Bìoball air-loidhne

Aromduma 5 - Farefare Ninkaré

Krisi n naagɛ tõma la Nawẽnnɛ

¹ Bɛla, Nawẽnnɛ botɩ tõma dɛna sɛba n masɛ a zẽ'am na, tõma n bɔ ẽ sɩra la ĩyã. La tõma tarɩ sũ-mã'asʋm mɛ naagɛ la Nawẽnnɛ tõma Zuudãana Azezi-krisi ĩyã.

² Azezi-krisi n botɩ tɩ tãna wʋn kẽ Nawẽnnɛ zẽ'am yẽ a yel-sõnnɛ, tõma n bɔ ẽ sɩra la ĩyã. Yel-sõnnɛ ẽŋa tɩ tõma te'ege zɛ kãŋkãŋɛ, dee ɩta sũ-yẽlga tara pʋtẽ'erɛ gu'ura tɩ tɩ wʋn yẽ na'am pãŋa Nawẽnnɛ zẽ'am.

³ La tõma ken ɩta la sũ-yẽlga nãmsgɔ pʋam, tõma mi tɩ nãmsgɔ botɩ tɩ mõrgra sẽnna la nẽŋa.

⁴ Tɩ sãn mõrgra sẽnna nẽŋa, la botɩ tɩ ɩta la sɩra yãŋra. Tɩ sãn ɩta sɩra yãŋra, la botɩ tɩ tara pʋtẽ'erɛ gu'ura la sɛla tɩ tɩ bɔ sɩra la.

⁵ Pʋtẽ'e-ẽŋa tɩ tɩ tarɩ la kãn ẽŋɛ tɩ yãnnɛ, se'ere n soe la, Nawẽnnɛ Sɩa la tɩ a bɔ tõma la ẽŋɛ la a nõŋlʋm tɩ sũa pʋam.

⁶ Se'ere n soe la, tõma n daan ka tã wʋn looge yelle la, Nawẽnnɛ n looge yɛm wakat-sɛka la n paagɛ la, Krisi ki mɛ tõon-be'ero dõma ĩyã.

⁷ La de la toogo tɩ nẽra ki nẽra n masɛ ĩyã. La dase'ere, tã tɩ nẽr-sɛka wʋn yẽ bʋraanɛ sakɛ ki nẽr-sõŋɔ ĩyã.

⁸ La Nawẽnnɛ pa'alɛ ẽŋa n nõŋɛ tõma zozo'e se'em mɛ, tɩ tõma n daan ken dɛna tõon-be'ero dõma la, tɩ Krisi ki tõma ĩyã.

⁹ Krisi n ki tɩ a zɩɩm yese la ĩyã n botɩ tõma masɛ Nawẽnnɛ zẽ'am, bɛla, la de la sɩra tɩ Krisi n wʋn fãagɛ tõma, tɩ tɩ põsɛ Nawẽnnɛ sũ-isgre.

¹⁰ Tõma daan de la Nawẽnnɛ bɛ'ɛba, la a Dayʋa la kũm ĩyã tɩ tõma naagɛ la ẽ. Bɛla, tõma n naagɛ la Nawẽnnɛ na, la de la sɩra tɩ Krisi n vɔa la ĩyã, tɩ wʋn yẽ fãarɛ.

¹¹ Sɛla n pa'asɛ, tõma ɩtɩ sũ-yẽlga mɛ la Nawẽnnɛ, tõma Zuudãana Azezi-krisi ĩyã, ẽŋa n botɩ tõma naagɛ la Nawẽnnɛ na.

Adam la Azezi-krisi yelle

¹² La de la nẽra ayɩla n yʋʋn tõm tõon-be'ero ĩyã n botɩ tõon-be'ero wa'am dũnia. Tɩ tõon-be'ero la tarɩ kũm wa'am. Bɛla tɩ kũm kʋʋra nẽrsaalba wuu, ban tõnnɩ tõon-be'ero la ĩyã.

¹³ Halɩ lan dẽŋɛ Nawẽnnɛ n bɔ Amoyisi a lɔɔ la, tõon-be'ero yʋʋn boe dũnia zuo mɛ. La lɔɔ la n yʋʋn nãn ka boe la, Nawẽnnɛ yʋʋn ka geelɩ tõon-be'ero.

¹⁴ Halɩ lan pɔsɛ Adam wakatɛ tarɩ ka paagɛ Amoyisi wakatɛ la, kũm põn bɔna mɛ tãna nẽrba. Baa la nẽr-sɛba tõon-be'ero n ka ãn wʋ Adam n yʋʋn sɩ'ɩsɛ Nawẽnnɛ nõorɛ se'em na wuu ki mɛ. Adam yʋʋn de la Azezi n yetɩ a wa'am na wõnnɛ.

¹⁵ La ba dagɩ bʋyɩla. Adam tuure la, la Nawẽnnɛ bɔ'a la ka tã wʋn dɩkɛ makɛ taaba. Nẽra ayɩla tuure ĩyã n botɩ nẽrba zozo'e kiira. La bãŋɛ-ya tɩ Nawẽnnɛ yel-sõnnɛ n ãn sõŋa gãnna, la de la nẽra ayɩla n de Azezi-krisi ĩyã tɩ Nawẽnnɛ ẽŋɛ nẽrba zozo'e yel-sõnnɛ zo'oge gãŋɛ.

¹⁶ Nawẽnnɛ bɔ'a la n ɩtɩ sɛla la, de la to'ore la nẽra ayɩla tõon-be'ero n ẽŋɛ sɛla la. Nẽra ayɩla tõon-be'ero la tarɩ la sarɩyadia wa'am, tɩ la sẽna la sɩbgrɛ. La nẽrba n tõm tõon-be'ero zozo'e la poorʋm, Nawẽnnɛ yel-sõnnɛ tɩ a ẽŋɛ bɔ nẽrba la botɩ ba masɛ mɛ a zẽ'am.

¹⁷ Lan de nẽra ayɩla tuure ĩyã tɩ kũm tãna nẽrba wuu la, bãŋɛ-ya tɩ nẽra ayɩla n de Azezi-krisi mã'a ĩyã, nẽr-sɛba wuu tɩ Nawẽnnɛ ẽŋɛ ba yel-sõnnɛ zo'oge, botɩ ba masɛ a zẽ'am na, wʋn vɔa mɛ, dita na'am Azezi-krisi ĩyã.

¹⁸ Bɛla, nẽra ayɩla tuure n botɩ Nawẽnnɛ dita nẽrba wuu sarɩya sɩbgra ba la, bɛla mẽ, nẽra ayɩla mã'a tõonɛ n masɛ la ĩyã n botɩ nẽrba wuu masɛ Nawẽnnɛ zẽ'am tara vɔm.

¹⁹ Nẽra ayɩla n sɩ'ɩsɛ Nawẽnnɛ nõorɛ ĩyã n botɩ nẽrba zozo'e dɛna tõon-be'ero dõma la, bɛla mẽ, nẽra ayɩla mã'a n sakɛ Nawẽnnɛ nõorɛ ĩyã, tɩ Nawẽnnɛ botɩ nẽrba zozo'e dɛna nẽrba n masɛ a zẽ'am.

²⁰ La sãn dɛna lɔɔ la, a wa'am mɛ tɩ tuure wʋn zo'oge pãɩ. La zẽ'e-sɛka tɩ tõon-be'ero zo'orɩ pa'asra, Nawẽnnɛ yel-sõnnɛ zo'orɩ mɛ pa'asra gãnna bɛla.

²¹ Bɛla, tõon-be'ero n tarɩ pãŋa botɩ nẽrba kiira la, bɛla mẽ, Nawẽnnɛ yel-sõnnɛ n tarɩ pãŋa botɩ nẽrba masɛ a zẽ'am tara vɔm n ka ba'asrɩ, tɩ Zuudãana Azezi-krisi ĩyã.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan