Bìoball air-loidhne

Azã 7 - Farefare Ninkaré

Azezi yɩbsɩ ka bɔ ẽ sɩra

¹ Bɛla poorʋm, Azezi daan gilgri la Galile, a ka boorɩ tɩ a gilge Zude, Zifdõma nẽŋadõma n eerɩ ẽ tɩ ba kʋ la ĩyã.

² Tɩ Zifdõma põnsɩ kibsa daan lɛm,

³ tɩ Azezi yɩbsɩ yele ẽ yetɩ: «Basɛ kalam dee sẽŋɛ Zude tɩ fʋ karẽnbiisi mẽ yẽ fʋ tõoma la tɩ fʋ tõnnɩ na.

⁴ Se'ere n soe la, nẽra sãn bɔɔra tɩ nẽrba bãŋɛ ẽ, a ka sʋgrɩ a tõoma. Fõn tõnnɩ tõon-bãna wã, botɩ nẽrba wuu bãŋɛ fɔ.»

⁵ La a yɩbsɩ la daan ka bɔ ẽ sɩra.

⁶ Tɩ Azezi yele ba yetɩ: «Mam wakatɛ nãn ka paagɛ, la wakatɛ woo ãn sõŋa mɛ bɔ yãma.

⁷ Dũnia dõma kãn tã'agɛ sise yãma, la ba sisri mam mɛ, mam n tɔgrɩ pa'ala tɩ ba tõoma de la be'em na ĩyã.

⁸ Yãma sẽŋɛ kibsa la, tɩ mam nãn kãn sẽŋɛ, se'ere n soe la, mam wakatɛ nãn ka paagɛ.»

⁹ A yele ba bɛla dee weege la Galile.

Azezi boe la põnsɩ kibsa

¹⁰ La a yɩbsɩ la n daan sẽŋɛ kibsa la, a mẽ sẽŋɛ mɛ, la a ka botɩ nẽrba yẽ ẽ.

¹¹ Tɩ Zifdõma nẽŋadõma ɛɛra ẽ kibsa la pʋam, sɔkra yetɩ: «A boe la bɛ?»

¹² Tɩ nẽrba waasna tɔgra a yelle nẽr-kʋʋŋɔ la pʋam zozo'e, tɩ sɛba yetɩ: «A de la nẽr-sõŋɔ», tɩ basɛba yetɩ: «Ayɛɩ, a pã'asrɩ la nẽrba.»

¹³ La nẽra nẽra daan ka saagɛ tɔgɛ a yelle nẽrba la zẽ'am, ban zotɩ Zifdõma nẽŋadõma la ĩyã.

¹⁴ La kibsa la daan paagɛ la pʋsʋka, tɩ Azezi kẽ Wẽnde-kãtʋm na zãsna nẽrba.

¹⁵ Tɩ la di'ige Zifdõma, tɩ ba yetɩ: «Bʋra-ẽna ẽŋɛ la wãne mina Nawẽnnɛ gõŋɔ sõŋa, dee ka yẽ zãsŋɔ?»

¹⁶ Tɩ Azezi yele ba yetɩ: «Mam zãsŋɔ la ka ze'ele mam mẽŋa zẽ'am, la ze'ele la sɛka n tõm mam na zẽ'am.

¹⁷ Nẽra sãn bɔɔra tɩ a ẽŋɛ Nawẽnnɛ n boorɩ se'em, a wʋn bãŋɛ zãsŋɔ la sãn ze'ele la Nawẽnnɛ zẽ'am, bɩɩ mam sãn tɔgra la mam mẽŋa pãŋa.

¹⁸ Nẽr-sɛka n tɔgrɩ la a mẽŋa pãŋa, eerɩ la a mẽŋa pẽka. La nẽr-sɛka n eerɩ sɛka n tõm ẽ na pẽka, ẽŋa de la sɩra dãana, la sɛla n ka masɛ ka boe a pʋam.

¹⁹ Amoyisi n bɔ ya lɔɔ la, dagɩ bɛla? La ya nẽra nẽra ka ɩtɩ lɔɔ la n yele se'em na. Bẽm tɩ ya ɛɛra mam tɩ ya kʋ?»

²⁰ Tɩ nẽr-kʋʋŋɔ la lerge ẽ yetɩ: «Kʋlkã'arga n dolɩ fo! Ãn eerɩ fʋ tɩ a kʋ?»

²¹ Tɩ Azezi lerge ba yetɩ: «Mam daan tõm tõon-yãlma ayɩla mɛ, tɩ la di'ige ya.

²² Amoyisi n yʋʋn bɔ ya nõorɛ yetɩ, ya wãta ya budimto. La, la dagɩ Amoyisi n pɔsɛ ẽŋɛ bɛla, la de la tɩ sɔ-yaabdõma. La yãma wãtɩ mɛ baa vo'osgo daarɛ.

²³ Yãma sãn wãta ya budimto vo'osgo daarɛ tɩ la ka sã'am Amoyisi lɔɔ la, bẽm tɩ yãma sũnsõa yĩige la mam, mam n daan botɩ bʋraa la yẽ ĩmã'asʋm vo'osgo daarɛ la ĩyã.

²⁴ Da kãn dɩkɛ-ya nini n yẽ se'em mõŋɛ nẽra bʋʋrɔ, bɔ-ya bʋʋrɔ wʋ lan masɛ se'em na.»

²⁵ Tɩ Zerizalɛm nẽrba basɛba soke yetɩ: «Dagɩ bʋra-ẽna tɩ ba eerɩ tɩ ba kʋ la?

²⁶ Bɩsɛ-ya, a tɔgrɩ la nẽr-kʋʋŋɔ pʋam, dee tɩ ba ka yele ẽ se'ere. Nẽŋadõma la na'an bãŋɛ mɛ tɩ a de la Krisi tɩ Nawẽnnɛ tõm na bɩɩ?

²⁷ Tõma mi bʋra-ẽna n ze'ele zẽ'a, la Krisi la sãn wa sẽna, nẽra kãn bãŋɛ ẽn ze'ele zẽ'a.»

²⁸ Bɛla tɩ a Azezi daan tɔgɛ ke'enke'em ẽn zãsnɩ nẽrba Wẽnde-kãtʋm na yetɩ: «Ya tẽ'esɛ tɩ ya mi mam mɛ dee bãŋɛ mam n ze'ele zẽ'a, la mam ka wa'am na m mẽŋa nõorɛ. La sɛka n tõm mam na de la sɩra dãana, yãma ka mi ẽ.

²⁹ La mam nõo mi ẽ, se'ere n soe la, mam ze'ele la ẽŋa zẽ'am, ẽŋa n tõm mam.»

³⁰ Tɩ ba ɛɛra sore tɩ ba yõkɛ ẽ, la nẽra nẽra ka kalʋm ẽ, se'ere n soe la, a wakatɛ daan nãn ka paagɛ.

³¹ La nẽr-kʋʋŋɔ la nẽrba zozo'e daan bɔ ẽ sɩra mɛ, dee yɛta tɩ: «Krisi la sãn wa wa'am, a kãn yãŋɛ ẽŋɛ bõn-yãlma gãnna bʋra-ẽna n ẽŋɛ wã.»

Farisi dõma tõm nẽrba tɩ ba yõkɛ Azezi

³² Tɩ Farisi dõma wõm nẽrba la n waasnɩ Azezi yelle, tɩ bãma la Nawẽnnɛ kãabgɔ kẽma nẽŋadõma tõm gu'urba tɩ ba ka yõkɛ Azezi.

³³ Tɩ Azezi yele yetɩ: «Mam wʋn ken bɔna la ya la wakatɛ fẽe, dee lebe sɛka n tõm mam na zẽ'am.

³⁴ Ya wʋn ɛɛra mam, la ya kãn yẽ mam, la mam n boe zẽ'a na, ya kãn tã'agɛ wa'am bilam.»

³⁵ Bɛla tɩ Zifdõma yele taaba yetɩ: «Bʋra-ẽna wʋn wa sẽŋɛ la bɛ tɩ tõma kãn yẽ ẽ? A yetɩ a sẽŋɛ la Zifdõma n wɩrgɛ bɔna Grɛkɩdõma tẽŋasʋka la zẽ'am, ka zãsʋm Grɛkɩdõma bɩɩ?

³⁶ Yetɔg-ẽna wã võorɛ de la bẽm tɩ a yetɩ: ‹Ya wʋn ɛɛra mam, la ya kãn yẽ mam, la mam n boe zẽ'a na, ya kãn tã'agɛ wa'am bilam?› »

Nawẽnnɛ Sɩa n bɔ'ɔrɩ vɔm

³⁷ La kibsa la ba'asgɔ daarɛ n de a dabs-kãtɛ daarɛ, tɩ Azezi daan isge ze'ele tɔgra ke'enke'em yetɩ: «Koyũuro sãn tara nẽr-sɛka, a wa'am mam zẽ'am wa yũ.

³⁸ Nẽr-sɛka n bɔ mam sɩra, ko'om n bɔ'ɔrɩ vɔm wʋn bulla a pʋam, wʋ Nawẽnnɛ gõŋɔ n yele se'em na.»

³⁹ Azezi n yele bɛla la, la de la Nawẽnnɛ Sɩa tɩ sɛba n bɔ'ɔrɩ ẽ sɩra la wʋn wa to'oge. Se'ere n soe la, Nawẽnnɛ daan nãn ka bɔ a Sɩa la, Azezi n daan nãn ka yẽ a na'am pãŋa la ĩyã.

Nẽrba la welse mɛ Azezi ĩyã

⁴⁰ Nẽr-kʋʋŋɔ la n wõm yetɔg-bãna la, tɩ basɛba yetɩ: «Ẽna sɩrɩ de la Nawẽnnɛ nõtɔ'ɔsa la.»

⁴¹ Tɩ basɛba yetɩ: «Ẽna de la Krisi la.» Tɩ basɛba daan yetɩ: «Krisi la wʋn ze'ele la Galile bɩɩ?

⁴² Nawẽnnɛ gõŋɔ la yele tɩ Krisi la wʋn dɛna la naba Adavidi yɩɩŋa, a wʋn ze'ele la Bɛtelɛm, tẽn-sɛka tɩ Adavidi yʋʋn boe la.»

⁴³ Bɛla tɩ welgre wa'am nẽrba la pʋam Azezi ĩyã.

⁴⁴ Tɩ ba nẽrba basɛba daan bɔɔra tɩ ba yõkɛ ẽ, la nẽra nẽra ka kalʋm ẽ.

⁴⁵ La gu'urba la tɩ kãabgɔ kẽma nẽŋadõma, la Farisi dõma la tõm na lebe ba zẽ'am mɛ, tɩ ba soke ba yetɩ: «Bẽm tɩ ya ka yõkɛ ẽ wa'am?»

⁴⁶ Tɩ ba lerge yetɩ: «Nẽra nãn ka tɔgɛ wʋ bʋra-ẽna wã.»

⁴⁷ Tɩ Farisi dõma la soke ba yetɩ: «A pã'asɛ yãma mẽ yãŋɛ mɛ?

⁴⁸ Tõma nẽŋadõma nẽra ayɩla, bɩɩ Farisi nẽra bɔ ẽ sɩra mɛ bɩɩ?

⁴⁹ La de la nẽr-kʋʋŋɔ la n ka mi lɔɔ la, ba wʋn yẽ la kã'a-be'ero.»

⁵⁰ Tɩ Anikodɛm n de ba nẽra ayɩla n daan sẽŋɛ ka yẽ Azezi la, yele ba yetɩ:

⁵¹ «Tõma lɔɔ la bɔ sore tɩ tɩ mõŋɛ nẽra bʋʋrɔ, dee ka selse ẽ bãŋɛ ẽŋa n ẽŋɛ sɛla?»

⁵² Tɩ ba lebse yele ẽ yetɩ: «Fõn mẽ de la Galile nẽra bɩɩ? Ɛ bɩsɛ, fʋ wʋn bãŋɛ tɩ Nawẽnnɛ nõtɔ'ɔsa ka ze'etɩ Galile.» [

⁵³ Tɩ nẽra woo daan kule a yire.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan