Bìoball air-loidhne

Azã 10 - Farefare Ninkaré

Dũnsĩina la a piisi makrɛ

¹ La Azezi daan yetɩ: «Mam yetɩ ya la sɩra sɩra, tɩ nẽr-sɛka n ka dolɩ zanõrɛ kẽ'era piisi denne pʋam, dee dɔla lalga kẽ'era, ẽŋa de la nayiga la fãara.

² La nẽr-sɛka n dolɩ zanõrɛ la kẽ'era, ẽŋa n de piisi la dũnsĩina.

³ La zanõrɛ la gu'ura yo'orɩ mɛ bɔ'ɔra ẽŋa. Tɩ piisi la mina a kõa, tɩ a wi'ira ẽn soe sɛba la yʋ'ʋra, botɩ ba dɔla ẽ yɛsra.

⁴ La a sãn tarɩ a piisi la wuu yese, a tollɩ la ba nẽŋa sẽnna, tɩ ba dɔla ẽ, ban mi a kõa la ĩyã.

⁵ La ba kãn malɩn doose sãana, ba wʋn zoe mɛ fõrgɛ dee basɛ ẽ, ban ka mi a kõa la ĩyã.»

⁶ Azezi makɛ la makrɛ ẽna wã bɔ ba, la ba ka bãŋɛ ẽn tɔgɛ se'em bɔ ba la võorɛ.

Azezi n de zanõrɛ

⁷ Tɩ Azezi le yele ba yetɩ: «Mam yetɩ ya la sɩra sɩra, tɩ mam n de piisi denne na zanõrɛ.

⁸ Sɛba wuu n dẽŋɛ mam wa'am na de la nayigba la fãarba, la piisi la ka selse ba.

⁹ Mam n de zanõrɛ la. La nẽr-sɛka n dolɩ mam zẽ'am kẽ'era, a wʋn yẽ fãarɛ. La a wʋn kẽ'era dee yɛsra, yẽta a dia.

¹⁰ Nayiga sẽm tɩ a zũ mɛ, la a kʋ, la a sã'am mã'a, la mam wa'am tɩ nẽrba n yẽ vɔm sõŋa sõŋa.»

Azezi n de dũnsĩin-sõŋɔ

¹¹ Tɩ Azezi le yele ba yetɩ: «Mam n de dũnsĩin-sõŋɔ. Dũnsĩin-sõŋɔ sakɛ kũm mɛ a piisi ĩyã.

¹² La nẽra n tõnnɩ tɩ ba yɔɔra ẽ, tɩ a ka sɔna piisi la, a ka bɩsrɩ ba sõŋa, la a sãn yẽ saasaa n sẽm, a basrɩ piisi la mɛ dee zɔta. La saasaa la wʋn yõgɛ piisi la mɛ, botɩ ba wɩrgɛ.

¹³ Se'ere n soe la, a tõnnɩ tɔ'ɔra la yɔɔrɔ, a ka fablɩ piisi la yelle.

¹⁴ Mam n de dũnsĩin-sõŋɔ la, la mam mi m piisi la mɛ, tɩ ba mẽ mina mam,

¹⁵ wʋ mam Sɔ Nawẽnnɛ n mi mam, tɩ mam mẽ mina ẽ se'em na. Mam sakɛ kũm mɛ m piisi la ĩyã.

¹⁶ La mam tarɩ piisi basɛba mɛ n ka boe denne wã pʋam. Dẽnɩ tɩ mam tarɩ ba wa'am, tɩ ba wõm mam kõa, lagɩm na bãna tɩ ba dɛna ayɩla, tɩ dũnsĩina ayɩla bɩsra ba.

¹⁷ Mam Sɔ nõŋɛ mam mɛ, mam n dɩkɛ m vɔm bɔ'ɔra nẽrsaalba, dee wʋn le to'oge ẽ na ĩyã.

¹⁸ Nẽra nẽra ka to'orɩ mam vɔm. Mam mẽŋa n wʋn dɩkɛ ẽ bɔ. Mam tarɩ pãŋa mɛ wʋn dɩkɛ m vɔm bɔ, dee tara pãŋa wʋn le to'oge ẽ. Mam Sɔ n bɔ mam nõorɛ tɩ m ẽŋɛ se'em n bɛla.»

¹⁹ Yetɔg-bãna ĩyã tɩ welgre daan le wa'am Zifdõma la tẽŋasʋka.

²⁰ Tɩ basɛba zozo'e yetɩ: «Kʋlkã'arga n dolɩ ẽ, a de la zɔlgɔ, bẽm tɩ ya sɛlsra ẽ?»

²¹ Tɩ basɛba yetɩ: «Yetɔg-bãna wã dagɩ kʋlkã'arga n dolɩ nẽra yetɔga. Kʋlkã'arga tã wʋn botɩ fʋa nini yẽta?»

Azezi la Nawẽnnɛ de la ayɩla

²² Wakat-ẽŋa Zifdõma Wẽnde-kãtɛ la malgrɛ tẽerɛ kibsa n daan boe Zerizalɛm. La daan de la ɔɔrɔ wakatɛ.

²³ Tɩ Azezi sẽŋɛ Wẽnde-kãtʋm na ka gilgra zẽ'e-sɛka tɩ ba wi'iri tɩ Asalomõ võnana la.

²⁴ Tɩ Zifdõma lagsɛ gilge ẽ, yele ẽ yetɩ: «Fõn wʋn basɛ tɩ tõma sẽ'ena ka paagɛ la dabʋrɛ? Fʋ sãn dɛna la Krisi la, sɛka tɩ Nawẽnnɛ tõm na, fʋ yele to sɩra sɩra.»

²⁵ Tɩ Azezi lerge ba yetɩ: «Mam põn yele ya mɛ, tɩ ya ka bɔ mam sɩra. Tõon-sɛba tɩ mam tõnnɩ na m Sɔ yʋ'ʋrɛ la, pa'alɩ mam n de sɛka mɛ.

²⁶ La yãma ka bɔ mam sɩra, yãma n dagɩ mam piisi la ĩyã.

²⁷ Mam piisi la wõnnɩ mam kõa mɛ, mam mi ba mɛ, la ba dolɩ mam mɛ.

²⁸ Mam bɔ'ɔrɩ ba la vɔm n ka ba'asrɩ, tɩ ba kãn malɩn sã'am, la nẽra ka tã wʋn fãagɛ ba mam nu'usum.

²⁹ Mam Sɔ la n bɔ mam bãma la, a gãnnɩ sɛla woo mɛ, nẽra ka tã wʋn fãagɛ ba mam Sɔ la nu'usum.

³⁰ Mam, la mam Sɔ la de la ayɩla.»

³¹ Tɩ Zifdõma le pĩ'ise kuga tɩ ba lobe ẽ kʋ.

³² Tɩ Azezi yele ba yetɩ: «Mam Sɔ botɩ mam tõm tõon-sõma zozo'e mɛ pa'alɛ ya. Tõon-sõma bãma pʋam, tõon-kãna ĩyã tɩ ya bɔɔra tɩ ya lobe mam na kuga?»

³³ Tɩ Zifdõma la lerge ẽ yetɩ: «La dagɩ tõon-sõma yelle tɩ tõma bɔɔra tɩ tɩ lobe fʋ la kuga kʋ, la de la Nawẽnnɛ yʋ'ʋr-sã'aŋɔ la ĩyã, fõn de nẽrsaala dee ẽŋɛ fʋ mẽŋa tɩ fõn de la Nawẽnnɛ na ĩyã.»

³⁴ Tɩ Azezi yele ba yetɩ: «La gʋlsɛ ya lɔɔ gõŋɔ la pʋam tɩ Nawẽnnɛ yetɩ: ‹Ya de la wẽna.›

³⁵ Tɩ mi tɩ Nawẽnnɛ gõŋɔ yetɔga la de la sɩra, la a ka tã wʋn sã'am. A wi'iri sɛba tɩ a tɔgɛ yetɔga bɔ ba la tɩ wẽna.

³⁶ La mam tɩ Nawẽnnɛ looge tõm dũnia zuo wã, yãma yele mam tɩ m sã'anɩ la Nawẽnnɛ yʋ'ʋrɛ, mam n yele tɩ mam de la Nawẽnnɛ Dayʋa la ĩyã?

³⁷ Mam sãn ka tõnna m Sɔ tõoma, ya da bɔ mam sɩra.

³⁸ La mam sãn tõnna a tõoma, baa ya sãn ka bɔ mam sɩra, ya bɔ m tõoma la sɩra, tɩ ya tã'agɛ bãŋɛ, la ya sakɛ sɩra tɩ mam Sɔ la boe la mam lɛ mɛ, tɩ mam mẽ bɔna la ẽ.»

³⁹ Tɩ ba le zɩgra tɩ ba yõkɛ ẽ, tɩ a põsɛ.

⁴⁰ La ẽn põsɛ la, a le dooge la Zʋrdẽ kʋlaa la doone, zẽ'e-sɛka tɩ Azã daan pɔsɛ bɔna mĩ misri nẽrba ko'om pʋam na, ka bɔna bilam.

⁴¹ Tɩ nẽrba zozo'e daan sẽŋɛ a zẽ'am. Ba daan tɔgrɩ yetɩ: «Azã ka tõm tõon-yãlma baa ayɩla, la Azã n daan tɔgɛ bʋra-ẽna yelle se'em wuu la de la sɩra.»

⁴² La nẽrba zozo'e bɔ ẽ sɩra mɛ bilam.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan