Amatie 6 - Farefare Ninkaré

Azezi zãsʋm nẽrba sõŋrɛ, la Nawẽnnɛ pʋ'ʋsgɔ, la nõorlʋa yelle

¹ «Guuse-ya, da ɩta-ya ɩr-sõma nẽrba nẽŋam tɩ ba yẽta ya. Ya sãn ɩta bɛla, ya kãn to'oge yɔɔrɔ ya Sɔ Nawẽnnɛ n boe saazuum zẽ'am.

² Bɛla, fʋ sãn yetɩ fʋ sõŋɛ nasa, da kãn mõolɛ nẽrba zẽ'am wʋ pʋlibsum dõma n ɩtɩ se'em ba wẽndeto pʋam, la sorɔɔrɔ zuto tɩ nẽrba pẽgɛ ba la. Mam yetɩ ya la sɩra, tɩ bãma põn to'oge ba yɔɔrɔ mɛ.

³ Fʋ sãn yetɩ fʋ sõŋɛ nasdõma, da basɛ tɩ fʋ gɔbga nu'ugo bãŋɛ fʋ zʋʋgɔ nu'ugo n ɩtɩ sɛla.

⁴ Bɛla nẽra nẽra kãn bãŋɛ tɩ fʋ sõŋɛ nasdõma, la fʋ Sɔ Nawẽnnɛ n yẽ fõn sʋgɛ ẽŋɛ la, a wʋn lebse fo.

⁵ Ya sãn pʋ'ʋsra Nawẽnnɛ, da ɩta-ya wʋ pʋlibsum dõma n ɩtɩ se'em na, bãma nõŋɛ la ba zɛ ba wẽndeto pʋam, la sorɔ-puursi zuto pʋ'ʋsra Nawẽnnɛ tɩ nẽrba yẽta ba. Mam yetɩ ya la sɩra, tɩ ba põn to'oge ba yɔɔrɔ mɛ.

⁶ Fʋ sãn yetɩ fʋ pʋ'ʋsɛ Nawẽnnɛ, fʋ kẽ fʋ deem yʋ kʋlɩŋa pʋ'ʋsɛ fʋ Sɔ Nawẽnnɛ n boe zẽ'a n sʋgɛ la. La fʋ Sɔ la n yẽ tɩ fʋ sʋgɛ mɛ pʋ'ʋsɛ la, a wʋn yɔ fɔ.

⁷ Ya sãn pʋ'ʋsra Nawẽnnɛ, ya da tɔgra yetɔga n ka tarɩ võorɛ kaana wʋ nẽr-sɛba n ka mi Nawẽnnɛ n ɩtɩ se'em na, ba tẽ'esɛ tɩ bãma n tɔgrɩ zɔ'ɔra la ĩyã, Nawẽnnɛ wʋn lerge bãma pʋ'ʋsgɔ mɛ.

⁸ Bɛla, da ãna-ya wʋ bãma n ãn se'em na, se'ere n soe la, lan dẽŋɛ ya wʋn sose ya Sɔ Nawẽnnɛ, a põn mina yãma n boorɩ sɛla mɛ.

⁹ Bɛla, pʋ'ʋsra-ya wãna: ‹Tõma Sɔ Nawẽnnɛ n boe saazuum, botɩ fʋ yʋ'ʋrɛ yẽta pẽka,

¹⁰ wa'am wa di na'am nẽrba tẽŋasʋka, botɩ fõn boorɩ se'em ẽŋɛ tẽŋa zuo, wʋ lan ɩtɩ fõn yire se'em na.

¹¹ Bɔ tɔ tɩ zĩna dia.

¹² Basɛ tɩ tõon-be'ero taalɛ, wʋ tõma n mẽ basɛ sɛba n ẽŋɛ tõma be'em taalɛ se'em na.

¹³ Da basɛ tɩ yelle paagɛ tɔ tɩ tɩ lui. Fãagɛ tɔ be'em dãana nu'usum basɛ. [Tɩ fõn soe so'olʋm, la pãŋa, la nã'asgɔ wakatɛ n ka ba'asrɩ. Amina!]›

¹⁴ Ya sãn basɛ nẽr-sɛba n ẽŋɛ ya be'em na taalɛ, ya Sɔ Nawẽnnɛ mẽ wʋn basɛ ya tõon-be'ero taalɛ.

¹⁵ La ya sãn ka basɛ nẽr-sɛba n ẽŋɛ ya be'em na taalɛ, ya Sɔ Nawẽnnɛ mẽ kãn basɛ ya taalɛ.

¹⁶ Ya sãn lʋ nõorɛ, da zũŋe-ya nẽŋa wʋ pʋlibsum dõma n zũŋri ba nẽnsɩ se'em, tɩ ba pa'alɛ nẽrba tɩ bãma lʋ la nõorɛ la. Mam yetɩ ya la asɩra, tɩ ba põn to'oge ba yɔɔrɔ mɛ.

¹⁷ Fʋ sãn lʋ nõorɛ, wire fʋ nẽŋa dee sãasɛ fʋ zuugo,

¹⁸ tɩ nẽrba da bãŋɛ tɩ fʋ lʋ la nõorɛ. La fʋ Sɔ Nawẽnnɛ n boe zẽ'a n sʋgɛ la wʋn bãŋɛ. La fʋ Sɔ la n yẽ fõn sʋgɛ lʋ nõorɛ la, a wʋn yɔ fɔ.»

Azezi zãsʋm Nawẽnnɛ yire bõntarsõm yelle

¹⁹ «Da lagsrɩ-ya bõntarsõm bĩŋra dũnia wã zuo, zẽ'e-sɛka tɩ bõn-mõgla la tẽŋanzẽem wʋn sã'am ba, tɩ nayigba mẽ kẽ'era zũura.

²⁰ Lagsra-ya bõntarsõm bĩŋra Nawẽnnɛ yire, bilam tɩ mõka la tẽŋanzẽem kãn sã'am ba, tɩ nayigba mẽ kãn kẽ zũ.

²¹ Se'ere n soe la, ya bõntarsõm n boe zẽ'a na, ya pʋtẽ'era mẽ boe la bilam.

²² Nini n nẽerɩ peelem bɔ'ɔra ĩyã wʋ fɩtla la. Bɛla, fʋ nini sãn ãna sõŋa, fʋ ĩyã wuu tarɩ peelem mɛ.

²³ La fʋ nini sãn ka ãna sõŋa, fʋ ĩyã wuu boe la lika pʋam. Peelem sɛka n wʋn nẽegɛ fʋ pʋam na sãn dɛna lika, la de la lika mẽŋa mẽŋa.

²⁴ Nẽra ka boe n tã wʋn sakɛ zuudãandõma bayi, a wʋn sise ayɩla mɛ, dee nõŋɛ ayɩla, bɩɩ a wʋn nanna ayɩla la mɛ, dee pɔ'ɔra ayɩla la. Bɛla, yãma ka tã wʋn sakɛ Nawẽnnɛ n de ya Zuudãana, dee botɩ bõntarsõm mẽ dɛna ya zuudãana.

²⁵ Bɛla n soe tɩ mam yele ya yetɩ, ya da fabla ya vɔm yelle, yãma n wʋn di sɛla, bɩɩ ya wʋn yũ sɛla, la ya da fabla ya ĩyã yelle, ya wʋn yɛ sɛla. Vɔm ka gãnnɩ dia? Bɩɩ ĩyã ka gãnnɩ futo?

²⁶ Bɩsɛ-ya bõn-ẽgla, ba ka bʋtɩ, ba mẽ ka lagsrɩ bõnkɔɔla ɩta bã pʋam. La ya Sɔ Nawẽnnɛ bɔ'ɔrɩ ba dia mɛ. Yãma ka tarɩ yõorɔ gãnna bõn-ẽgla halɩ zozo'e?

²⁷ Ãne n boe yãma pʋam n tã wʋn pa'asɛ a vɔm woglʋm fẽfẽe ẽn fablɩ la ĩyã?

²⁸ La bẽm tɩ ya fabla futo yelle? Bɩsɛ-ya mõ-puuro n ãn sõŋa se'em, ba ka tõnnɩ, ba mẽ ka wʋgrɩ futo.

²⁹ La mam yetɩ ya mɛ tɩ, baa naba Asalomõ na'am n yʋʋn tarɩ pãŋa la, a yʋʋn ka tã'agɛ yɛ fuugo n ãn sõŋa wʋ mõ-puugo ayɩla.

³⁰ La Nawẽnnɛ sãn botɩ mõorɔ n boe zĩna dee tɩ ba wʋn yõ ba bugum beere ãna sõŋa bɛla, a kãn bɩsɛ yãma yelle gãnna bɛla? Bẽm tɩ yãma ka bɔ Nawẽnnɛ sɩra zo'oge?

³¹ Da fabla-ya yɛta tɩ: ‹Bẽm tɩ wʋn di?› bɩɩ ‹tɩ wʋn yũ la bẽm?› bɩɩ ‹tɩ wʋn yɛ la bẽm?›

³² La de la nẽr-sɛba n ka mi Nawẽnnɛ n eerɩ bõn-bãma wuu. La yãma Sɔ Nawẽnnɛ mi tɩ yãma boorɩ bõn-bãma wuu mɛ.

³³ Dẽŋɛ-ya ɛ Nawẽnnɛ so'olʋm, la sɛla n masɛ Nawẽnnɛ zẽ'am, tɩ a wʋn bɔ ya bõn-bãma wuu pa'asɛ.

³⁴ Da fabla-ya beere yelle, tɩ beere ya wʋn bãŋɛ ya wʋn ẽŋɛ se'em, daarɛ woo n bɩsrɩ a mẽŋa yelle.»