

²³ Bɛla n soe tɩ a sɔ la a ma la yetɩ: «Soke-ya ẽ tɩ a ka de bia.»

²⁴ Tɩ ba le wi bʋra-sɛka n daan de fʋa la nõorɛ ayi pʋam, yele ẽ yetɩ: «Tɔgɛ sɩra Nawẽnnɛ ĩyã. Tõma mi tɩ bʋra-ẽna de la tõon-be'ero dãana.»

²⁵ Tɩ a lerge yetɩ: «A sãn dɛna tõon-be'ero dãana, bɩɩ a dagɩ tõon-be'ero dãana, mam ka mi. Mam n mi sɛla de la, mam daan de la fʋa, la lɛɛlɛ wã mam yẽtɩ mɛ.»

²⁶ Tɩ ba soke ẽ yetɩ: «A ẽŋɛ fõn na bẽm? A ẽŋɛ la wãne botɩ fõn yẽta?»

²⁷ Tɩ a lerge ba yetɩ: «Mam põn dẽŋɛ yele ya mɛ, tɩ ya ka selse, bẽm tɩ ya le bɔɔra tɩ ya wõm? Yãma mẽ boorɩ tɩ ya lebge la a karẽnbiisi bɩɩ?»

²⁸ Tɩ ba tʋ ẽ, dee yetɩ: «Fõn de a karẽnbia, tõma de la Amoyisi karẽnbiisi.

²⁹ Tõma mi tɩ Nawẽnnɛ yʋʋn tɔgɛ bɔ la Amoyisi, la ẽna, tõma ka mi ẽn ze'ele zẽ'e-sɛka.»

³⁰ Tɩ bʋraa la yele ba yetɩ: «Ẽna de la yel-di'iŋa, yãma ka mi ẽn ze'ele zẽ'a, la ẽŋa n botɩ mam nini yẽta.

³¹ Tõma mi tɩ Nawẽnnɛ ka selsrɩ tõon-be'ero dõma sosgo, la nẽra sãn pʋ'ʋsra ẽ, dee ɩta ẽn boorɩ se'em, a selsrɩ la ẽŋa dãana sosgo.

³² Halɩ pĩ'iluŋo, ba nãn ka wõm tɩ nẽra botɩ nẽra tɩ ba dɔgɛ ẽ tɩ a dɛna fʋa nini yẽta.

³³ Bʋra-ẽna sãn ka ze'ele nɩ Nawẽnnɛ zẽ'am, a kãn yãŋɛ nɩ ẽŋɛ sɛla sɛla.»

³⁴ Tɩ ba lerge ẽ yetɩ: «Ba dɔgɛ fõn na tõon-be'ero pʋam, tɩ fõn yetɩ fʋ pa'alɛ tõma?» Tɩ ba dige ẽ ba wẽndeem na.

Sɛba n mi dee ka bɔɔra tɩ ba sakɛ ãn wʋ fɔɔsɩ la

³⁵ Tɩ Azezi wõm tɩ ba dige ẽ mɛ, yãŋa wa yẽ ẽ, soke ẽ yetɩ: «Fõn bɔ Nẽrsaala Dayʋa la sɩra mɛ?»

³⁶ Tɩ a lerge yetɩ: «Zuudãana, Nẽrsaala Dayʋa la de la ãne? Yele ma tɩ m bɔ ẽ sɩra.»

³⁷ Tɩ Azezi yele ẽ yetɩ: «Fʋ yẽ ẽ mɛ, ẽŋa n tɔgrɩ la fʋ lɛ wã.»

³⁸ Tɩ bʋraa la yetɩ: «Zuudãana, mam bɔ fʋ sɩra mɛ», dee ka dũma Azezi nẽŋam.

³⁹ Tɩ Azezi yele yetɩ: «Mam wa'am dũnia wã zuo tɩ welgre n bɔna, tɩ fɔɔsɩ yẽta, dee tɩ sɛba n yẽtɩ la lebge fɔɔsɩ.»

⁴⁰ Tɩ Farisi dõma sɛba n daan boe mĩ na n wõm bɛla la, soke ẽ yetɩ: «Tõma mẽ de la fɔɔsɩ bɩɩ?»

⁴¹ Tɩ Azezi lerge ba yetɩ: «Ya sãn de nɩ fɔɔsɩ, ya tõon-be'ero taalɛ ka boe ya zuo. La lɛɛlɛ wã, yãma yetɩ yãma yẽtɩ mɛ, bɛla tɩ ya tõon-be'ero taalɛ bɔna ya zuo.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan