Bìoball air-loidhne

Azã 11 - Farefare Ninkaré

Alazaarɩ vo'ore

¹ Bʋraa ayɩla n daan boe Betani tɩ a yʋ'ʋrɛ dɛna Alazaarɩ, tɩ bã'a yõkɛ ẽ. A tãpa Amaari la a Amartɩ daan kẽ'erɩ la tẽn-ẽŋa pʋam.

² La de la Amaari ẽŋa n daan ka'agɛ tɩdarɛ kaam ẽŋɛ Azezi nãma, dɩkɛ a zomto duuse ba la. Ẽŋa tã n de Alazaarɩ n bẽ'erɩ la.

³ Tɩ a tãpa la daan tõm tɩ ba ka yele Azezi yetɩ: «Zuudãana, fʋ sɩrɛ la bẽ'erɩ mɛ.»

⁴ La Azezi n wõm bɛla la, tɩ a yetɩ: «Bã'a-ẽna ba'asgɔ kãn dɛna kũm. La de la tɩ Nawẽnnɛ yʋ'ʋrɛ yẽ zẽkrɛ, la tɩ Nawẽnnɛ Dayʋa la yʋ'ʋrɛ wʋn zẽkɛ bõn-ẽŋa pʋam.»

⁵ La Azezi daan nõŋɛ Amartɩ la a yɩbga, la Alazaarɩ mɛ.

⁶ La ẽn wõm tɩ Alazaarɩ bẽ'erɩ mɛ na, a ken weege ẽn daan boe zẽ'e-sɛka la dabsa ayi.

⁷ Bɛla poorʋm tɩ a yele a karẽnbiisi la yetɩ: «Tɩ lebe-ya Zude.»

⁸ Tɩ a karẽnbiisi la yele ẽ yetɩ: «Karẽnsãama, lɛɛlɛ wã tɩ Zifdõma daan eerɩ fõn tɩ ba lobe la kuga kʋ. Dee tɩ fõn le yetɩ fʋ lebe bilam?»

⁹ Tɩ Azezi yele ba yetɩ: «Bulika tɩ la ka paagɛ zaanõorɛ, la de la karf-pia la ayi tɩ wʋntɛɛŋa boe. Nẽra sãn sẽnna wʋntɛɛŋa, a ka wẽ'erɩ a nãma, se'ere n soe la, dũnia peelem boe mɛ, tɩ a yẽta.

¹⁰ La nẽra sãn sẽnna yʋ'ʋŋɔ, a wẽ'erɩ a nãma mɛ, se'ere n soe la, peelem ka boe tɩ a yẽta.»

¹¹ Azezi yele bɛla dee yele ba yetɩ: «Tɩ sɩrɛ Alazaarɩ gĩsri mɛ, la mam wʋn sẽŋɛ ka nẽegɛ ẽ.»

¹² Tɩ a karẽnbiisi la yele ẽ yetɩ: «Zuudãana, a sãn gĩsra, a wʋn yẽ ĩmã'asʋm.»

¹³ Azezi tɔgɛ ba la Alazaarɩ kũm yelle. La ba tẽ'esɛ tɩ a tɔgrɩ la gẽem yelle.

¹⁴ Bɛla tɩ Azezi tɔgɛ ba vẽelga yetɩ: «Alazaarɩ ki mɛ.

¹⁵ La mam n daan ka boe mĩ na, mam ɩtɩ sũ-yẽlga mɛ yãma ĩyã, tɩ ya wʋn bɔ mam sɩra. Tɩ sẽŋɛ-ya a zẽ'am.»

¹⁶ Tɩ Atoma (sɛka tɩ ba wi'iri tɩ «Lɩɩba» la) yele a karẽnbi-taaba yetɩ: «Tɩ mẽ sẽŋɛ-ya tɩ tɩ ka lagɩm ki.»

¹⁷ Azezi n daan paagɛ la, tɩ ban laagɛ Alazaarɩ de la dabsa anaasɩ.

¹⁸ La Betani daan lɛm Zerizalɛm masɛ wʋ kilomẽtrɩ atã.

¹⁹ Tɩ Zifdõma zozo'e wa'am tɩ ba pʋ'ʋsɛ Amartɩ, la Amaari ba tã la kũm.

²⁰ La Amartɩ n wõm tɩ Azezi sẽm mɛ na, a daan yese mɛ tʋ'ʋsɛ ẽ. Dee tɩ Amaari weege zẽa yire.

²¹ Tɩ Amartɩ yele Azezi yetɩ: «Zuudãana, fõn daan sãn boe nɩ kalam, mam tã wã kãn ki.

²² La lɛɛlɛ wã, mam ken mina tɩ bõn-sɛka woo tɩ fõn wʋn sose Nawẽnnɛ, a wʋn bɔ fɔ.»

²³ Tɩ Azezi yele ẽ yetɩ: «Fʋ tã la wʋn vo'oge basɛ kũm.»

²⁴ Tɩ Amartɩ lerge ẽ yetɩ: «Mam mi tɩ a wʋn vo'oge dũnia ba'asgɔ daarɛ, tɩ kũm wuu wʋn vo'oge la.»

²⁵ Tɩ Azezi yele ẽ yetɩ: «Mam n de kũm vo'ore dãana, la vɔm dãana. Sɛka n bɔ mam sɩra, baa a sãn ki, a wʋn vo'oge.

²⁶ La sɛka woo n vɔa dee bɔ mam sɩra, kũm kãn tã'agɛ ẽ wakatɛ wuu. Fõn bɔ bõn-ẽna sɩra?»

²⁷ Tɩ Amartɩ lerge ẽ yetɩ: «Ẽe, Zuudãana, mam bɔ sɩra tɩ fõn de la Krisi, Nawẽnnɛ Dayʋa la n sẽm dũnia zuo la.»

²⁸ La ẽn yele bɛla la, a fõrgɛ mɛ, sẽŋɛ ka wi a yɩbga Amaari, sʋgɛ yele ẽ yetɩ: «Karẽnsãama wa'am mɛ, dee wi'ira fõn.»

²⁹ La Amaari n wõm bɛla la, a isge mɛ tɔtɔ wɛ'ɛsa a zẽ'am.

³⁰ La Azezi daan nãn ka paagɛ tẽŋa la pʋam, a ken bɔna la Amartɩ n daan tʋ'ʋsɛ ẽ zẽ'e-sɛka la.

³¹ Tɩ Zifdõma sɛba n wa'am wa pʋ'ʋsɛ kũm na, dee bɔna la Amaari lɛ yire la pʋam na, yẽ tɩ a isge tɔtɔ yɛsra, tɩ ba tẽ'esra tɩ a we'esɩ la yɔɔm tɩ a ka kaasɛ, tɩ ba dɔla ẽ.

³² La Amaari n paagɛ Azezi n boe zẽ'e-sɛka la, yẽ ẽ na, a yigle mɛ a nẽŋam, yele ẽ yetɩ: «M Zuudãana, fõn daan sãn boe nɩ kalam, mam tã wã kãn ki.»

³³ La Azezi n daan yẽ tɩ a kellɩ mɛ, la Zifdõma la n dolɩ ẽ na mẽ kellɩ mɛ na, tɩ a sũure sã'am halɩ, tɩ la dãam ẽ zozo'e,

³⁴ tɩ a soke ba yetɩ: «Yãma laagɛ ẽ na bɛ?» Tɩ ba yele ẽ yetɩ: «Zuudãana, wa'am wa bɩsɛ.»

³⁵ Tɩ Azezi kɛlla.

³⁶ Tɩ Zifdõma la n yẽ bɛla la, yetɩ: «Bɩsɛ-ya ẽn nõŋɛ ẽ se'em.»

³⁷ Tɩ basɛba yele yetɩ: «Dagɩ bʋra-ẽna n daan botɩ fʋa la nini yẽta la, a ka tã wʋn basɛ nɩ tɩ ẽna mẽ da ki?»

³⁸ Tɩ Azezi sũure le sã'am halɩ, tɩ a wɛ'ɛsa yɔɔm na. Yɔɔgɔ la daan de la tãmpĩa yoko, tɩ kugre lige a nõorɛ.

³⁹ Tɩ Azezi yetɩ: «Lakɛ-ya kugre la.» Tɩ sɛka n ki la tã Amartɩ yele Azezi yetɩ: «M Zuudãana, a põn põ'ogɛ mɛ, se'ere n soe la, la de la dabsa anaasɩ n wãna tɩ a boe yɔɔm.»

⁴⁰ Tɩ Azezi soke ẽ yetɩ: «Mam ka yele fʋ yetɩ, fʋ sãn bɔ mam sɩra, fʋ wʋn yẽ Nawẽnnɛ na'am pãŋa?»

⁴¹ Tɩ ba lakɛ kugre la. Tɩ Azezi gorge saazuum yetɩ: «M Sɔ, mam pʋ'ʋsrɩ fɔ, fõn selse mam pʋ'ʋsgɔ la.

⁴² Mam mi tɩ daarɛ woo fʋ selsrɩ mam pʋ'ʋsgɔ mɛ. La mam yele bɛla la nẽr-kʋʋŋɔ wã ĩyã, tɩ ba wʋn bɔ sɩra tɩ fõn tõm mam.»

⁴³ A yele bɛla dee tɔgɛ la ke'enke'em yetɩ: «Alazaarɩ, yese!»

⁴⁴ Tɩ sɛka n daan ki la isge yese. Tɩ tãna vile a nãma la a nu'usi, la tãnnɛ ayẽma n vile a nẽŋa. Tɩ Azezi yele ba yetɩ: «Lorge-ya tãna la, dee basɛ ẽ tɩ a fõrgɛ.»

Zifdõma nẽŋadõma eerɩ sore tɩ ba kʋ Azezi
( Amatie 26:1-5 , Amarkɩ 14:1-2 , Aluki 22:1-2 )

⁴⁵ La Zifdõma sɛba n daan wa'am Amaari zẽ'am wa yẽ Azezi n ẽŋɛ se'em na, ba zozo'e bɔ ẽ sɩra mɛ.

⁴⁶ Tɩ basɛba sẽŋɛ Farisi dõma zẽ'am ka yele ba Azezi n ẽŋɛ se'em na.

⁴⁷ Tɩ kãabgɔ kẽma nẽŋadõma, la Farisi dõma lagsɛ ba sarɩyaditba kẽma yetɩ: «Tɩ wʋn ẽŋɛ la wãne? Bʋra-ẽna wã tõnnɩ la tõon-yãlma zozo'e.

⁴⁸ Tɩ sãn basɛ ẽ tɩ a ɩta bɛla, nẽrba wuu wʋn bɔ ẽ sɩra mɛ, la Rom dõma wʋn wa'am wa sã'am tɩ Wẽnde-kãtɛ wã, la tɩ so'olʋm wã wuu mɛ.»

⁴⁹ Tɩ ba nẽra ayɩla yʋ'ʋrɛ n de Akayifu n daan de kãabgɔ kẽma nẽŋadãana yʋʋn-ẽŋa, yele ba yetɩ: «Yãma ka mi sɛla sɛla.

⁵⁰ Ya ka mi tɩ bʋraa ayɩla sãn ki nẽrba la ĩyã, n sõɩ tɩ buuri la wuu n wʋn sã'am?»

⁵¹ La, la dagɩ a mẽŋa yɛm tɩ a yele bɛla, la de la ẽn daan de kãabgɔ kẽma nẽŋadãana yʋʋn-ẽŋa la tɩ a to'oge Nawẽnnɛ yetɔga tɔgɛ yetɩ, dẽnɩ tɩ Azezi wa ki bɔ bãma buuri la.

⁵² La, la dagɩ bãma buuri la mã'a ĩyã tɩ la masɛ tɩ a ki, la de la Nawẽnnɛ kɔma n wɩrgɛ zẽ'esɩ wuu la ĩyã, tɩ a yetɩ a lagsɛ ba tɩ ba lebge buuri ayɩla.

⁵³ La sẽŋɛ la daar-ẽŋa, tɩ Zifdõma nẽŋadõma ẽŋɛ nõorɛ ayɩla tɩ ba kʋ ẽ.

⁵⁴ Bɛla ĩyã tɩ Azezi ka le ɛɛra Zifdõma tẽŋasʋka tɩ ba yẽta ẽ. A fõrgɛ bilam sẽŋɛ la tẽnsɩ n lɛm mõom, ka kẽ'era tẽŋa yʋ'ʋrɛ n de Efrayim la a karẽnbiisi la.

⁵⁵ La Zifdõma Zɔɔg-basɛ kibsa n daan lɛm, tɩ nẽrba zozo'e ze'ele tẽn-pɩgsɩ pʋam sẽŋɛ Zerizalɛm lan dẽŋɛ Zɔɔg-basɛ kibsa la, tɩ ba ka malgɛ ba mẽŋa wʋ ba sisgo n yetɩ ba ɩta se'em na.

⁵⁶ Tɩ ba ɛɛra Azezi, sẽŋɛ ka zɛ Wẽnde-kãtʋm na sɔkra taaba yetɩ: «Yãma tẽ'esɛ la dẽna? A sɩrɩ kãn wa'am kibsa wã?»

⁵⁷ La kãabgɔ kẽma nẽŋadõma, la Farisi dõma la daan bɔ la nõorɛ tɩ nẽra sãn mina ẽn boe zẽ'a, a pa'alɛ tɩ ba yõkɛ ẽ.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan