Aromduma 10 - Farefare Ninkaré

Ɩsrayɛlɩ dõma ka bɔ kõ-yẽlga la sɩra

¹ M sɔbiisi, mam n boorɩ se'em na m sũure wuu, dee sɔsra Nawẽnnɛ se'em de la mam buuri la yẽ fãarɛ.

² Mam yetɩ mɛ tɩ ba wɩsgɛ ba mẽŋa mɛ la Nawẽnnɛ sore doosgo, la ba ka mi la so-sɛka tɩ ba wʋn doose.

³ Ba ka mi Nawẽnnɛ n ɩtɩ se'em botɩ nẽrba masra a zẽ'am, dee bɔɔra tɩ ba ẽŋɛ sɔa ba mẽŋa masɛ Nawẽnnɛ zẽ'am. Bɛla, ba ka sakɛ Nawẽnnɛ n ɩtɩ se'em botɩ nẽrba masra a zẽ'am na.

⁴ Krisi n de lɔɔ la kʋkɩ'ɩ, tɩ nẽr-sɛka woo n bɔ ẽ sɩra wʋn masɛ Nawẽnnɛ zẽ'am.

⁵ Amoyisi yʋʋn gʋlsɛ tɔgɛ nẽra n wʋn ẽŋɛ se'em tɩ lɔɔ la botɩ a masɛ Nawẽnnɛ zẽ'am yelle, yetɩ: «Nẽr-sɛka n sakɛ lɔɔ la n yetɩ se'em na, wʋn vɔa, ẽn sakɛ lɔɔ la ĩyã.»

⁶ La sãn dɛna nẽra n wʋn bɔ Nawẽnnɛ sɩra tɩ a botɩ a masɛ a zẽ'am na yelle, la gʋlsɛ yetɩ: «Da tẽ'esɛ fʋ sũure pʋam yetɩ, ãne n wʋn zom Nawẽnnɛ yire?» La boorɩ tɩ la yetɩ, ãne n wʋn zom Nawẽnnɛ yire botɩ Krisi sige.

⁷ «Dee da yetɩ, ãne n wʋn sige kɩ'ɩn-tẽŋa?» La boorɩ tɩ la yetɩ, ãne n wʋn sige botɩ Krisi vo'oge.

⁸ Bɛla, la ken gʋlsɛ yetɩ bẽm? La yetɩ: «Nawẽnnɛ yetɔga la lɛm fʋ mɛ, a boe la fʋ nõorʋm, la fʋ sũurum.» La de la yetɔg-ẽŋa n bɛla tɩ tõma mõolɩ yɛta nẽrba tɩ ba bɔ sɩra.

⁹ Fʋ sãn tɔgɛ la fʋ nõorɛ nẽrba zẽ'am tɩ Azezi de la Zuudãana, la fʋ sãn bɔ sɩra fʋ sũurum tɩ Nawẽnnɛ vo'oge ẽ mɛ, fʋ wʋn yẽ fãarɛ.

¹⁰ La de la sũure pʋam tɩ nẽra bɔ'ɔrɩ Azezi sɩra, tɩ Nawẽnnɛ botɩ a masɛ a zẽ'am, nẽra tɔgrɩ la a nõorɛ yetɔga yẽta fãarɛ.

¹¹ La gʋlsɛ Nawẽnnɛ gõŋɔ pʋam yetɩ: «Nẽr-sɛka woo n bɔ ẽ sɩra, yãnnɛ kãn di ẽ.»

¹² Bɛla, welgre ka boe Zifdõma, la bu-zãŋsɩ tẽŋasʋka. Ba lagɩm tara la Zuudãana ayɩla n ɩtɩ bõn-sõma bɔ'ɔra nẽr-sɛba wuu n sosrɩ ẽ na.

¹³ Se'ere n soe la, la gʋlsɛ yetɩ: «Nẽr-sɛka woo n sosrɩ Zuudãana sõŋrɛ, a wʋn yẽ fãarɛ.»

¹⁴ La ba wʋn ẽŋɛ la wãne sose ẽ sõŋrɛ, ba sãn ka bɔ ẽ sɩra? La ba wʋn ẽŋɛ la wãne bɔ ẽ sɩra, ba sãn ka wõm a kõ-yẽlga la? La ba wʋn ẽŋɛ la wãne wõm kõ-yẽlga la, tɩ nẽra sãn ka mõolɛ?

¹⁵ La kõ-yẽlga la wʋn ẽŋɛ la wãne mõolɛ, Nawẽnnɛ sãn ka tõm nẽrba? Wʋ Nawẽnnɛ gõŋɔ n yele se'em na: «La de la sũ-yẽlga, fʋ sãn yẽ nẽr-sɛba n tarɩ kõ-yẽlga sẽna la.»

¹⁶ La, la dagɩ nẽrba wuu n sakɛ kõ-yẽlga la. Bɛla tɩ A'ezayi gʋlsɛ Nawẽnnɛ gõŋɔ pʋam yetɩ: «Zuudãana, ãne n bɔ kõ-yẽlga la tɩ tõma mõolɛ la sɩra?»

¹⁷ Bɛla, la de la kõ-yẽlga la selsgo n sẽm na bɔ sɩra, la kõ-yẽlga la de la Azezi-krisi yelle tɩ ba tɔgrɩ.

¹⁸ Bɛla, mam sokrɩ ya yetɩ, yãma tẽ'esɛ tɩ ba ka wõm kõ-yẽlga la mɛ bɩɩ? Ba wõm mɛ. La de wʋ Nawẽnnɛ gõŋɔ n yele se'em na: «Ba kõa la paagɛ tẽŋa wã wuu mɛ, ba yetɔga la saagɛ dũnia tɛka wuu mɛ.»

¹⁹ Mam wʋn ken soke ya yetɩ, yãma tẽ'esɛ tɩ Ɩsrayɛlɩ dõma ka wõm a võorɛ mɛ bɩɩ? Ba wõm mɛ. Amoyisi n yʋʋn de pɔspɔsɩ dãana n yele tɩ Nawẽnnɛ yetɩ: «Mam wʋn botɩ ya tara sũure la so'olʋm nẽrba n dagɩ mam nẽrba, mam wʋn botɩ ya sũure isge la so'olʋm sɛka n ka mi sɛla võorɛ.»

²⁰ La A'ezayi yẽ bʋraanɛ mɛ yele tɩ Nawẽnnɛ yetɩ: «Nẽr-sɛba n daan ka eerɩ mam na, ba yẽ mam mɛ, mam puke m mẽŋa mɛ pa'alɛ nẽr-sɛba n daan ka sokrɩ mam yelle la.»

²¹ Dee yele Ɩsrayɛlɩ dõma yelle yetɩ: «Mam tẽegɛ m nu'usi mɛ daarɛ la wuu teese nẽrba n sɩ'ɩsrɩ, dee ka sakra.»

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan