Bìoball air-loidhne

Azã 20 - Farefare Ninkaré

Azezi vo'ore
( Amatie 28:1-8 , Amarkɩ 16:1-8 , Aluki 24:1-12 )

¹ Lasrɩ daarɛ bulika yʋ'ʋŋɔ yʋ'ʋŋɔ, tɩ Amaari n ze'ele Magdala sẽŋɛ yɔɔm na. Ẽn paagɛ la, a yẽ tɩ kugre la bilge mɛ dee basɛ yɔɔgɔ la nõorɛ.

² Tɩ a zoe sẽŋɛ Asimõ-pɩyɛɛrɩ la karẽnbi-sɛka tɩ Azezi nõŋɛ la zẽ'am, ka yele ba yetɩ: «Ba dɩkɛ Zuudãana la yɔɔgɔ la pʋam yese mɛ, tõma ka mi ban bĩŋe ẽ zẽ'e-sɛka.»

³ Tɩ Apɩyɛɛrɩ la karẽnbia ayɩla la yese wɛ'ɛsa yɔɔm na.

⁴ Bãma bayi daan lagɩm zɔta mɛ wɛ'ɛsa, tɩ karẽnbia ayẽma la zoe gãŋɛ Apɩyɛɛrɩ dẽŋɛ paagɛ yɔɔm na,

⁵ veese bɩsɛ, yẽ tãna la n gã mĩ, dee ka kẽ.

⁶ Tɩ Asimõ-pɩyɛɛrɩ daan paam poorʋm wa kẽ yɔɔgɔ la pʋam, yẽ tãna la n gã mĩ.

⁷ La tãn-sɛka tɩ ba daan dɩkɛ vile Azezi zuugo la gã mĩ mɛ, la a ka naagɛ la tãna basɛba la, a kilim mɛ gã ayẽma.

⁸ Tɩ karẽnbia ayẽma la n dẽŋɛ paagɛ la, mẽ kẽ yɔɔgɔ la pʋam, yẽ bõn-sɛba n boe mĩ na, la a bɔ sɩra mɛ.

⁹ La karẽnbiisi la daan nãn ka wõm Nawẽnnɛ gõŋɔ n yetɩ, dẽnɩ tɩ Azezi ki dee vo'oge la võorɛ.

¹⁰ Tɩ karẽnbiisi bayi la daan lebe kule ba yiɛ.

Azezi dɩkɛ a mẽŋa pa'alɛ Amaari n ze'ele Magdala
( Amatie 28:9-10 , Amarkɩ 16:9-11 )

¹¹ La Amaari daan ze la yɔɔgɔ la nõorʋm yẽŋa kɛlla. A daan kellɩ mɛ dee veese tɩ a bɩsɛ yɔɔgɔ la pʋam,

¹² yẽ malɛkadõma bayi n yɛ fu-pɛɛlsɩ zẽa zẽ'e-sɛka tɩ ba daan bĩŋe Azezi kũm na. Ayɩla zĩ la a zuugo bɔba, tɩ ayɩla zẽa a nãma bɔba.

¹³ Tɩ malɛkadõma la yele ẽ yetɩ: «Pɔka, bẽm n ẽŋɛ tɩ fõn kɛlla?» Tɩ a lerge ba yetɩ: «Ba dɩkɛ la mam Zuudãana, tɩ mam ka mina ban bĩŋe ẽ zẽ'e-sɛka.»

¹⁴ Ẽn tɔgɛ bɛla la, dee gelge yẽ Azezi n ze, la a ka bãŋɛ tɩ la de la ẽŋa.

¹⁵ Tɩ Azezi soke ẽ yetɩ: «Pɔka, bẽm tɩ fõn kɛlla? Ãne tɩ fõn eerɩ?» Tɩ a tẽ'esɛ tɩ a de la gaarɛ la dãana, yele ẽ yetɩ: «M kẽema, la sãn dɛna la fõn dɩkɛ ẽ, yele ma fõn bĩŋe ẽ zẽ'a tɩ m sẽŋɛ ka dɩkɛ ẽ.»

¹⁶ Tɩ Azezi yele ẽ yetɩ: «Amaari.» Tɩ Amaari gelge tɔgɛ la Ebre yetɩ: «Rabuni.» A võorɛ de la karẽnsãama.

¹⁷ Tɩ Azezi yele ẽ yetɩ: «Da kalʋm ma, mam nãn ka zom m Sɔ la zẽ'am. Sẽŋɛ m sɔbiisi la zẽ'am ka yele ba yetɩ: ‹Mam zonnɩ na mam Sɔ Nawẽnnɛ n de yãma Sɔ, la yãma Nawẽnnɛ na zẽ'am.› »

¹⁸ Tɩ Amaari n ze'ele Magdala sẽŋɛ ka yele karẽnbiisi la yetɩ, ẽŋa yẽ Zuudãana la, dee yele ba Azezi n yele ẽŋa se'em.

Azezi dɩkɛ a mẽŋa pa'alɛ a karẽnbiisi
( Amatie 28:16-20 , Amarkɩ 16:14-18 , Aluki 24:36-49 )

¹⁹ La daar-ẽŋa daan de la Lasrɩ daarɛ wẽnsobre, tɩ Azezi karẽnbiisi la bɔna deem, la ba daan yʋ de-sɛka tɩ ba boe a pʋam na kʋlɩnsɩ mɛ, se'ere n soe la, ba daan zotɩ la Zifdõma nẽŋadõma. Tɩ Azezi wa'am wa ze'ele ba tẽŋasʋka yele ba yetɩ: «Sũ-mã'asʋm wʋn bɔna la ya.»

²⁰ Azezi n yele ba bɛla la, a pa'alɛ ba la a nu'usi, la a lʋgrɛ la. La karẽnbiisi la n daan yẽ Zuudãana Azezi la, ba sũure ẽŋɛ yẽlʋm mɛ zozo'e.

²¹ Tɩ Azezi le yele ba yetɩ: «Sũ-mã'asʋm wʋn bɔna la ya. Mam mẽ tõnnɩ ya, wʋ mam Sɔ la n tõm mam se'em na.»

²² Ẽn yele bɛla la, dee fʋʋsɛ ẽŋɛ ba zuo, yele ba yetɩ: «To'oge ya Nawẽnnɛ Sɩa.

²³ Nẽr-sɛka woo tɩ ya basɛ a tõon-be'ero taalɛ, a tõon-be'ero taalɛ ka le bɔna a zuo. La nẽr-sɛka woo tɩ ya zagsɛ ka basɛ a tõon-be'ero taalɛ, a tõon-be'ero taalɛ ken bɔna la a zuo.»

Azezi dɩkɛ a mẽŋa pa'alɛ Atoma tɩ ẽŋa sɩrɩ vo'oge mɛ

²⁴ Atoma n de Azezi karẽnbiisi pia la ayi la nẽra ayɩla tɩ ba wi'iri tɩ «Lɩɩba» la, daan ka boe ba zẽ'am Azezi n daan wa'am mĩ na.

²⁵ Tɩ karẽnbiisi basɛba la yele ẽ yetɩ: «Tõma yẽ Zuudãana la.» Tɩ a yele ba yetɩ: «Mam sãn ka yẽ kʋʋsa la tɩ ba ka a nu'usi, la yisa dɩkɛ m nu'ubiire kalʋm ba, la mam sãn ka kalʋm a lʋgrɛ la, mam kãn malɩn bɔ sɩra.»

²⁶ La bɛla poorʋm dabsa anii daarɛ, tɩ karẽnbiisi la daan le lagsɛ taaba deego la pʋam, tɩ Atoma bɔna la ba lɛ. La kʋlɩnsɩ la daan yʋ mɛ, tɩ Azezi wa'am wa ze'ele ba tẽŋasʋka yele ba yetɩ: «Sũ-mã'asʋm wʋn bɔna la ya.»

²⁷ Dee yele Atoma yetɩ: «Dɩkɛ fʋ nu'ubiire kalʋm mam nu'usi la, dee tẽegɛ fʋ nu'ugo kalʋm mam lʋgrɛ la bɩsɛ. Da kãn sẽ'ena, bɔ sɩra.»

²⁸ Tɩ Atoma lerge ẽ yetɩ: «Fʋ de la mam Zuudãana la mam Nawẽnnɛ.»

²⁹ Tɩ Azezi yele ẽ yetɩ: «La de la fõn yẽ mam na ĩyã tɩ fʋ bɔ sɩra? Sɛba n ka yẽ dee bɔ'ɔra sɩra la tarɩ zu-yẽlʋm.»

Bõn-sɛka n soe tɩ gõŋɔ wã gʋlsɛ

³⁰ Azezi daan tõm tõon-yãlma basɛba mɛ zozo'e a karẽnbiisi la zẽ'am, n ka gʋlsɛ ẽŋɛ gõn-ẽna wã pʋam.

³¹ La bõn-bãna wã gʋlsɛ tɩ ya bɔ la sɩra tɩ Azezi n de Krisi, Nawẽnnɛ Dayʋa la, tɩ ya sãn bɔ ẽ sɩra, ya wʋn yẽ yõvore a yʋ'ʋrɛ ĩyã.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan