Bìoball air-loidhne

Aromduma 9 - Farefare Ninkaré

Nẽr-sɛba tɩ Nawẽnnɛ looge

¹ Mam yetɩ la sɩra, mam de la Krisi nẽra, mam ka parnɩ. Nawẽnnɛ Sɩa n botɩ mam mina m sũure pʋam tɩ mam n yetɩ m yele se'em na, de la sɩra.

² Mam tarɩ la sũ-sã'aŋɔ zozo'e, la sũ-dõoma daarɛ woo m buuri la ĩyã.

³ La sãn tã nɩ tɩ Nawẽnnɛ kã be'em bɔ mam, tɩ mam welge la Krisi, tɩ la sõŋɛ mam sɔbiisi la n de mam buuri la, mam boorɩ mɛ.

⁴ Ba de la Ɩsrayɛlɩ dõma, la de la Nawẽnnɛ n looge ba, botɩ ba lebge a kɔma, bɔ ba nã'asgɔ, bĩŋe nõa la ba lɛ, bɔ ba lɔɔ, la sore tɩ ba nã'asra ẽ, dee yele ba ẽŋa n wʋn ẽŋɛ bõn-sɛba bɔ ba.

⁵ Ba buuri la ze'ele la tɩ sɔ-yaaba Abraham, la a yɩɩsɩ la pʋam. La Krisi n lebge nẽrsaala la, de la bãma buuri nẽra. Ẽŋa n de Nawẽnnɛ n gãnnɩ sɛla woo la n soe pẽka wakatɛ n ka tarɩ ba'asgɔ. Amina.

⁶ Mam n yele se'em na, la ka boorɩ tɩ la yetɩ Nawẽnnɛ ka ẽŋɛ ẽn yetɩ a ẽŋɛ se'em na. La, la dagɩ sɛba wuu n de Ɩsrayɛlɩ buuri la n de Ɩsrayɛlɩ dõma mẽŋa mẽŋa Nawẽnnɛ zẽ'am.

⁷ La dagɩ Abraham yɩɩsɩ la wuu n de a kɔma mẽŋa mẽŋa. Se'ere n soe la, Nawẽnnɛ yele Abraham yetɩ: «La de la A'izakɩ kɔma buuri n wʋn dɛna fʋ yɩɩsɩ tɩ mam bĩŋe nõorɛ tɩ m bɔ fʋ la.»

⁸ La boorɩ tɩ la yetɩ, la dagɩ kɔm-sɛba tɩ Abraham dɔgɛ la wuu n de Nawẽnnɛ kɔma. La de la kɔm-sɛba n dɔgɛ tɩ la doose wʋ Nawẽnnɛ n bĩŋe a nõorɛ se'em na, n de Abraham yɩɩsɩ mẽŋa mẽŋa, bãma n de Nawẽnnɛ kɔma.

⁹ Nawẽnnɛ bĩŋe nõorɛ la wãna yetɩ: «Wakat-ẽna sãn wa paagɛ, mam wʋn leme wa'am, la Asaara wʋn tara dayʋa.»

¹⁰ La dagɩ bɛla mã'a, tõma yaaba A'izakɩ pɔga Arabɛka yʋʋn dɔgɛ la dayɔɔsɩ bayi, tɩ ba dɛna lɩɩba.

^11-12 Wakat-sɛka tɩ a yʋʋn nãn ka dɔgɛ ba la, ba nãn ka ẽŋɛ sɛla n de sõŋa bɩɩ be'em, tɩ Nawẽnnɛ yʋʋn yele yetɩ: «Kẽema la n wʋn lebge a yɩbga la tõntõnna, tõnna bɔ'ɔra ẽ.» La a yele bɛla tɩ ẽn looge yɛm se'em na n sẽŋɛ nẽŋa. Nawẽnnɛ n looge nẽr-sɛka la, la dagɩ a tõoma ĩyã, la de la Nawẽnnɛ n looge yɛm wi ẽ.

¹³ La gʋlsɛ Nawẽnnɛ gõŋɔ pʋam yetɩ: «Mam nõŋɛ la Azakɔbɩ, dee basɛ A'eso.»

¹⁴ Bɛla, tɩ wʋn yetɩ bo? Tɩ wʋn yetɩ Nawẽnnɛ n ɩtɩ se'em na ka masɛ bɩɩ? Ayɛɩ, la dagɩ bɛla.

¹⁵ Nawẽnnɛ yʋʋn yele Amoyisi yetɩ: «Mam wʋn zoe la nẽr-sɛba tɩ mam boorɩ la ninbãalga. La mam wʋn tara la nẽr-sɛka tɩ mam boorɩ la zĩile.»

¹⁶ Bɛla, la dagɩ nẽrsaala n boorɩ se'em, bɩɩ ẽn mõrgrɩ se'em, la de la Nawẽnnɛ n zotɩ ninbãalga.

¹⁷ La Nawẽnnɛ gõŋɔ pʋam la gʋlsɛ tɩ Nawẽnnɛ yele naba Afaarõ yetɩ: «Mam n bɔ fʋ na'am tɩ m dɩkɛ fʋ pa'alɛ m pãŋa, tɩ m yʋ'ʋrɛ wʋn yese dũnia wuu.»

¹⁸ Bɛla, Nawẽnnɛ zotɩ la nẽr-sɛba tɩ a boorɩ la ninbãalga, la ẽn boorɩ tɩ sɛka sũure kɛ'ɛm na, a botɩ a sũure kɛ'ɛm mɛ.

¹⁹ Dase'ere fʋ wʋn soke mam yetɩ: «La sãn dɛna bɛla, bẽm tɩ Nawẽnnɛ zɛrgra nẽrba tɩ ba ka ẽŋɛ sõŋa? Ãne n tã wʋn zagsɛ Nawẽnnɛ n boorɩ se'em na?»

²⁰ Nẽrsaala, fõn de la ãne wẽ'era nõke'ene la Nawẽnnɛ? Yɔgrɔ lɔkɔ wʋn soke yagba n yagbɛ ẽ na yetɩ: «Bẽm tɩ fʋ yagbɛ mam wãna?»

²¹ Yagba la tã wʋn ẽŋɛ ẽŋa n boorɩ se'em la yɔgrɔ la mɛ. A tã wʋn dɩkɛ yɔgrɔ bʋyɩla mɛ, dɩkɛ ba pʋsʋka yagbɛ lɔkɔ n tarɩ yõorɔ dɛna tʋʋlʋm bõnɔ, dee dɩkɛ pʋsʋka yagbɛ lɔkɔ n dagɩ tʋʋlʋm bõnɔ.

²² La de la bɛla tɩ Nawẽnnɛ ẽŋɛ. Nawẽnnɛ boorɩ tɩ a pa'alɛ la a sũ-isgre, dee botɩ nẽrba wuu bãŋɛ a pãŋa. La a yõkɛ a mẽŋa mɛ, mã'agɛ a sũure la sɛba n masɛ tɩ a sũ-isgre sige ba zuto, dee nara tɩ a sã'am ba la.

²³ La a ken bɔɔra tɩ a pa'alɛ la a nã'asgɔ n zo'oge se'em nẽr-sɛba tɩ a zotɩ ba ninbãalga la zẽ'am. Bãma de la sɛba tɩ a põn mãasʋm tɩ ba po yẽ a nã'asgɔ.

²⁴ La de la tõma sɛba tɩ a looge la, la dagɩ Zifdõma la mã'a, la po dɛna la sɛba n dagɩ Zifdõma la.

²⁵ La de wʋ A'oze gõŋɔ la pʋam tɩ la põn gʋlsɛ tɩ Nawẽnnɛ yetɩ: «Nẽr-sɛba n yʋʋn dagɩ mam nẽrba la, mam wʋn wi ba tɩ ba dɛna mam nẽrba. La buuri sɛka tɩ mam yʋʋn ka nõŋɛ ba la, mam wʋn yetɩ mam nõŋɛ ba mɛ.

²⁶ La zẽ'e-sɛka tɩ ba yʋʋn yetɩ ba tɩ ba dagɩ mam nẽrba la, zẽ'e-ẽŋa ba wʋn wi'ira ba tɩ mam n de Nawẽnnɛ n vɔa la kɔma.»

²⁷ La Nawẽnnɛ nõtɔ'ɔsa A'ezayi yʋʋn tɔgɛ Ɩsrayɛlɩ dõma yelle yetɩ: «Baa Ɩsrayɛlɩ dõma sõorɛ sãn zo'oge wʋ tẽntõnbĩ'isgo n boe ko-kãtɛ nõorʋm na, ba nẽrba fẽfẽe mã'a n wʋn yẽ fãarɛ.

²⁸ Se'ere n soe la, Zuudãana Nawẽnnɛ n yele se'em na, a wʋn ẽŋɛ a wuu mɛ tɔtɔ tẽŋa zuo.»

²⁹ La ken dɛna wʋ A'ezayi n yʋʋn põn yele se'em yetɩ: «Zuudãana Nawẽnnɛ n de ke'eŋo wuu dãana la yʋʋn sãn ka deege nɩ yɩɩsɩ fẽe bɔ tõma, tõma wʋn lebge nɩ wʋ Sodom dõma, dee ãna wʋ Gomõorɩ dõma.»

Nẽr-sɛba n bɔ Azezi sɩra n masɛ Nawẽnnɛ zẽ'am

³⁰ Bɛla, tɩ wʋn yetɩ bo? Bu-zãŋsɩ n daan ka eerɩ tɩ ba dɛna nẽrba n masɛ Nawẽnnɛ zẽ'am na, Nawẽnnɛ botɩ ba dɛna la nẽrba n masɛ a zẽ'am, ban bɔ ẽ sɩra la ĩyã.

³¹ Dee tɩ Ɩsrayɛlɩ dõma n daan eerɩ tɩ lɔɔ la botɩ ba dɛna nẽrba n masɛ Nawẽnnɛ zẽ'am na, ka yãŋɛ ẽŋɛ lɔɔ la n yele se'em na.

³² Bẽm ĩyã? Ba ka eerɩ tɩ ba masɛ Nawẽnnɛ zẽ'am bɔ sɩra ĩyã, ba tẽ'esɛ tɩ bãma tõoma mã'a ĩyã tɩ bãma wʋn masɛ Nawẽnnɛ zẽ'am. Ba wẽ ba nãma la kugre tɩ nẽrba wẽ'erɩ nãma luta,

³³ wʋ lan gʋlsɛ Nawẽnnɛ gõŋɔ pʋam yetɩ: «Bɩsɛ ya! Mam bĩŋri la kugre n wẽ'erɩ nãma Siyõ, a de la kugre n botɩ nẽrba wẽ'era nãma luta. La nẽr-sɛka n bɔ ẽ sɩra, yãnnɛ kãn di ẽ.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan