Bìoball air-loidhne

Aromduma 2 - Farefare Ninkaré

Nawẽnnɛ sarɩyadia masɛ mɛ

¹ Fõn nẽr-sɛka n zɛrgrɩ nẽrba basɛba la, fʋ kãn yẽ bʋʋrɔ, se'ere n soe la, fõn zɛrgrɩ nẽrba basɛba dee ɩta bãma n ɩtɩ se'em na, fʋ mõŋrɩ la fʋ mẽŋa bʋʋrɔ.

² Tɩ mi tɩ Nawẽnnɛ diti nẽr-sɛba n tõnnɩ tõon-be'ero bãma sarɩya dɔla la sɩra.

³ Fõn tẽ'esɛ tɩ fõn zɛrgrɩ fʋ taaba, dee ɩta fʋ mẽŋa bãma n ɩtɩ se'em na, fõn wʋn yãŋɛ põsɛ Nawẽnnɛ n diti tõon-be'ero sarɩya la mɛ bɩɩ?

⁴ Bɩɩ fõn ka nannɩ la Nawẽnnɛ ɩr-sõŋɔ, la a sũ-bʋgsʋm, la a sũ-mã'arɛ n zo'oge la? Fʋ mi tɩ Nawẽnnɛ ɩr-sõŋɔ la boorɩ tɩ fʋ teege la yɛm basɛ tõon-be'ero.

⁵ La fõn sũure kɛ'ɛm mɛ tɩ fʋ ka bɔɔra tɩ fʋ teege yɛm, bɛla tɩ fʋ lagsra sɩbgrɛ bĩŋra fʋ mẽŋa zuo gu'ura daar-sɛka tɩ Nawẽnnɛ wʋn pa'alɛ a sũ-isgre di nẽrba sarɩya la sɩra la.

⁶ Nawẽnnɛ wʋn bɔ nẽra woo yɔɔrɔ masɛ wʋ ẽn tõm se'em.

⁷ Nẽr-sɛba n mõrgɛ ɩta sõŋa ɛɛra nã'asgɔ la pẽka, la vɔm n ka ba'asrɩ Nawẽnnɛ zẽ'am na, a wʋn bɔ ba la vɔm n ka ba'asrɩ.

⁸ La nẽr-sɛba n ka sakɛ bɔ, sɩ'ɩsra sɩra, dee ɩta sɛla n ka masɛ la, wʋn yẽ Nawẽnnɛ sũ-isgre, la sɩbgrɛ.

⁹ A wʋn botɩ toogo la sũ-sã'aŋɔ n paagɛ nẽr-sɛba wuu n tõnnɩ tõon-be'ero la. Pɔspɔsɩ de la Zifdõma, pa'asɛ la sɛba n dagɩ Zifdõma.

¹⁰ La nẽr-sɛba wuu n ɩtɩ sõŋa wʋn yẽ la na'am pãŋa, la nã'asgɔ, la sũ-mã'asʋm. Pɔspɔsɩ de la Zifdõma, pa'asɛ la sɛba n dagɩ Zifdõma.

¹¹ Se'ere n soe la, Nawẽnnɛ ka bɔkrɩ nẽrba.

¹² Nẽr-sɛba n ka bãŋɛ Amoyisi lɔɔ la dee tõnna tõon-be'ero, ba wʋn sã'am ba tõon-be'ero la ĩyã tɩ la ka doose la lɔɔ la. La Zifdõma n tarɩ Amoyisi lɔɔ la dee tõnna tõon-be'ero la, Nawẽnnɛ wʋn dɩkɛ la lɔɔ la di ba sarɩya.

¹³ La dagɩ sɛba n selsrɩ lɔɔ la n masɛ Nawẽnnɛ zẽ'am, la de la sɛba n sakɛ ɩtɩ wʋ lɔɔ la n yele se'em na n masɛ.

¹⁴ Sɛba n dagɩ Zifdõma n ka tarɩ Amoyisi lɔɔ la, ba sãn ɩta ba mẽŋa wʋ lɔɔ la n yele se'em na, la pa'alɛ tɩ ba mẽŋa mi sɛla n masɛ mɛ, baa la ban ka tarɩ lɔɔ la.

¹⁵ Bɛla ba pa'alɩ tɩ sɛla tɩ lɔɔ la yetɩ ba ɩta la boe ba sũurum mɛ, tɩ ba pʋtẽ'erɛ n mi se'em na mẽ pa'ala tɩ bɛla de la sɩra. Bɛla tɩ ba pʋtẽ'era ẽn yɛta ba tɩ ba ka ẽŋɛ sõŋa, bɩɩ ba ẽŋɛ sõŋa.

¹⁶ Bõn-bãna wʋn puke la daar-sɛka tɩ Nawẽnnɛ wʋn botɩ Azezi-krisi di nẽrba yɛla n sʋgɛ sarɩya, masɛ wʋ kõ-yẽlga la tɩ mam mõolɛ n yetɩ se'em na.

Zifdõma, la lɔɔ

¹⁷ Fõn yetɩ fõn de la Zifu la, fõn te'ege la Amoyisi lɔɔ la yẽsna tɩ fõn de la Nawẽnnɛ nẽra,

¹⁸ fõn mi Nawẽnnɛ n boorɩ se'em mɛ. Lɔɔ la zãsʋm fõn mɛ tɩ fõn mina sɛla n ãn sõŋa, la sɛla n ka ãn sõŋa bɔkɛ.

¹⁹ Fʋ tẽ'esɛ tɩ fõn mi mɛ tãna wʋn pa'alɛ fɔɔsɩ sore. Fʋ tẽ'esɛ tɩ fõn de la peelem bɔ nẽr-sɛba n boe lika pʋam na.

²⁰ Fʋ tẽ'esɛ tɩ fõn zãsnɩ na sɛba n ka mi, dee dɛna kɔma karẽnsãama, se'ere n soe la, fõn tẽ'esɛ tɩ lɔɔ la pʋam, fõn tarɩ bãŋrɛ zõnzõnnɔ, la sɩra mɛ.

²¹ Fõn zãsnɩ fʋ taaba la, bẽm tɩ fʋ ka zãsna fʋ mẽŋa? Fõn mõolɩ yɛta nẽrba tɩ ba da zũura, dee tɩ fõn mẽŋa zũura.

²² Fõn yetɩ nẽrba tɩ ba da ɩta yalsɩ, dee ɩta yalsɩ fʋ mẽŋa. Fõn nẽ'esrɩ baga tɩ ba mãalɛ nã'asra la tɩ ba de la bõn-põ'osa, dee kẽ'era ba deto pʋam zũura ba yõorɔ dita.

²³ Fõn yẽsnɩ mɛ la Nawẽnnɛ lɔɔ la, dee sɩ'ɩsra lɔɔ la n yele se'em na, ɩta Nawẽnnɛ yãnnɛ.

²⁴ La gʋlsɛ Nawẽnnɛ gõŋɔ pʋam yetɩ: «Yãma Zifdõma ĩyã tɩ buuri basɛba nẽrba tɔgra be'em pɔ'ɔra Nawẽnnɛ yʋ'ʋrɛ.»

²⁵ Fʋ sãn sakra lɔɔ la, wãaga la tarɩ yõorɔ mɛ. La fʋ sãn sɩ'ɩsɛ lɔɔ la, la de la zãŋa, la ãn wʋ fʋ ka wã mɛ na.

²⁶ La buuri sɛka n ka wãtɩ, nẽra sãn sakɛ ɩta lɔɔ la n yetɩ ba ɩta se'em na, Nawẽnnɛ wʋn geele ẽ wʋ nẽra n wã.

²⁷ Nẽr-sɛka n ka wã, dee sakɛ ɩta lɔɔ la n yele se'em na, wʋn zɛrgɛ fʋ mɛ fõn tarɩ lɔɔ gõŋɔ la, wã dee sɩ'ɩsra lɔɔ la.

²⁸ La dagɩ sɛka n ɩtɩ Zifdõma ɩrgɔ tɩ nẽrba yẽta n de Zifu. La dagɩ wãaga tɩ nẽrba yẽtɩ la n botɩ fʋ dɛna Nawẽnnɛ nẽra.

²⁹ Zifu sɩra sɩra de la sɛka n de Zifu a sũure pʋam. Wãaga sɩra sɩra de la Nawẽnnɛ Sɩa n ɩtɩ sũure pʋam, la dagɩ wãaga wʋ lɔɔ n gʋlsɛ se'em na. Nawẽnnɛ n pẽgrɩ nẽr-ẽŋa, la dagɩ nẽrsaalba.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan