Amatie 16 - Farefare Ninkaré

Farisi dõma, la Saduse dõma pʋlibsum

¹ Tɩ Farisi dõma, la Saduse dõma basɛba wa'am Azezi zẽ'am wa bɔɔra tɩ ba makɛ ẽ bɩsɛ, yele ẽ yetɩ, a ẽŋɛ bõn-yãlma pa'alɛ tɩ ẽŋa ze'ele la Nawẽnnɛ yire.

² Tɩ Azezi lerge ba yetɩ: «Zaanõorɛ, sawara sãn mõ'ogɛ, yãma yetɩ saaga kãn ni.

³ La bulika, sawara sãn mõ'ogɛ sobge, yãma yetɩ saaga n wʋn ni. Yãma bɩsrɩ la sawara mina la ãn se'em, dee ka tãna wʋn bãŋɛ bõn-sɛba n ɩtɩ lɛɛlɛ wã n pa'alɩ sɛla.

⁴ Zamãan-ẽna nẽrba n de nẽr-bɛ'ɛsɩ, dee ka dɔla Nawẽnnɛ la sɩra la, boorɩ tɩ ba yẽ la bõn-yãlma, la ba kãn yẽ bõn-yãlma, sãn dagna Nawẽnnɛ nõtɔ'ɔsa Azonaasɩ bõn-yãlma la.» La a basɛ ba mɛ dee fõrgɛ.

⁵ Tɩ ẽŋa la a karẽnbiisi la dɔɔra mõgrɛ la doone ke bɔba, tɩ a karẽnbiisi la yĩm ka dɩkɛ borborɩ.

⁶ Tɩ Azezi yele ba yetɩ: «Guuse-ya ya mẽŋa la Farisi dõma, la Saduse dõma dãbɩllɛ la.»

⁷ Tɩ karẽnbiisi la tẽ'esra yetɩ: «Tõma n ka dɩkɛ borborɩ la ĩyã tɩ a yele bɛla.»

⁸ Tɩ Azezi bãŋɛ ban tẽ'esrɩ se'em na, yele ba yetɩ: «Ya ka bɔ mam sɩra zo'oge. Bẽm tɩ yãma tẽ'esra yetɩ, la de la yãma n ka tarɩ borborɩ la ĩyã?

⁹ Yãma nãn ka bãŋɛ a võorɛ? Yãma ka tẽrɩ, borborɩ banuu la tɩ bʋraasɩ tʋsanuu daan di tɩgɛ deege la, yãma daan vaagɛ di-sɛba n daan deege la pɩrɛ la pɩtɔ balɛ?

¹⁰ La borborɩ bayopɔɩ la, tɩ bʋraasɩ tʋsanaasɩ la daan di tɩgɛ deege la, yãma vaagɛ di-sɛba n deege la pɩrɛ la pɩtɔ balɛ?

¹¹ Bẽm tɩ ya ka bãŋɛ tɩ la dagɩ borborɩ yelle tɩ mam tɔgrɩ la ya? Guuse ya mẽŋa la Farisi dõma, la Saduse dõma dãbɩllɛ la yelle.»

¹² Tɩ ba yãŋa bãŋɛ tɩ a ka yele ba tɩ ba guuse ba mẽŋa la dãbɩllɛ sɛba tɩ ba tarɩ gaana borborɩ zom na, la de la Farisi dõma, la Saduse dõma zãsŋɔ la tɩ a tɔgrɩ.

Apɩyɛɛrɩ pa'alɛ Azezi n de nẽr-sɛka

¹³ Azezi daan paagɛ la tẽŋa yʋ'ʋrɛ n de Filipi Sezaare, soke a karẽnbiisi la yetɩ: «Nẽrba yetɩ mam n de Nẽrsaala Dayʋa la de la ãne?»

¹⁴ Tɩ ba lerge yetɩ: «Sɛba yetɩ fõn de la Azã n daan misri nẽrba ko'om pʋam na. Tɩ sɛba yetɩ fõn de la Nawẽnnɛ nõtɔ'ɔsa A'eli. Tɩ basɛba yetɩ fõn de la Nawẽnnɛ nõtɔ'ɔsa Azeremi, bɩɩ Nawẽnnɛ nõtɔ'ɔsrɩba la nẽra ayɩla.»

¹⁵ Tɩ a lebe soke ba yetɩ: «La yãma yetɩ mam de la ãne?»

¹⁶ Tɩ Asimõ-pɩyɛɛrɩ lerge ẽ yetɩ: «Fõn de la Krisi, Nawẽnnɛ n de vɔm dãana la Dayʋa.»

¹⁷ Tɩ Azezi lebe yele ẽ yetɩ: «Asimõ, Azã dayʋa, fʋ tarɩ zu-yẽlga, se'ere n soe la, la dagɩ nẽrsaala n pa'alɛ fʋ wãna, la de la mam Sɔ Nawẽnnɛ n boe saazuum na.

¹⁸ Mam yetɩ fʋ tɩ fʋ de la Apɩyɛɛrɩ, a võorɛ de la tãmpĩa, la tãmpĩ-ẽna zuo tɩ mam wʋn vigle m nẽrba lagsgɔ zẽ'a. La kũm pãŋa kãn tã'agɛ ẽ.

¹⁹ Mam wʋn bɔ fɔ Nawẽnnɛ so'olʋm kʋlɩnbiɛ. La bõn-sɛka woo tɩ fʋ wʋn lʋ dũnia wã zuo, bõn-ẽŋa wʋn lʋ Nawẽnnɛ yire. La bõn-sɛka woo tɩ fʋ wʋn lorge dũnia wã zuo, bõn-ẽŋa wʋn lorge Nawẽnnɛ yire.»

²⁰ Azezi yele bɛla dee kã'an a karẽnbiisi la yetɩ, ba da yele nẽra nẽra tɩ ẽŋa de la Krisi.

Azezi dẽŋɛ tɔgɛ a kũm yelle

²¹ Wakat-ẽŋa tɩ Azezi daan pɔsɛ zãsna a karẽnbiisi la yetɩ: «Dẽnɩ tɩ mam sẽŋɛ Zerizalɛm, tɩ tẽŋa la kẽma, la kãabgɔ kẽma nẽŋadõma, la lɔɔ karẽnsãandõma ka nãmsɛ mam halɩ zozo'e, la ba wʋn kʋ mam mɛ. La dabsa atã daarɛ mam wʋn vo'oge.»

²² Tɩ Apɩyɛɛrɩ tarɩ ẽ yese kẽnkɛrŋa ka yele ẽ yetɩ: «Zuudãana, da le tɔgɛ bɛla, Nawẽnnɛ wʋn gu fo, la kãn ẽŋɛ fʋ bɛla.»

²³ Tɩ Azezi gelge yele Apɩyɛɛrɩ yetɩ: «Lebe mam poorʋm, Asũtãana wã. Fõn boorɩ tɩ fʋ botɩ mam lebe la poorʋm. Fʋ tẽ'esgɔ la dagɩ Nawẽnnɛ tẽ'esgɔ, la de la nẽrsaala tẽ'esgɔ.»

²⁴ Dee yele a karẽnbiisi la yetɩ: «Nẽra sãn bɔɔra tɩ a dɔla mam, dẽnɩ tɩ a basɛ a mẽŋa n boorɩ se'em, dee sakɛ nãmsgɔ wʋ nẽra n buke a kũm dɔ-puurŋa dɔla mam.

²⁵ Se'ere n soe la, nẽr-sɛka woo n boorɩ tɩ a gu a vɔm, a wʋn koŋe ẽ. La nẽr-sɛka woo n sakɛ tɩ a koŋe a vɔm mam ĩyã, a wʋn yẽ vɔm.

²⁶ La nẽra sãn yẽ dũnia wã sɛla woo, dee koŋe vɔm Nawẽnnɛ zẽ'am, a yõorɔ de la bẽm? Sɛla ka boe tɩ nẽra wʋn dɩkɛ teege vɔm.

²⁷ Nẽrsaala Dayʋa la wʋn leme wa'am mɛ la a Sɔ Nawẽnnɛ na'am pãŋa, la a malɛkadõma. La wakat-ẽŋa a wʋn yɔ nẽra woo masɛ la a tõonɛ.

²⁸ Mam yetɩ ya la sɩra, tɩ nẽr-sɛba n ze kalam wã basɛba kãn ki, sãn dagna tɩ ba wa yẽ la Nẽrsaala Dayʋa la n sẽm, la a na'am.»