Bìoball air-loidhne

Azã 17 - Farefare Ninkaré

Azezi pʋ'ʋsɛ Nawẽnnɛ a nẽrba ĩyã

¹ Azezi n tɔgɛ bɛla kɩ'ɩlɩm na, a gorge bɩsɛ la saazuum yetɩ: «M Sɔ, mam daarɛ paagɛ ya, nã'asɛ mam n de fʋ Dayʋa la, tɩ mam mẽ nã'asɛ fɔ.

² La de la fõn bɔ mam nõorɛ tɩ m sɔna nẽrsaalba wuu, dee bɔ sɛba tɩ fõn bɔ mam na wuu vɔm n ka ba'asrɩ.

³ La vɔm n ka ba'asrɩ la de la ba bãŋɛ fõn, fʋ yɩla mã'a n de Sɩra Dãana Nawẽnnɛ na, la ba bãŋɛ mam Azezi-krisi tɩ fʋ tõm na.

⁴ Mam basɛ tɩ fõn yẽ nã'asgɔ tẽŋa wã zuo mɛ. Mam tõm tõon-sɛba tɩ fõn bɔ mam tɩ m tõm na ba'asɛ mɛ.

⁵ Lɛɛlɛ wã, m Sɔ, botɩ m yẽ nã'asgɔ fʋ zẽ'am, wʋ mam n daan tarɩ na'am pãŋa fʋ zẽ'am se'em, lan dẽŋɛ dũnia n daan nãn ka nãam na.

⁶ Mam botɩ sɛba tɩ fõn looge dũnia nẽrba pʋam bɔ mam na bãŋɛ fõn mɛ. Ba daan de la fõn nẽrba, tɩ fõn dɩkɛ ba bɔ mam, la ba sakɛ fʋ yetɔga la mɛ.

⁷ Lɛɛlɛ wã ba bãŋɛ tɩ fõn bɔ mam sɛla la wuu ze'ele la fõn zẽ'am.

⁸ Se'ere n soe la, mam tɔgɛ ba la yetɔg-sɛba tɩ fõn bɔ mam na, tɩ ba to'oge, dee bãŋɛ sɩra sɩra tɩ mam ze'ele la fõn zẽ'am. La ba bɔ sɩra tɩ fõn tõm mam.

⁹ Mam pʋ'ʋsrɩ la bãma ĩyã, mam ka pʋ'ʋsrɩ dũnia nẽrba ĩyã, la de la nẽr-sɛba tɩ fʋ bɔ mam na ĩyã, se'ere n soe la, bãma de la fõn nẽrba.

¹⁰ La mam bõnɔ de la fõn bõnɔ, tɩ fõn bõnɔ dɛna mam bõnɔ, la mam yẽ nã'asgɔ mɛ ba zẽ'am.

¹¹ Mam ka le bɔna dũnia zuo, la bãma boe la dũnia zuo dee tɩ mam sẽna fõn zẽ'am. M Sɔ n de pʋpeelem dãana, gu'ura ba la fʋ yʋ'ʋrɛ la tɩ fʋ bɔ mam na pãŋa, tɩ ba wʋn dɛna ayɩla wʋ mam la fõn n de ayɩla se'em na.

¹² Mam n daan boe la ba lɛ la, mam daan gu'uri ba la yʋ'ʋr-sɛka tɩ fõn bɔ mam na pãŋa. Mam bɩsɛ ba yelle mɛ sõŋa sõŋa, tɩ nẽra baa ayɩla ka bɔɩ, sãn dagna sɛka n de a sã'am, tɩ fõn gõŋɔ n yele se'em na ẽŋɛ la.

¹³ La lɛɛlɛ wã mam sẽm na fõn zẽ'am, la mam tɔgrɩ la wãna mam nãn ken bɔna dũnia zuo, tɩ ba wʋn tara mam sũ-yẽlga, tɩ ba sũ-yẽlga zo'oge pãɩ.

¹⁴ Mam tɔgɛ fõn yetɔga la bɔ ba mɛ, la dũnia nẽrba sisri ba mɛ, se'ere n soe la, ba dagɩ dũnia bõnɔ, wʋ mam mẽ dagɩ dũnia nẽra se'em na.

¹⁵ Mam ka sosrɩ tɩ fʋ yese ba dũnia wã zuo, la de la tɩ fʋ gu ba la be'em dãana.

¹⁶ La bãma dagɩ dũnia nẽrba, wʋ mam mẽ n dagɩ dũnia nẽra se'em na.

¹⁷ Botɩ fõn sɩra la wʋn basɛ tɩ ba welge to'ore tara pʋpeelem dɛna fʋ nẽrba. Fõn yetɔga la n de sɩra.

¹⁸ Mam mẽ tõm ba dũnia pʋam wʋ fõn tõm mam dũnia zuo se'em na.

¹⁹ La bãma ĩyã tɩ mam welge m mẽŋa to'ore dɩkɛ m mẽŋa bɔ fõn, tɩ fõn sɩra la wʋn botɩ ba mẽ welge ba mẽŋa to'ore tara pʋpeelem dɛna fʋ nẽrba.

²⁰ La dagɩ bãma mã'a ĩyã tɩ mam pʋ'ʋsrɩ, la de la sɛba n wʋn wa bɔ mam sɩra ba yetɔga la ĩyã la mẽ yelle.

²¹ Mam pʋ'ʋsrɩ fõn tɩ fʋ botɩ ba lagɩm dɛna bʋyɩla, wʋ fõn de mam Sɔ n boe la mam lɛ, tɩ mam mẽ bɔna la fõn se'em na, tɩ ba mẽ wʋn lagɩm dɛna bʋyɩla la tõma, tɩ dũnia nẽrba la wʋn bɔ sɩra tɩ fõn tõm mam.

²² La mam bɔ ba na'am pãn-sɛka tɩ fõn bɔ mam na mɛ tɩ ba dɛna ayɩla, wʋ tõma n de ayɩla se'em na.

²³ Tɩ mam wʋn bɔna la ba, tɩ fõn bɔna la mam, tɩ ba wʋn sɩrɩ dɛna ayɩla, tɩ dũnia nẽrba wʋn bãŋɛ tɩ la de la fõn tõm mam, la fõn nõŋɛ ba wʋ fõn nõŋɛ mam se'em na.

²⁴ M Sɔ, mam boorɩ tɩ nẽr-sɛba tɩ fʋ bɔ mam na, mẽ bɔna la mam lɛ zẽ'e-sɛka tɩ mam wʋn bɔna la, tɩ ba wʋn yẽ mam na'am pãŋa, na'am pãn-sɛka tɩ fõn bɔ mam na, se'ere n soe la, fõn nõŋɛ mam mɛ, tɩ dũnia yʋʋn nãn ken ka bɔna.

²⁵ M Sɔ, fõn de sɛka n masɛ. Dũnia nẽrba ka bãŋɛ fõn, la mam nõo bãŋɛ fõn mɛ, la nẽr-bãma bãŋɛ mɛ tɩ la de la fõn tõm mam.

²⁶ Mam botɩ ba bãŋɛ fõn mɛ, la mam wʋn ken botɩ ba bãŋɛ fɔ, tɩ nõŋlʋm sɛka tɩ fõn nõŋɛ mam na, wʋn bɔna la ba, tɩ mam mẽ bɔna la ba.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan