Bìoball air-loidhne

Aromduma 4 - Farefare Ninkaré

Abraham mãmsgɔ

¹ Tɩ wʋn yele Abraham n de tɩ yaaba la yelle yetɩ bo? A yʋʋn yẽ la bẽm?

² La sãn de nɩ Abraham tõoma ĩyã n botɩ a dɛna nẽra n masɛ Nawẽnnɛ zẽ'am, a yʋʋn tã wʋn wẽ yõ'ogɔ mɛ. La a ka tã wʋn wẽ yõ'ogɔ Nawẽnnɛ zẽ'am.

³ La gʋlsɛ Nawẽnnɛ gõŋɔ pʋam yetɩ: «Abraham bɔ la Nawẽnnɛ sɩra, tɩ Nawẽnnɛ yetɩ a de la nẽra n masɛ ẽŋa zẽ'am.»

⁴ Nẽra sãn tõnna tõoma, a to'orɩ la yɔɔrɔ. Yɔɔrɔ la dagɩ bɔ'a tɩ ba bɔ ẽ, la de la a bõnɔ.

⁵ La nẽra sãn ka tõm tõonɛ, dee bɔ Nawẽnnɛ n botɩ tõon-be'ero dõma masra a zẽ'am na sɩra, Nawẽnnɛ wʋn botɩ a lebge la nẽra n masɛ a zẽ'am ẽn bɔ sɩra la ĩyã.

⁶ Bɛla tɩ naba Adavidi mẽ tɔgɛ yetɩ, nẽra tɩ Nawẽnnɛ yetɩ a masɛ a zẽ'am, tɩ la dagna a tõoma ĩyã, tarɩ sũ-yẽlga.

⁷ A yele yetɩ: «Nẽr-sɛba tɩ Nawẽnnɛ bɔ ba ba tuure sugri, sɛba tɩ a basɛ ba tõon-be'ero taalɛ tarɩ zu-yẽlga.

⁸ Nẽr-sɛba tɩ Zuudãana Nawẽnnɛ ka geele a tõon-be'ero la tarɩ zu-yẽlga.»

⁹ Zu-yẽlga ẽŋa tɩ ba tɔgɛ a yelle la, de la nẽr-sɛba n wã la mã'a bõnɔ? Ayɛɩ, la po dɛna la nẽr-sɛba n ka wã la bõnɔ. Tõma dẽŋɛ yetɩ: «Abraham n bɔ Nawẽnnɛ sɩra la ĩyã, tɩ Nawẽnnɛ yetɩ a masɛ ẽŋa zẽ'am.»

¹⁰ Wakat-kãna tɩ bõn-ẽŋa ẽŋɛ? La de la Abraham n yʋʋn wã la poorʋm bɩɩ, lan dẽŋɛ a wãaga la? La de la ẽn yʋʋn nãn ka wã la.

¹¹ Bɛla poorʋm tɩ Abraham yãŋa yʋʋn wã, tɩ la dɛna dãalgɔ pa'alɛ tɩ Nawẽnnɛ yetɩ a de la nẽra n masɛ ẽŋa zẽ'am, ẽn bɔ sɩra la ĩyã, wakatɛ sɛka tɩ a nãn ka wã la. Bɛla tɩ Abraham dɛna sɛba wuu n bɔ Nawẽnnɛ sɩra dee ka wã la sɔ-yaaba, tɩ Nawẽnnɛ yetɩ ba de la nẽrba n masɛ ẽŋa zẽ'am.

¹² La Abraham ken dɛna la nẽr-sɛba n wã la sɔ-yaaba, la dagɩ nẽr-sɛba n wen wã la mã'a, la de la sɛba n bɔ Nawẽnnɛ sɩra wʋ Abraham n yʋʋn bɔ sɩra se'em, dee yʋʋn nãn ka wã la.

Nawẽnnɛ bĩŋe nõorɛ bɔ la sɛba n bɔ ẽ sɩra la

¹³ Nawẽnnɛ yʋʋn bĩŋe nõorɛ bɔ la Abraham, la a yɩɩsɩ yetɩ ba wʋn wa sɔna dũnia. La dagɩ Abraham n sakrɩ lɔɔ la ĩyã tɩ a bĩŋe nõorɛ la, la de la ẽn bɔ Nawẽnnɛ sɩra, tɩ Nawẽnnɛ yetɩ a masɛ ẽŋa zẽ'am na ĩyã.

¹⁴ La sãn de nɩ nẽrba n sakrɩ lɔɔ la ĩyã tɩ ba tɔ'ɔra bõn-sõma sɛba tɩ Nawẽnnɛ bĩŋe nõorɛ la, bɛla bɔ sɩra la ka tarɩ yõorɔ, la Nawẽnnɛ nõor-bĩŋre la ka tarɩ võorɛ.

¹⁵ Lɔɔ la sɩ'ɩsgɔ botɩ Nawẽnnɛ sũure n isgra. La zẽ'e-sɛka tɩ lɔɔ la ka boe, sɩ'ɩsgɔ mẽ ka boe.

¹⁶ Bɛla, la de la bɔ sɩra ĩyã, tɩ Nawẽnnɛ nõor-bĩŋre la wʋn dɛna yel-sõnnɛ bɔ'a n tarɩ yõorɔ bɔ Abraham yɩɩsɩ la wuu. La, la ka de a yɩɩsɩ sɛba n dolɩ lɔɔ la mã'a ĩyã, la de la nẽr-sɛba wuu n bɔ Nawẽnnɛ sɩra wʋ Abraham n yʋʋn bɔ sɩra se'em na. Abraham n de tɩ wuu sɔ-yaaba.

¹⁷ La gʋlsɛ Nawẽnnɛ gõŋɔ pʋam yetɩ: «Mam wʋn botɩ fʋ lebge so'olʋm buuri zozo'e sɔ-yaaba.» A de la tõma sɔ-yaaba Nawẽnnɛ tɩ a bɔ ẽ sɩra la zẽ'am. Nawẽnnɛ n botɩ kũm vɔ'ɔra, dee botɩ sɛla n ka boe bɔna.

¹⁸ Abraham yʋʋn bɔ la Nawẽnnɛ sɩra, tara pʋtẽ'erɛ gu'ura sɛla tɩ a ka tarɩ nɩ pʋtẽ'erɛ tɩ la tã wʋn ẽŋɛ. Bɛla tɩ a lebge so'olʋm buuri zozo'e sɔ-yaaba, wʋ Nawẽnnɛ n yʋʋn yetɩ a yɩɩsɩ wʋn zo'oge se'em na.

¹⁹ Abraham yʋʋn kʋrgɛ mɛ, tara wʋ yʋʋma kɔbga, dee la kũm, dee tɩ a pɔga Asaara yʋʋn dɛna kõndɔgrɛ, dee kʋrgɛ, la baa bɛla Abraham n bɔ Nawẽnnɛ sɩra la ka bo'oge.

²⁰ Nawẽnnɛ n yʋʋn bĩŋe nõorɛ tɩ a ẽŋɛ sɛla bɔ ẽ na, a yɛm yʋʋn ka yɔɔrɩ, a bɔ sɩra mɛ. La ẽn yʋʋn bɔ sɩra la basɛ mɛ tɩ a yẽ pãŋa nã'asra Nawẽnnɛ.

²¹ A sũure yʋʋn kɛ'ɛm mɛ tɩ a mina sõŋa sõŋa tɩ Nawẽnnɛ tã wʋn ẽŋɛ ẽn bĩŋe a nõorɛ tɩ a ẽŋɛ se'em na mɛ.

²² Bɛla tɩ Nawẽnnɛ yetɩ a masɛ mɛ ẽŋa zẽ'am, ẽn bɔ sɩra la ĩyã.

²³ La dagɩ ẽŋa mã'a ĩyã tɩ la gʋlsɛ yetɩ: «Nawẽnnɛ yetɩ a masɛ ẽŋa zẽ'am.»

²⁴ La po dɛna la tõma mẽ ĩyã. Tõma n bɔ Nawẽnnɛ n vo'oge tɩ Zuudãana Azezi sɩra la ĩyã, tɩ Nawẽnnɛ yetɩ tɩ masɛ ẽŋa zẽ'am.

²⁵ Nawẽnnɛ daan basɛ tɩ ba kʋ Azezi la tõma tõon-be'ero ĩyã, dee vo'oge ẽ tɩ a botɩ tõma dɛna nẽrba n masɛ a zẽ'am.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan